“E Le Tuua Toatasi,” Liahona, Ape. 2022.
O Leo o le Au Paia o Aso e Gata Ai
E Le Tuua Toatasi
O le tagata ma‘i o se tagata ese ia te au ae le o le Tama Faalelagi.
Ata tuufaatasi mai le Adobe Stock ma Janae Bingham
E toaono i matou o faifeautalai Pasila na faatoa tulaueleele i Atenitina ma na faatalitali i ni malaga i a matou misiona. O le taimi lava na matou ulufale atu ai i le eria faatalitali mo le malaga ese atu, sa matou mananao e pue ni ata o le malaevaalele faatasi ma le aai e fai si mamao atu ma le vaai. A o o atu le isi toalima e pue ni ata, sa ou nofo latalata ane e vaavaai a matou ato.
Ina ua latou toe foi mai, sa ou tilotilo solo ma vaaia se nofoaga lea sa ou manao e pue ai se ata. “Ou te vave mai lava,” sa ou fai atu ai i isi.
Ina ua uma ona ou pueina le ata, sa ou faalogo i se tasi o valaau mai, “Elder.” Sa vave ona ou tilotilo solo ae ou te lei vaai i se tasi. Ona toe oo mai lea o le valaau mo le taimi lona lua: “Elder.”
Ina ua ou toe tilotilo solo, sa ou vaaia se toeaina matua o nofo i luga o se nofoaumi lata ane. Ina ua ou latalata atu ia te ia, sa ia fai mai, “Elder, ou te fia maua se faamanuiaga faaleperisitua mo e mama‘i.”
Sa faateia a’u i lana talosaga. O se tamā ou te lei feiloai lava i ai na talosaga mai ia te au mo se faamanuiaga i lo‘u aso muamua i se atunuu e tau le mafai ona ou tautala ai i le gagana.
I le taupanupanu i le faaSipaniolo, sa ou fesili atu ai ia te ia ni nai fesili: “E i ai sou faatuatua? E te talitonu i le mana o le perisitua? E te silafia Le Ekalesia a Iesu Keriso o le Au Paia o Aso e Gata Ai?”
I le le mautonu ai i a‘u fesili, sa ia tali mai ai, “O a’u o se tagata o le Ekalesia, Elder. Ou te sau mai Salta, i matu. Ua tuua na o a‘u, ua ou ma’i, ma ou te manaomia se faamanuiaga.”
Sa ou alu e aumai isi faifeautalai. Sa ma faailoa atu i maua lava ma talanoa i le tamā mo se minute. Ona ma aveina lea ma la‘u soa o ia i le faleletaua, lea na ma tuuina atu ai ia te ia se faamanuiaga.
I lena taimi, sa leai so‘u taimi e mafaufau tele ai e uiga i le mea na fai mai ai le tamā ia te a’u e ese mai lo le mea sa ia manaomia o se faamanuiaga. Ae mulimuli ane, o ana upu “Ua tuua na o a‘u” na matua ootia ai lo’u loto. Sa ia lagona le tuuatoatasi, ae sa ia te ia se Tama Faalelagi na silafia le mea sa i ai o ia ma sa ma‘i o ia. Nai lo le tuulafoaiina o ia, sa auina atu e le Tama Faalelagi faifeautalai e faamafanafana ia te ia, tuu atu ia te ia se faamanuiaga, ma faamanatu atu ia te ia e le o tuua na o ia.
O lena aafiaga na faamalosia ai la‘u molimau o loo i ai so tatou Tama Faalelagi e silafia i tatou ma o le a le tuulafoaiina lava i tatou.