“O Le Tali i le Togalaau,” Liahona, Ape. 2022.
O Leo o le Au Paia o Aso e Gata Ai
O Le Tali i le Togalaau
Ou te lei iloaina muamua, ae o le tali i lau tatalo sa tu tonu lava i o‘u luma.
Ata pue mai faaaloaloga a le tusitala (taumatau, ma Sister Lim i le agavale)
Talu ai nei sa matou faia ai ma nisi o faifeautalai i le Siteki a JeonJu Korea se togalaau fugalaau i le faitotoa e agai atu i lo‘u fale mautotogi. I se tasi taeao ae ou te lei alu i lau togalaau, sa ou ole atu i le Tama Faalelagi e faamanuia au e faaaoga le togalaau e maua ai se uo fou o se ua saunia e faalogo i le talalelei. I lena aso a o ou galue ai i le togalaau, sa sau ai se tamaitai.
“O loo ou sailia le lotu lea e i luga ae o se supamaketi lata mai,” o lana tala lea. “E te iloa le mea e mafai ona ou mauaina ai?”
“Ou te le iloa lena lotu,” sa ou tali atu ai.
Sa faaauau ona savali o ia ae na toe foi mai i le 30 minute mulimuli ane.
“Ua ou faalogo o loo i ai se lotu i se mea lata mai inei,” o lana tala lea. “Sa ou siitia mai i lo‘u fale mautotogi i ni nai aso ua mavae, ma o loo ou saili mo se lotu e auai.”
O le taimi lava lena, na ou iloaina ai. O ia o le tali i la‘u tatalo. Sa ou iloa ai sa siitia mai o ia i le fogafale lava lea e tasi o le fale mautotogi lea ma te nonofo ai ma lo‘u toalua.
O le aso na sosoo ai sa ma feiloai ai i se eria taalaelae i tua atu o le togalaau. Mo le silia ma le tolu itula, sa ma fefaasoaai ai ma Lim Bo Nam i o maua olaga. I le faatinoina o se lagona malosi, sa ou faasoa atu ai nisi o o‘u talitonuga o se sui O Le Ekalesia a Iesu Keriso o le Au Paia o Aso e Gata Ai. Sa ou tau atu foi ia te ia e uiga i sauniga faamanatuga sa ma faia i lo ma fale i le taimi o le faama‘i pipisi o le KOVITI-19. Ona ou valaaulia lea o ia i lo ma fale ia faatasi ma i ma’ua. I le faateia ai o au, sa ia folafola mai o le a sau.
Sa ma aoaoina Sister Lim e uiga i le salamo ma le uiga o faatusa o le faamanatuga. Sa ma faasoa atu foi nisi o fuaiupu o le Tusi Paia e faatatau i le taua o le “fanau i le vai ma le Agaga” (Ioane 3:5). Sa pa‘i atu le Agaga ia te ia.
Sa faaalia e Sister Lim le agaga faafetai i le aoao ai e uiga i le talalelei moni a Iesu Keriso. Ina ua uma ona maua lesona mai faifeautalai faamisiona, sa papatisoina o ia i le aso 1 Aokuso, 2020.
I le taimi o lana uluai sauniga anapogi ma molimau o se tagata o le Ekalesia, sa ia molimau atu ai sa ia tatalo e faia ni uo i lana eria fou. I le aso na ma feiloai ai, sa ia tatalo foi po o le fea lotu e auai ai.
Ou te faafetai na tali mai le Alii i a ma tatalo uma ma faamanuiaina a‘u i le avanoa e faia ai se uo ma faasoa atu le talalelei ia te ia.