O Leo o le Au Paia o Aso e Gata Ai

Ua Matou I Ai Iinei mo Oe

Saunia e Jason Campbell, Iuta, ISA

O le a ou manatua pea talanoaga ma le alofa na fesoasoani ia te au i lau malaga faigata i le aiga.

Na faatoa uma lava se taamilosaga o ou togafitiga o le kanesa i San Diego, Kalefonia, ISA, ma sa manaomia ai ona ou alu atu i le fale, e silia ma le 600 (965 km) maila le mamao. Sa ou lelava ma tuuatoatasi, ma sa ou tatalo mo se fesoasoani ma se taitaiga.

Na ou faia le silia ma le 50 malaga faalevaiaso i San Diego mo togafitiga i le nofoaga autu o le kanesa iina, ae sa sili atu ona faigata lenei malaga ona o le faama‘i oti o le KOVITI-19. O tapulaa o le faama‘i oti na taofia ai lo’u toalua mai le malaga faatasi ma a‘u, ma sa le mafai ona ou lele i se vaalele ona sa popole a’u fomai ina nei ou pisia i le vairasi. Afai ou te ma‘i, atonu o le a ou le ola. O le alu i le taavale na o au ua na o le pau lea o le filifiliga.

Sa valaau mai lo‘u toalua ma lo’u tina. Sa la popole uma mo a‘u. O le a avea o se po umi.

Ina ua iloa e lo‘u uso o auaunaga, o Uso Brough, sa ou i ai i San Diego ma o le a ou tietie agai atu i le fale, sa popole foi o ia. Sa ia valaau mai e siaki a‘u ona faatulaga lea o se valaau feauauai i telefoni. Sa ia talosagaina nisi o le matou korama a toeaina e auauai e valaau ma talanoa mai ia te au mo se itula. O a latou valaau o le a maua ai sesi ma te toalua, ala ai pea, ma mataala.

I le taimi o la‘u malaga e 10 itula, sa ou fiafia i le mafutaga a nei uso lelei a o latou talanoa mai ia te au. O le taimi lava e uma ai valaau taitasi e taitasi itula, matou te taufai faatofa ai. Ona toe tatagi lea o la‘u telefoni, ma ou te tuuina ma le fiafia le valaau fou i luga o le sipika telefoni o le taavale.

A o ou faafetai atu i valaau taitasi, e masani ona latou fai mai, “Ou te fiafia i le mafai ona ou fesoasoani atu. Ua matou i ai iinei mo oe, Uso.”

O le manatuaina o le agalelei o nei uso lelei o e na faaalu se itula mai o latou po e taiala ai au ma le saogalemu i le fale e maligi ai pea o‘u loimata. Sa o se po umi lava, ae o le a ou manatua pea a matou talanoaga ma le alofa na faaali mai e nei uso ia te au.

O loo tatou i ai uma i se malaga umi, o nisi taimi o se malaga faigata e toe foi atu i lo tatou aiga faalelagi. Tatou te manaomia uma ni tagata lelei e uunaia i tatou i luga o le ala.

Ou te faafetai mo le toatele o tagata o e na tatalo mo lo‘u aiga ma a’u, auauna mai ia i matou, ma alolofa ia i matou i le taimi o la‘u taua umi ma le kanesa—aemaise lava uso i la’u korama a toeaina o e sa auauna mai, lagolagoina, ma taialaina i matou i laasaga uma o le ala (tagai Mataio 25:35–40).