“Agai i Luma ina ua mavae le Tatalaina o La’u Faaipoipoga Lona Lua,” Liahona, Ape. 2022.
Agai i Luma ina ua mavae le Tatalaga o La’u Faaipoipoga Lona Lua
O se tasi o fasi fautuaga faigofie na fesoasoani ia te au e faaauau ai pea ina ua ou le iloa le isi mea e fai.
O le ata mai le Getty Images
Sa ou i ai i le pogisa atoa i le potumoe avanoa o le fale o ou matua, sa tanumia i lalo o se faaputuga o ie moega. Masalo o le aoauli po o le vaeluaga o le po; sa matuai ou leiloa lava le taimi. O mea uma sa ou umia sa lafoina i totonu o atigipusa lea ua faaputu nei i talaane o lo‘u moega. Sa tatalaina lau faaipoipoga mo le taimi lona lua i totonu o le fa tausaga, ma sa le mafai ona taulimaina.
Lāvea i le Leai o se Faamoemoe
O le mutaaga o la‘u faaipoipoga lona lua o se vaitaimi leaga tele na tumu i le popole, le mautonu, ma le nofo i faletalimalo eseese. Sa ou le iloa po o le a le mea a fai Ou te lei lagonaina le mafai ona ou faia nisi mea vagana ai le taatiatia i lalo o palanikeke ma taumafai e aua nei toe lagonaina ni lagona.
Sa ou feagai ma taimi faigata muamua, ae o le aso lenei sa ese. Sa ou le manao e alu i le lotu pe faitau tusitusiga paia—pe ou te aluese foi mai le moega. E oo lava i le tatalo na sili atu ona faigata ia te au nai lo le mea sa ou lagona na tatau ona ou ofoina atu. Sa ou taoto i le moega ma tatalo ina ia ou manao e tatalo, ma na pau lena. Sa lei sese lava na ou lāvea i le leai o se faamoemoe.
O lo‘u aiga ma isi sa popole ia te a’u sa mananao e fesoasoani, ae sa latou le iloa pe faapefea. Sa latou taumafai e faafiafia au, aumai ni meaai ia te au, po o le faamautinoa mai ia te au o le a lelei mea uma. Ae sa ou lei saunia e faalogo i lena mea. Sa toetoe lava a le mafai e soo se tasi ona fesoasoani ona ou te lei iloa foi po o le a le ituaiga fesoasoani sa ou manaomia. E ese le lagona o le lofituina pe a e iloa mea uma e tatau ona e faia e faatoilalo ai faalavefau i ou ala. Ae sa matuai ese lava mo au ina ua le mafai ona ou malamalama i le isi mea e fai.
O le tatalaga o la’u faaipoipoga muamua sa o le ta leaga tele, ma na alu ai se tausaga atoa o taumafaiga faavaivai tagata ia toe manuia ai. Ae i se isi itu, sa ou tosoina a‘u lava i luga ma sa iu lava ina mafai ona ou toe galue. Sa le faapena le tulaga i le taimi lenei. Sa leai se isi “toe amata” na i ai ia te au. O le taimi lenei sa matuai ou gaogao iī lava faalemafaufau, faalelagona, ma faaletino.
Na faafuasei lava, ona taia au i se manatuaga mai le tele o tausaga ua mavae.
“Tau Lava o le Filifili o se Mea e Tasi”
Sa ou tuua le Ekalesia a o talavou aua ou te lei talitonu e moni. Sa oo lava ina ou le toe talitonu i le Atua. Ona oo lea i le 20 ma ona tupu o o‘u tausaga, sa ou maua ai se aafiaga o le liua, ma sa ou iloa e moni le Ekalesia. Ou te manatua le lagonaina o le fiafia i le iloaina o le moni o le talalelei. O lena fiafiaga sa na o se minute le umi ona liua lea o le le mautonu i le mea moni e faapea, o le a manaomia e lo’u olaga atoa se suiga tele ona o lo‘u liua. E faapefea ona e suia toetoe o mea uma e uiga i lou olaga ma avea ma tagata e te iloa e tatau ona avea ai oe?
I lena aso i le 20 ma ona tupu o o‘u tausaga, sa ou valaau atu ai i lo’u tamamatua. Sa ou iloa e mafai ona ou faatuatuaina lana taitaiga i lenei faafitauli. Sa faalogo o ia i o‘u atugaluga e uiga i le ala e suia ai lo’u olaga atoa ina ua ou le mautinoa pe faapefea ona faia. Ona ia fai mai lea, “Tau lava o le filifili o se mea se tasi. Filifili se mea se tasi, galue i le mea lena, ma a e sauni loa, filifili se isi mea. Pau lena o le mea e tatau ona e faia.”
Ou te le iloa le mea sa ou faamoemoe e faalogo i ai, ae sa le o le mea lena. Sa manaomia ona sili atu lou lelei nai lo le mea na ou i ai, ma sa ou manatu o le suia o se mea e tasi i le taimi o le a le lava lea. Ae i se isi itu, i sina taimi puupuu o le matua faaleagaga, sa ou filifili ai e mulimuli i lana fautuaga. Faatasi ai ma le anoanoai o suiga sa feagai ma au i lena taimi o le toe foi mai i le Ekalesia, o le a se mea e tasi e tatau ona ou filifilia muamua? O le mamafa o lenei lisi ua tatou iloa uma (alu i le lotu, faitau tusitusiga paia, tatalo, totogi le sefuluai, auauna atu i se valaauga, ma isi mea faapena.) sa matuai lofituina lava.
Sa tele naua mea sa ou iloa o le a ou tauivi e sui, ma ou te lei lagonaina le lava o le malosi e taulima ai i latou. O lea sa ou filifili ai e filifili se mea e mafai ona ou faia—o se mea taua ae laitiiti. O le a tuu ai au i le ala sa ou manao ia ou i ai, ma o le a mafai ona ou fausia i luga o lena manuia.
Lea Fuaitau i luga o Lea Fuaitau
I ni tausaga mulimuli ane, ina ua leai so‘u malosi e faia ai se tatalo faigofie ina ua uma le tatalaina o la’u faaipoipoga lona lua, sa aumaia e le Agaga Paia lena manatuaga i lo‘u mafaufau.
A o faaauau pea ona ou taoto e aunoa ma se minoi i totonu o le faapuloulou o ou ie moega ma manatua lena fautuaga, sa ou iloaina sa tuuina mai e le Agaga ia te au le taitaiga e mafai ona ou faaaogaina i lou tulaga o i ai nei. Atonu e mafai ona ou faia se mea se tasi. Sa lei faapea o se mea telē; ae tau lava o se mea. O le mea muamua lava sa manaomia ona ou faia o le aluese mai le moega. O le mea lena na ou faia—ina ua mavae ni nai minute, sa ou atoina ese ia palanikeke ma tu i luga. Ona ou toe maulu lea i lalo o palanikeke. Ae sa le afaina lea aua sa ou faia le mea e tasi na ou filifilia. Sa ou tausia lena mea o la‘u sini mo ni nai aso a o lei filifilia le isi mea e sosoo ai, ma sa faaauau pea ona ou atiae i luga o lena mea.
Ua ou malamalama nei o le taitaiga a Tamamatua sa sili atu nai lo na o se fautuaga lelei. Ua aoao mai tusitusiga paia, “Aua faauta, ua faapea ona fetalai mai o le Alii le Atua: Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti ii ma sina mea itiiti i o; ma e manuia lava i latou o e e faalogologo i a’u mataupu, ma ua’i mai o latou taliga i la’u fautuaga, ona o le a latou aoaoina le poto; ona o ia o le na te taliaina o le a Ou tuu atu atili i ai” (2 Nifae 28:30). Sa ou faataitaia aua sa ou faatuatuaina lo‘u tamamatua. E aoga aua o se mataupu faavae o le talalelei. O le aoao i auala e faaleleia atili ai e ala i le suia o le mea e tasi i le taimi o le auala lea tatou te aoao ma tuputupu ae ai.
E masani lava o le tulaga lea o le tala lea o le a ou ta‘u atu ai ia te outou le maoae o lo’u olaga i le asō. O le mea moni ua faasolo lelei mea uma, ae e le na o le pau lena o le manatu. O le manatu o le. sa faamoemoe le Alii ia na ona ou faia le mea sili ou te mafaia i taimi taitasi faatasi ai ma Lana fesoasoani. Sa ia malamalama i nisi o aso o le mea sili ou te mafaia na maua moni ai le malosi e alu ese ai mai le moega. E pei ona aoao mai Elder Dieter F. Uchtdorf o le Korama a Aposetolo e Toasefululua: “O le a ave oe e le Atua i le tulaga o e i ai i lenei lava taimi ma amata ona galueaiina oe. Pau lava le mea e te manaomiaina o se loto naunau, o se manao ia talitonu, ma le faalagolago i le Alii.” 1
Sa ou lagonaina le alofa ma le taliaina mai lo tatou Tama oi le Lagi. O la‘u taulaga e faaauau pea ona faaleleia au lava i lea fuaitau i luga o lea fuaitau e taliaina e Ia. O le taumafaiga, po o le a lava le le atoatoa, e taliaina lava pe afai o lau taumafaiga sili lea. Na aoao mai Gordon B. Hinckley (1910–2008): “Fai le mea sili e te mafaia. Pau lena o le mea matou te ole atu ai ia te outou. … E le o faamoemoe mai le Alii ia te oe e faia ni mea e sili atu nai lo lena. Ia faia le mea aupito sili e te mafaia.” 2 Ou te lei tau kiina se ki ma suia atoa i le po. Tatou te alualu i luma i lea fuaitau i luga o lea fuaitau.
Pe o ou taumafai ia lelei atili i le auauna atu ia i latou o siomia au pe na o le taumafai e tu i luga, e taua lo‘u taumafai.
O Le a I Ai Le Alii Iina
Mai au taumafaiga e toe faaleleia mai faaipoipoga e lua na tatalaina—ma mai isi mea uma na luitauina ai au e le olaga—ua ou aoaoina ni lesona autu se lua. Muamua, e fiafia le Alii i taumafaiga faamaoni o soo se ituaiga. 3 Lona lua, o le a faafetaui oe e le Alii i le mea o e i ai. Po o fea lava o e i ai i luga o le ala i le toe faaleleia ma le faamalologa, afai o loo e i ai i lena auala, o le a i ai o Ia iina.
Ona ua tauaveina e le Faaola i Ona lava luga o tatou tiga ma faanoanoaga uma, ua Ia silafia ai mea tatou te manaomia e tusa lava po o le a. E tusa lava pe tatou te le iloaina e i tatou lava, e silafia e Ia. Ma o le a Ia fesoasoani ia i tatou e agai i luma.
E masani ona ou faalogo i isi o faaalia lo latou lotofaafetai mo luitau i o latou olaga. Ou te fia lagona le faafetai mo faigata. E le o a‘u lena tagata, ae i le taimi nei, o la’u mea lena e tasi. O loo ou galue i lena mea, ma a ou sauni, o le a ou filifilia se isi.
E alala le tusitala i Iuta, ISA.