E Na’o Tusiga Faatekinolosi
Vaetamaina ma Talafaasolopito o Aiga—Aiga e Faavavau, Sootaga e Faavavau
E mafai faapefea ona tatou iloa pe tatau ona tatou faia galuega o talafaasolopito o aiga mo a tatou laina moni po o laina vaetamaina?
Ua faamanuiaina i tatou i le mafai ona auai i sauniga o le malumalu lea e faamauina faatasi ai i tatou o ni aiga mo le olaga nei ma le faavavau atoa. E pei ona aoao mai Peresitene Russell M. Nelson: “O le faaeaga o se mataupu faaleaiga. E nao sauniga faaola o le talalelei a Iesu Keriso e mafai ona faaeaina ai aiga. O le taunuuga tupito lea o loo tatou taumafai i ai ia tatou fiafia o se aiga—maua faaeega paia, faamauina, ma saunia mo le ola e faavavau i le afioaga o le Atua.”1 O lenei avanoa e tuuina atu ia i latou uma e fananau i totonu o le feagaiga ma i latou o e vaetamaina ma faamauina i o latou aiga e ala i sauniga paia o le malumalu.
“O aiga alofa, e faavavau e mafai ona foafoaina e ala i le vaetamaina. Pe o tamaiti e o mai i se aiga e ala i le vaetamaina po o le fanau mai, o i latou o se faamanuiaga e tutusa le taua. O fanau ua faamauina i le malumalu i o latou matua fai e mafai ona maua faamanuiaga uma o le avea ai ma se vaega o lo latou aiga e faavavau.”2
Pe a amata e se tagata na vaetama mai le galuega o talafaasolopito o aiga, e lua ni gafa e mafai ona mulimuli ai, sailiili, ma mafaufau i ai mo galuega faalemalumalu.
Pe o le mulimuli i le laina ua faamauina (i le avea ai ma se aiga fai o se tagata e mafai ona valaauina) po o le laina moni—po o mea uma e lua—e tatau ona sailia e ala i aufono ma faaaliga faaleaiga. E leai se tali sa‘o e tasi, ma o tagata taitoatasi o loo feagai ma lenei filifiliga e tatau ona taulimaina o se mataupu o le tatalo.
Na aoao mai Elder Richard G. Scott (1928–2015) o le Korama a Aposetolo e Toasefululua: “Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu ma o le a faapea ona e maua ai faamanuiaga sili atu. Ua folafola mai e le Au Peresitene Sili, ‘O la tatou matafaioi tupito o le sailia lea ma faailoa mai o tatou lava tuaa’ [Tusi a le Au Peresitene Sili, 29 Fep., 2012].”3
O se mea masani mo tagata na vaetamaina le i ai o ni lagona feteenai e uiga i le uiga o lenei mea i tulaga o o latou tuaa. Fai mai Maria (ua suia le igoa): “O le talafaasolopito o aiga e matuai fenumiai lava mo au. Ua ta‘u mai ia te au o ou ’tuaa’ o i latou ia ua faamauina ai au, ma o nisi taimi ou te lagona ai le faamaualuga i lena talatuu, ae ou te lagonaina lava i taimi uma sina lagona ese ona o latou e le o so‘u soototo. Sa faia e lo‘u aiga moni se galuega tele o talafaasolopito o aiga ma faaali mai ia te au ni api talaaga ma ata. Sa manaia ma o se fiafiaga le vaaia o le mea na sau ai nisi o o‘u foliga faaletino … ma lagonaina se ituaiga o fesootaiga a o ou faitauina upu mai o’u tuaa tuufaasolo. Ae toetoe lava a ou lagona le pei o loo ou nonoina lena lagona o le fesootaiga, aua ou te alu i fafo atu o lena sauniga o le malumalu.
O Susana (ua suia le igoa), e pei o le tele o tagata vaetama, sa i ai se fiailoa tele e uiga i ona matua na fanau mai ai. Sa faamauina o ia o se pepe meamea i lona aiga na vaetamaina ma lagonaina le mana ma le faamautinoaga o ona tagata nei—o i latou ia sa tatau ona faatasi ma ia e faavavau. Sa ia lagonaina le faamanuiaina e ala i le faia o galuega o talafaasolopito o aiga ma le malumalu mo lenei aiga. Peitai, e lei aveesea ai e lena mea lona fiailoa po o lona manao e ofo atu sauniga faaola i tagata i lona laina na fanau mai ai. Sa popole o ia ona o lona le faamaoni i lona aiga na vaetama i ai ona o le i ai o lena manao. Ae ina ua maea se talanoaga alofa ma ona matua, sa faamautinoa atu ia te ia o lagona o le alofa ma le faamaoni o le a le faaitiitia e ala i le faaauauina o le galuega paia mo lona laina na fanau mai ai.
O Se Mataupu o le Fefautuaai ma Faaaliga
O malosiaga faaleaiga e lautele lava, ma o mea e aoga mo le tagata e toatasi atonu e le toafimalie mo se isi. Afai e lagona e ou matua na vaetamaina oe le le toafimalie i le faaauauina o le faasologa o lou gafa moni, atonu e sili ona lelei le taofi o lena galuega ma taulai atu i isi tuaa. Atonu e oo mai le taimi mo lou laina moni i se taimi mulimuli ane, aua o tagata uma e fananau mai i le lalolagi o le a maua se avanoa e maua ai sauniga o le malumalu i se taimi. Ae ia iloa o faatulagaga faaleaiga i le olaga a sau lea e foliga mai e matua fenumiai lava mo i tatou i lo tatou malamalama e gata mai o le a i ai se aso o le a manino ai.
Sa faamatala e Dallin H. Oaks, Fesoasoani Muamua i le Au Peresitene Sili, le tala lenei na faasoa atu e se uo ia te ia:
“I le mavae ai o le maliu o lana avā pele ma le tina o lana fanau, sa toe faaipoipo ai se tama. O nisi o le fanau matutua sa matua tetee lava i le faaipoipoga ma saili atu i le fautuaga a se tasi o le aiga e vavalalata i ai, o lē sa avea ma se taitai faaaloalogia o le Ekalesia. I le mavae ai ona faalogo atu i mafuaaga o lo latou tetee, lea sa taulai atu i tulaga ma sootaga i le lalolagi o agaga po o i malo o le mamalu lea e sosoo ma le Faamasinoga Mulimuli, sa faapea atu ai lenei taitai: “O loo outou popole i mea sese. E tatau ona outou popole pe o le a outou oo i na nofoaga. Mafaufau loloto i lena mea. Afai e te oo iina, o na mea uma o le a sili ona matagofie nai lo le mea e mafai ona e mafaufauina.”
“O se aoaoga faamafanafana loto! Faalagolago i le Alii!”4
Filifiliga i le FamilySearch
I le taimi nei, o vaega patino i totonu o le FamilySearch e tuu ai au filifiliga e tatala. E faigofie ona mataituina le laina o le faamauga ma se laina moni i luga o lau siata o le faasologa o le gafa pe a e filifili e fai. I totonu o le Gafa o le Aiga i le FamilySearch.org, e mafai ona e filifili le filifiliga e “Faaopoopo le Matua” i lau faamaumauga. O lenei mea o le a fatuina ai se laina ma ni matua eseese e mafai ona e sailia ma faatumuina i le mamao e te manao ai. E mafai ona e atofaina po o le fea seti o matua e te manao e faaali atu, ae e faigofie lava ona e toe sui i tua ma luma. I totonu o lau lava faamaumauga, e mafai foi ona e faailoa mai pe o le faiā a le matua e moni pe vaetamaina pe afai e te manao ai.
O aiaiga faavae a le Ekalesia e manaomia ai lou auina atu na o igoa mo i latou e te aiga i ai, o lea e mafai ai e lenei mea ona e auina atu igoa o le malumalu mo laina o aiga moni, vaetamaina, ma aiga na tausia e fesootai i lou aiga.
Vaetamaina i le Aiga o Isaraelu
O le manatu faavae ma le faiga o le vaetamaina e faatatau i le toetoe o tagata uma ua fananau mai. Na aoao mai Mark A. Peterson, o se polofesa talu ai o le Iunivesite o Polika Iaga:
“O le vaetamaina e le faatapulaaina i tulaga faapitoa tatou te ta‘ua o le ’vaetamaina.’ E faatatau ia i tatou uma. Na saunoa … le Aposetolo o Paulo e uiga i le vaetamaina o se faagasologa lea e avea ai i tatou ma tagata o le feagaiga, o se vaega o le aiga o Aperaamo. … Ia Paulo, o le faaupuga vaetamaina sa faaaoga e faaali ai o i latou o e talitonu ia Iesu e avea o se vaega o se aiga e sili ona faapitoa. E moni lenei mea mo i tatou uma o e ua papatisoina i le Ekalesia i aso nei. E avea i tatou uma o uso ma tuafafine.
“Atonu e sili ona manino i le Kalatia:
“Aua o outou uma lava ua papatisoina ia Keriso, ua outou oofu ia Keriso.
“‘E le o i ai se Iutaia po o se Eleni, e le o i ai se pologa po o se saoloto, e le o i ai se tane po o se fafine, aua ua tasi lava outou uma ia Keriso Iesu.
“Afai foi e o Keriso outou, e moni o fanau outou a Aperaamo, o suli foi e tusa ma le mea na folafolaina.” [Kalatia 3:27–29] …
“O le avea ma se vaega o le aiga o Isaraelu e faailoa mai ia i tatou i ni faaupuga patino pe a tatou maua o tatou faamanuiaga faapeteriaka. O iina e ta‘u mai ai ia i tatou po o le fea le laina o gafa e a tatou. O lenei foi mea, i le tele o tulaga, o se faaaliga lea o le foafoaga faaleaiga e ala i le faagasologa o le vaetamaina. O nisi taimi i totonu o se aiga e tasi, o nisi o e o le gafa o Efaraima ae o isi e ono o mai ia Iuta po o Tanu po o Manase. O le avea ai ma tagata o nei gafa taitasi e masani lava o se vaega o le faagasologa o le vaetamaina lea na saunoa i ai Paulo. A tatou filifili le usiusitai ma le salamo ma aai ma feinu i le faamanuiaga o le feagaiga, e talia i tatou i totonu o le aiga o le faatuatua, le Ekalesia. E le toe tagata ese i tatou ma e ua aumau ae o ni uso a tagatanuu, uso, ma tuafafine faatasi ma le Au Paia.”5
O Le Fuafuaga Sili o le Fiafia
O le fuafuaga a le Tama Faalelagi o se fuafuaga o le fiafia Na te silafia o le faamauina i sootaga faaleaiga e faavavau e mafai ona aumaia ia i tatou le olioli i ituaiga o sootaga vavalalata ma lagona alofa o sootaga faaleaiga. E ala i le tatalo, e mafai ona e iloa ai le ala e tatau ona uia e lau lava malaga patino e faatatau i laina o aiga moni ma vaetamaina a o e auai i le faiga o galuega o le malumalu ma talafaasolopito o aiga i lou olaga atoa.