Autalavou Matutua

Faatinoina o le Faatuatua e Ui i le Masalosalo

Saunia e Claire Kennedy

A i ai ni a tatou fesili e lei taliina, e mafai ona tatou filifili le faatuatua.

Ata na pueina e Judith Ann Beck

I ni nai tausaga ua mavae, sa ou tootuli ai e tatalo mo le taimi muamua i lo‘u olaga. I le amataga o lena aso, sa faia ai la‘u uluai feiloaiga ma faifeautalai, ma sa la faasoa maia le savali o le Toefuataiga o le talalelei a Iesu Keriso ma faameaalofaina mai ia a’u i se Tusi a Mamona.

I le tuuina atu o lo‘u avanoa muamua e fesili atu ai i lo’u Tama Faalelagi i soo se fesili lava, ou te lei fesili pe moni se tasi o mea na ou faalogo i ai pe faitau i ai. Ou te lei fesili foi ia te Ia e uiga i tala fenumiai ma le faapopoleina sa ou faalogo i ai e uiga i le Ekalesia mai aganuu lauiloa.

Nai lo lena, sa ou aioi atu i le Tama Faalelagi e faamanuia au i le manao ia iloa o mea na tau mai e faifeautalai ia te au e moni.

Ma e ala i lena tatalo, sa taitaiina atu ai au i le upumoni—e faapea o le talalelei ma le Ekalesia a Iesu Keriso ua toefuatai moni mai i le lalolagi.

Faalolotoina o le Faatuatua

Sa faamatalaina e Peresitene Russell M. Nelson o le faatuatua “o le mana silisili ua avanoa mo i tatou i lenei olaga.” ¹ Po o le a lava le taimi na tatou auai ai i le Ekalesia a Iesu Keriso, e foliga mai sa i ai ni a tatou fesili po o ni nai masalosaloga na faalavelave i lo tatou gafatia i le mauaina o lena mana o le faatuatua na faamatalaina e Peresitene Nelson.

Ae o fesili e le tatau ona faatapulaa ai lo tatou faatuatua. O fesili e mafai ona avea ma ni poloka fausia matagofie faaleagaga e faamalosia ai a tatou molimau pe afai tatou te taliaina o ni avanoa e faalolotoina ai ma faatino ai lo tatou faatuatua.

O laasaga nei e lima na fesoasoani ia te au e tuuina mai ai le faatuatua e ui i masalosaloga i taimi o le tele o fesili:

1. Amata i le Manao

O le tatalo sa ou faia ina ua uma le feiloaiga ma faifeautalai o la‘u tatalo muamua lea, ae e mautinoa lava e le o la’u tatalo mulimuli lea. O le fesili sa ou faia na faia ai se eseesega tele i la‘u sailiga o le faatuatua—na amata i lo’u manao faatauvaa e talitonu. O le tatalo mo le manao ia talitonu e faateleina ai lo tatou faatuatua lea e mafai ma o le a taliina ai a tatou fesili (tagai Alema 32:27).

2. Malamalama i Lou Faasinomaga

O le upumoni sili ona taua ia iloa pe a tatou sailia tali ma le faatuatua sili atu o le iloa lea o i tatou o ni fanau alofagia tele a ni matua faalelagi. E naunau le Atua i le mea e sili ona lelei mo tatou. E finagalo o Ia e taitai ia i tatou. O le malamalama i la tatou sootaga ma le Tama Faalelagi ma Iesu Keriso e fesoasoani tatou te mananao ai e tuufaatasia o tatou loto ma o La‘ua finagalo ma iloa ai po o a fesili e fai atu.

3: Ia Onosai

Ua ou fesiligia le tele o fesili e ala i le tatalo, ma ua ou mauaina tali i na fesili uma—e tusa lava pe o tali o ni savali faigofie ma faamafanafana mai le Agaga e tau mai ai ia te au ia maua le onosai. Atonu tatou te le mauaina ni tali tuusao i le taimi lava lena pe i lenei foi olaga. O nisi taimi tatou te manaomia se taimi e tuputupu ae ai ae tatou te lei saunia e faalogo i tali. Ae “tatou te le tau sailia ni tali i fesili uma ina ia maua ai se molimau ma tutu atu o se molimau o le upumoni.” ² O le a saunia e le Tama Faalelagi tali i Lana taimi atoatoa.

4. Tuu Atu le Mana i le Faatuatua—Ae Le o le Masalosalo

I masina na sosoo ai ma la‘u feiloaiga muamua ma faifeautalai, sa ou feagai ai ma le tetee ma fesili na faamata’uina ai la’u molimau fou. Sa ou tatalo mo le manao ia le na o le talitonu i le Atua ae ia talitonu ia te Ia. Nai lo le taulai atu i o tatou masalosaloga po o fesili, e mafai e le Tama Faalelagi ona tuuina mai ia i tatou avanoa e “faaaoga ai sina faatuatua itiiti” (Alema 32:27). E oo mai nei avanoa pe afai tatou te faatuatua ma faatuatuaina o Ia nai lo le saili mo mafuaaga e masalosalo ai ia te Ia. E pei ona aoao mai Elder Dieter F. Uchtdorf o le Korama a Aposetolo e Toasefululua, “Masalosalo i ou masalosaloga ae e te lei masalosalo i lou faatuatua.” ³

5. Filifili e Talitonu

Afai e i ai ni au fesili o loo faapopoleina ai oe, aua le tuuina ou atugaluga i luga o le fata ina ia taatitia ai pea ma faateleina. Faatino i le faatuatua. Saili ma le mataalia ia tali. Na fautua mai Peresitene Nelson: “Afai e i ai ni ou masalosaloga … filifili e talitonu ma tumau i le faamaoni. Avatu au fesili i le Alii ma i isi puna faatuatuaina. Suesue ma le manao ia talitonu. … Taofi le faateleina o ou masalosaloga e ala i le talanoaina ma isi tagata masalosalo. Faataga le Alii e ta’ita’i oe i lau malaga o le sailiga faaleagaga.” ⁶

Ia naunau e tuu atu ia te Ia e taiala oe. Atonu e tatau ona e faatali mo ni tali pe talia tali mai le Tama Faalelagi lea e le o mea tonu ia sa e faamoemoeina. Ae po o fea lava e te i ai i lau malaga o le faatuatua, o le a taialaina oe e le Tama Faalelagi ma tuuina atu ia te oe le olioli a o faaauau pea ona e filifili e talitonu.

E nofoClaire Kennedy i Montreal, Kanata, o loo galue i le pisinisi e le maua ai ni tupemamā. E fiafia o ia e taalo i taaloga, faaalu le taimi ma aiga ma uo, ma e fiafia i le tele o ituaiga eseese o aisakulimi. E faafetai o ia i le i ai o se molimau i le upumoni manino ma le taua ua faamoemoeina i tatou ia maua ai le olioli.

O Nisi Mea mo Oe!

Saili nisi tusiga mo talavou matutua i le TM Faalevaiaso , o loo maua i le Gospel Library i lalo o Mekasini po o Tagata Matutua > Talavou Matutua.

Faamatalaga

1. Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 104.

2. Foundations of the Restoration Class Preparation Material (2020), 11.

3. Dieter F. Uchtdorf, “Sau, Auai Faatasi ma i Matou,” Liahona, Nov. 2013, 23.

4. Russell M. Nelson, “Ua Toetu Keriso,” 103.