Ua Ou Filifili e Faalogo ia te Ia

Saunia e Rirhandzo Nkonyane, Pretoria, Aferika i Saute

Ina ua ta‘ua e se uso le keke i le taimi o lana molimau, sa ou tepa ae i luga ma amata ona gauai atu i ai.

Ata

o se seti o ki i luga o se laulau, ma se fafine o loo tatalo i tua atu

Sa ou fanau i totonu o le Ekalesia, o lea sa ou auai ai i gaoioiga a le Peraimeri ma le autalavou. Sa ou fiafia i le Peraimeri ona o pese ma lesona.

Peitai, a o ou talavou, sa amata ona ou pa’u ese ina ua ou siitia atu i se uarota fou. Sa ou auai i gaoioiga a le autalavou i le tele o vaiaso, ae sa ou nofonofo a’u lava, ma ua ou tau le auai. Ou te lei fiafia i le lotu i le Aso Sa, ae sa ou alu ma nofo. Sa ou iloaina ou te lei liua moni lava i le talalelei ma ona aoaoga. E lei i ai sa‘u lava molimau.

E pei ona masani ai i le taimi o se tasi o sauniga anapogi ma molimau, sa fealualua’i solo lo’u mafaufau. Ou te lei faalogo moni a o tuuina mai e tagata o le uarota a latou molimau, ae sa ou fai atu amene i le faaiuga o molimau taitasi. Ona alu atu lea o se tuafafine i le pulelaa ma amata ona tuuina mai lana molimau. Ina ua ia ta‘ua le keke, sa ou tilotilo i luga ma amata ona gauai atu i ai.

“Ou te talanoa i taimi uma i le Tama Faalelagi, e tusa lava pe o o’u taoina se keke,” o lana tala lea. “Ou te faia sina tatalo ina ia fefete le keke ma lelei. Ou te iloa e tali mai o Ia ia tatou tatalo.

Ou te lei mafaufau tele e uiga i lena molimau seia oo ina le ola le matou taavale ina ua manaomia ona matou o i le faleoloa e aumai se meaai. I lena taimi sa ou manatua ai upu a le tuafafine. O lea, sa ou toe foi atu ai i lo‘u potumoe e ole atu i le Atua e fesoasoani mai ia ola le taavale. Sa ou tootuli ma tatalo. Ina ua uma, sa ou aveina le ki o le taavale ma tuu i le mea e faaola ai. Ona oo mai lea o le tali i la‘u tatalo—ua amata ona ola le taavale.

Ona o lena tali i se tatalo faigofie, sa ou alu ai mai le toeitiiti lava a ou pau ese atu i se ala na fesoasoani ia te au e maua ai se molimau patino ma liua atoatoa ai i le talalelei. O upu i le pese Peraimeri e sili ona ou fiafia i ai, “Le Alofa o Lou Faaola,”¹ na avea ma upu sili atu nai lo na o ni upu o se pese. Sa oo ina avea ma ni lagona ua ou maua moni lava.

Ua ou tatalo nei mo mea uma. Ma e ui o le tali po o le taimi e le o le mea lea ou te manao i ai i taimi uma, ae ou te filifili pea e faalogo ia te Ia e pei ona ou manatuaina upu a Nifae: “Ae faauta, ou te fai atu ia te outou e ao ina outou tatalo e le aunoa, ae aua le faavaivai”(2 Nifae 32:9).