Na’o Tusiga Faatekinolosi: Sau, Mulimuli Mai Ia Te A’u
Vaai i Poloaiga o ni Faamanuiaga
Pe a tatou malamalama moni i poloaiga, e mafai ona tatou iloa o i latou o faamaoniga o le alofa sili o loo i ai i le Tama Faalelagi ma Iesu Keriso mo i tatou.
I le afa mulimuli o o‘u tausaga i le kolisi, sa ou faigaluega ai o se tagata faatonu mo le polokalame o le leitio a la‘u iunivesite. O se galuega malie ma le tele o le saolotoga fatufatuai, ae sa tele foi tulafono. O le faamatalaga lautele o la’u galuega o le faia lea o mea e faasalalau i le leitio; e ui atonu e foliga mai e faamalamalama gofie na o ia, ae o faamatalaga auiliili o le galuega sa faamaumauina i se pepa o faamatalaga atoatoa ma tele laupepa. Sa aofia ai tulafono e uiga i aga faaimeli, mea e saunia ai mo faatalanoaga, tipiina o leo, ma ituaiga uma o mea ou te le’i faalogo lava i ai.
Sa taufaafefe i le taimi muamua a o ou taumafai e manatua uma auiliiliga. Ae sa oo ina ou talisapaia lena lisi—sa fesoasoani ia te a’u e avea ai ma se tagata faatonu e sili atu ona lelei. Sa le o se lisi faasasa na taofia ai a‘u mai le faaaogaina o lo’u fatufatuai; nai lo lena, na fesoasoani ia te a’u e liliu o‘u manatu i se oloa moni, ma mae’a. Sa o se seti o taiala, na fatuina e tagata na sili atu ona iloa le galuega nai lo a’u.
Ou te fiafia e mafaufau i poloaiga i le ala lava lea e tasi. O poloaiga sili e lua—ia alofa i le Atua ma ia alolofa i o tatou tuaoi e pei o i tatou lava (tagai Mataio 22:35–40)—o se vaega o la tatou faamatalaga lautele o galuega o ni tagata i le lalolagi. O le vaega o totoe o poloaiga o ni faatonuga e sili atu ona auiliili i le auala e ausia lelei ai na sini, ua otooto mai e se Tama oi le Lagi agaalofa o le e silafia lelei le galuega.
O Poloaiga o ni Faamanuiaga
Pe a tatou malamalama moni i poloaiga, tatou te vaai i ai o ni faamanuiaga. O ni faatonuga faaopoopo na tuuina mai e le Tama Faalelagi, faatasi ai ma Lana vaaiga atoatoa, ia i tatou e fesoasoani ai ia tatou toe foi atu ia te Ia. Na faamalamalama mai e Peresitene Russell M. Nelson: “Ona e alolofa le Tama ma le Alo ia i tatou i se alofa le faatuaoia, atoatoa, ma ona ua La’ua silafia e le mafai ona tatou vaai i mea uma La te silasila i ai, ua La tuuina mai ai tulafono o le a taitaiina ma puipuia ai i tatou.” 1
Sa faapupula mai e Sister Carole M. Stephens, o le sa avea muamua ma Fesoasoani Muamua i le Au Peresitene Aoao o le Aualofa lenei manatu ina ua ia faamatalaina le tala i le tama teine a lana tama ulavale e tolu tausaga le matua, o Chloe, o le sa le mafai ona gauai e faia lona fusipau i totonu o le taavale. E ui i taumafaiga faamaoni a Sister Stephens e faamalosiau ia te ia, sa faaauau pea ona tatala e Chloe lona fusipau ma sa musu e nofo lelei i lona nofoa.
Mulimuli ane, ina ua uma ona faamatala atu i le tama teine a lana tama e faapea, o le fusipau o le nofoa e mo lona lava saogalemu, sa susulu foliga o Chloe, ma sa ia alaga atu, “Tinamatua, e te manao e fai lo’u fusipau ona e te alofa ia te a’u!” 2 E pei ona malamalama i ai Chloe, o tulafono e masani ona o mai mai se nofoaga o le alofa. E faapena le tulaga i poloaiga a le Atua.
O poloaiga o faamaoniga ia o le alofa sili o loo i ai i le Tama Faalelagi ma Iesu Keriso mo i tatou. O se avanoa foi lea mo i tatou e faaali atu ai lo tatou alolofa ma le usiusitai ia i La’ua. “Afai tou te alolofa mai ia te a’u, ia outou tausi mai i a‘u poloaiga” (Ioane14:15) o se mau tatou te faalogo soo i ai, ma o lona uiga e ootia. E pei ona aoao mai Elder Jeffrey R. Holland o le Korama a Aposetolo e Toasefululua, “O le uiga silisili o le alofa o le faamaoni i taimi uma.” 3 E mafai ona ou vaai faalemafaufau i le alofa e ona lagonaina e le Tama Faalelagi ma Iesu Keriso pe a tatou taumafai e mulimuli i a La‘ua faatonuga ma ola i se ala o le a mafai ai ona tatou toe foi atu i lo La’ua afioaga i se aso.
O le Malaga i Luma Atu
E le faapea la o lona uiga o le mulimuli i poloaiga a le Atua o le a faigofie. E tusa lava pe tatou te malamalama i le alofa o le Atua ma mafuaaga o i tua atu o poloaiga, o nisi o i latou atonu e faigata pea ona mulimuli i ai (tagai 2 Nifae 2:11; Mosaea 3:19).
Na talanoa Mose e uiga i lenei mea i le taimi lava na ia aumaia ai Poloaiga e Sefulu mai le Mauga o Sinai, ma ta‘u atu ia Isaraelu e faapea “ua afio mai le Atua ina ia tofotofo ia te outou” (Esoto 20:20). Tofotofoina o lona uiga o le faataitai po o le tofotofo (tagai i le Malaki 3:10, vaefaamatalaga c). E pei ona i ai le alofa i nei poloaiga, o i latou foi o se vaega taua o le fuafuaga a le Tama Faalelagi mo Ana fanau e “tofotofoina i latou … , e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25). O poloaiga tatou te maua ai se avanoa e faaaoga ai ma le loto i ai lo tatou faitalia, e pei ona aoao mai Peresitene Nelson, “filifili e toe foi atu ia te Ia, saunia, agavaa, maua faaeega paia, faamauina, ma faamaoni i feagaiga na osia i malumalu paia.” 4
A tatou lagona e tele mea e faapaleni ma faia, e mafai ona tatou manatua o le lalolagi, ae le o le talalelei, e fatuina faigata i o tatou olaga. Na aoao mai Elder Gary E. Stevenson o le Korama a Aposetolo e Toasefululua e faapea:
“Na ta’ua faapea o le talalelei a Iesu Keriso e “faigofie lona matagofie ma e matagofie foi lona faigofie.’ O le lalolagi e le faigofie. E faigata, lavelave, ma e tumu i fesoua’iga ma fefinaua’iga. E faamanuiaina i tatou e le Alii pe a tatou faaaoga le faautautaga ia aua nei faatagaina le lavelave, ua masani tele ai le lalolagi, e ulufale mai i le ala tatou te maua ma faatino ai le talalelei. …
“… E tatau ona tatou taumafai uma ia faafaigofie le talalelei.” 5
I na taimi pe a tatou lagonaina le lofituina i manaoga o le olaga, e mafai ona fesoasoani le manatua o poloaiga i o latou tulaga aupito faigofie: Alofa i le Atua. Alofa i lou tuaoi. Alofa ia te oe lava. O isi poloaiga uma a le Atua ia i tatou o ni faaopoopoga o nei poloaiga autu, ma le faaopoopoga o Lona alofa mo i tatou.