“I se Nofoaga Paia,” Liahona, Ape. 2022.
I se Nofoaga Paia
A o faaleo malie atu e le alii talavou upu taitasi o le tatalo o le faamanatuga, sa matou lagonaina se molimau mamana o le alofa o le Atua.
Ata na tusia e Dilleen Marsh
Sa matou fou i le Uarota a Dunwoody i le taimi muamua na matou feiloai ai ia Pili. A o amata le sauniga faamanatuga, sa ou matauina o loo nofo o ia i le laulau o le faamanatuga.
Ina ua uma ona aai le uarota i le falaoa, sa amata e Pili le tatalo o le faamanatuga i luga o le vai, ae sa tauto’ai ma tauivi mo upu taitasi. O mea faalavefau masani ma leo o tamaiti laiti na mou atu. Sa foliga mai na filemu tagata uma, ma faatalitali ia Pili.
O upu o le tatalo masani ma le puupuu o le faamanatuga na lemu, o upu taitasi na tosoina ma na fofogaina ma le maelega. I le taimi muamua, sa ou lagona le maasiasi mo le alii talavou. Sa faatumulia lo‘u loto i le agaalofa mo ia.
Ona suia lea o mea uma .
A o ia faamaeaina le fasifuaitau muamua o le tatalo—o se tatalo sa faafia ona ou faalogoina—sa oo mai se lagona fou i totonu o le potu. Sa i ai se filemu tele i o matou luga, ma sa matou iloa sa matou i ai i se nofoaga paia. Sa le na o le faitauina e Pili o upu o le tatalo ae sa tatalo faamaoni i lona Tama Faalelagi, o le sa tali mai ma se liligi lofituina o le Agaga.
Na malosi le lagonaina o le alofa o le Atua mo lenei alii talavou, ma sa matou lagonaina le faamanuiaina i le avea ai ma se vaega o lenei sauniga faaleagaga tulagaese.
Sa faaauau le tatalo a Pili ma iu ai ina maea le tatalo. Ou te lei manao e uma ona sa ou manao i lena lagona paia e faaauau pea. Ae sa faaauau pea le meaalofa malosi a le Agaga a o tufa atu le faamanatuga i le faapotopotoga. O se faafouga moni o feagaiga ia salamo, ia lelei atili, ma auauna atoatoa atu i le Alii.
I le faaiuga o le sauniga sa ou savali atu ai i le laulau o le faamanatuga e faafetai atu i le alii talavou. Sa ou vaaia e tuai lona tuputupu ae faaletino ma faalemafaufau [Down syndrome]. Sa tauto’ai lana faapea mai, “Faafetai lava,” faatasi ma se ataata.
I ni tausaga mulimuli ane i se isi uarota, sa ou manatua pea Pili. O sauniga faamanatuga ua sili atu ona anoa a o ou taumafai, ia pei o Pili, e aapa atu i le Tama Faalelagi ma se faatuatua ma se tatalo faigofie ma le faatauanau.
E alala le tusitala i Florida, ISA.