2022
AO Iesu Keriso O Lo Tatou Faaola
Aperila 2022

“O Iesu Keriso O Lo Tatou Faaola,” Liahona, Ape. 2022.

Mo Matua

O Iesu Keriso O Lo Tatou Faaola

tina o loo savavali ma le atalii

Matua Pelē,

O le lomiga o lenei masina e mafai ona fesoasoani ia te oe e aoao ai lau fanau e uiga ia Iesu Keriso o lo latou Faaola patino ma le taua o Lana Togiola, e pei ona aoao mai e perofeta o le Feagaiga Tuai. E mafai foi ona e faaaogaina manatu iinei e fesoasoani ia te oe e amata ai talanoaga e uiga i Poloaiga e Sefulu ma le taua o le mulimuli i auauna filifilia a le Alii.

Talanoaga o le Talalelei

Aoaoga o le Feagaiga Tuai e uiga i le Togiola a Keriso

Faitau pe faapefea ona faasino atu le Feagaiga Tuai i le Togiola a Keriso i le itulau e 40. Fai se lisi o faataitaiga na tuuina mai o le Togiola a le Faaola i le Feagaiga Tuai.

O perofeta, e aofia ai i latou i le Feagaiga Tuai, na molimau mai ia Iesu Keriso ma Lana Togiola. Talanoa ma lou aiga pe faapefea ona tumau pea le matafaioi a perofeta i aso nei. Na faapefea ona molimau mai talu ai nei le perofeta e uiga ia Keriso?

Usitai i Taitai o le Ekalesia

Faitau le tusiga a Elder Duncan o loo i le itulau e 44 e uiga i le faalogo ma usitai i taitai o le Ekalesia. Talanoa ma lou aiga pe aisea e taua ai lo tatou mulimuli i fautuaga ua tuuina mai ia i tatou mai o tatou taitai. Atonu e valaaulia lou aiga e taaalo i se taaloga o le “Fai mai Simona” e faapupula ai lenei mataupu faavae.

Lagolago mo leSau, Mulimuli Mai ia te A’u

Tagai i le itulau 48 mo se faatusatusaga i le va o faatusa o le Paseka muamua ma le Togiola a Iesu Keriso e lagolago ai suesuega faalevaiaso o le Sau, Mulimuli Mai ia te A‘u a lou aiga.

Mea Malie Faaleaiga o leSau, Mulimuli Mai ia te A’u

Tutu Filemu ma Ia Faatuatua

Esoto 14–17

atatusi o Mose o loo faaloaloa le tootoo ma le Sami Ulaula o loo vaeluaina

Faatasi ai ma le fesoasoani a le Alii, na taitai ai i fafo e Mose le fanauga a Isaraelu mai Aikupito. Sa latou fefefe ona sa latou lavelavea i le Sami Ulaula ma sa tuliloaina i latou e le autau a Farao. “Ona tali atu lea o Mose i le nuu, Aua tou te fefefe, a ia outou laulau tutu ma vaai atu i le olataga mai ia Ieova” (Esoto 14:13).

  1. Faaali atu se ata o le vaeluaina o le Sami Ulaula. Faitau faatasi le Esoto 14:21–29. Matau faatinoga o loo i na fuaiupu.

  2. Faatino le vaeluaina o le Sami Ulaula, e faaaoga ai faatinoga o loo i luga. Taaalo seia maua e tagata uma se avanoa e faatino ai vaega latou te mananao ai.

Talanoaga: Na faapefea ona faaaoga e le fanauga a Isaraelu le faatuatua e ala i le faia o le mea na poloai mai ai le Alii? E mafai faapefea ona tatou faatinoina le faatuatua pe a tatou feagai ma luitau i o tatou olaga?

Faaaogaina o Poloaiga e Sefulu i o Tatou Olaga

Esoto 20

Faitau Tulafono e Sefulu (Esoto 20:3–17). Na tuuina mai e le Atua nei tulafono ia Isaraelu e fesoasoani ai ia i latou ia tuputupu ae faaleagaga ma ola i ni olaga sili atu ona lelei. O loo maua foi poloaiga i le Tusi a Mamona (tagai Mosaea 13:11–24) ma i le Mataupu Faavae ma Feagaiga (tagai i le 42:18–29; 59). E mafai faapefea ona fesoasoani poloaiga ia i tatou i aso nei?

  1. Lisi Tulafono taitasi e Sefulu i ni fasipepa eseese.

  2. Tuu atu i le aiga e nonofo i se lio ma tuu poloaiga i le ogatotonu.

  3. Tuu atu i tagata taitoatasi e faitau se poloaiga ma fai atu pe faapefea ona fetaui i se tasi o vaega nei:

    • O poloaiga 1–4 ua aoao ai i tatou e uiga i le alofa i le Atua.

    • O poloaiga 5–10 ua aoao ai i tatou e uiga i a tatou sootaga ma fegalegaleaiga ma isi.

  4. O le tele o poloaiga ua ta‘u mai ai ia i tatou mea e le tatau ona fai. Tuu atu i tagata taitoatasi o le aiga e mafaufau i se faatinoga lelei mo poloaiga taitasi.

Talanoaga: Mafaufau i ni auala ua faaaafia ai e Tulafono e Sefulu lou olaga ma le aganuu o loo e ola ai. O le a se mea e mafai ona tatou faia e manatua ai poloaiga ma mulimuli ai?