“O le Faamanatuga: O se Auala e Manatua ai le Faaola,” Liahona, Ape. 2022.
Aoaoga autu o le Talalelei
O le Faamanatuga: O se Auala e Manatua ai le Faaola
O Le Talisuaga Mulimuli, saunia e Simon Dewey
I le po a o lumanai ai le faasatauroina o Ia, sa feiloai ai Iesu Keriso ma Ana Aposetolo i le Talisuaga Mulimuli. O iina na Ia avatu ai ia i latou le faamanatuga mo le uluai taimi. Sa Ia faamalamalama atu o se auala lea mo i latou e manatua ai o Ia. O le faamanatuga o se sauniga lea tatou te aai ai ma feinu i le areto ma le vai ina ia manatua ai le Togiolaa Keriso. O le areto o le faatusa o le tino o Keriso, ma o le vai e faatusa i Lona toto.
Tatou te tagofia le faamanatuga i Aso Sa taitasi i le taimi o le sauniga faamanatuga. Tatou te usuina se viiga a o tofitofi e e umia le perisitua le falaoa i ni vaega laiti.
O e umia le perisitua na tofitofiina le falaoa e faia ni tatalo faapitoa. O nei tatalo o loo tusia i le Mataupu Faavae ma Feagaiga 20:77, 79. O tatalo e faamanatu mai ai ia i tatou mea ua tatou folafola atu i le Tama Faalelagi ma mea ua Ia folafola mai ia i tatou.
O isi e umia le perisitua e tufaina atu le faamanatuga i tagata o le uarota po o le paranesi. A o tatou tagofia le faamanatuga, tatou te manatua le Faaola ma Lana taulaga mo i tatou. Tatou te toe tautino atu foi e tausia feagaiga (folafolaga) ua tatou osia ma le Tama Faalelagi.
Tatou te migao a o faamanuiaina ma tufatufaina le faamanatuga. O se taimi mo i tatou e mafaufau ai e uiga i le soifuaga, aoaoga, ma le Togiolaa Iesu Keriso. E mafai foi ona tatou mafaufau i auala tatou te mulimuli ai i Lana faataitaiga.