“O Tatou Faatapulaaina ea le Atua i o Tatou Olaga?,” Liahona, Ape. 2022.
O Tatou Faatapulaaina ea le Atua i o Tatou Olaga?
E le na’o le epikopo ua saunia e le Atua e fesoasoani ia i tatou i o tatou luitau.
Ata na tusia e David Green
Ina ua valaauina Marco e avea ma epikopo, o se tasi o ana faatalanoaga faatulagaina muamua sa faia ma Uso ma Sister Peña (ua suia igoa). Sa puapuagatia uma i laua mai mafatiaga e faatatau i sauaga faatautala. Na ogaoga taunuuga o lo la soifua maloloina faalemafaufau. Sa la oo muamua i ni faaipoipoga le manuia ma sa la faia le mea sili la te mafaia e tausi ai se aiga ua tuufaatasi. O luitau faifai pea faalegaluega na avea ai le ola tutoatasi o se tauiviga. Sa la mananao e o i le malumalu ae sa lei agavaa mo ni pepa faataga. O le tasi po o le isi e foliga mai o loo i ai i taimi uma i faigata.
Sa alofa Marco ia i laua, ae na vave lava ona manino mai sa la manaomia se fesoasoani sili atu nai lo le mea sa mafai ona ia tuuina atu na o ia.
Ae paga lea, sa mumusu le au Peñas e faataga le epikopo e faaaofia ai isi. I lena taimi, sa i ai se faamoemoega i le toatele o tagata o le Ekalesia, o le epikopo sa nafa ma le fesoasoani atu i tagata o le ekalesia e ala i luitau e pei o nei. E le gata i lea, sa fefe Marco nei lagona e le au Peña le pei e le taua i latou ia te ia pe afai e fai atu i se isi tagata e fesoasoani atu.
O lea na faia ai e Marco le mea sili na te mafaia. Sa ia asiasi atu. Na ia fautua atu. Sa ia taumafai e faafesootai i laua i tagata tomai faapitoa o le soifua maloloina faalemafaufau. Sa o atu Marco ma lona faletua i vasega o le ola tutoatasi faatasi ma i laua ma fesoasoani ia i laua e galulue i nisi o luitau tautupe. A o fesoasoani foi isi i le uarota, sa faaaluina e le epikopo le anoanoai o itula faatasi ma le au Peña. I le faaiuga o le lima tausaga, ua uma ona faamauina i laua, ae sa la tauivi pea ma le tele o faafitauli lava e tasi mo se taimi umi lea sa oo i ai i le taimi muamua na la asiasi atu ai ia te ia.
I le toe tepa i tua, fai mai Marco na le malamalama uma i latou ma le au Peña i le matafaioi a le epikopo. E le gata i lea, o le toatolu o i latou sa lei faatuatuaina le peresitene o le Aualofa ma le korama a toeaina e faataunuu o laua tiutetauave na atofaina mai le lagi e fesoasoani ai i tagata o le ekalesia i nei ituaiga o luitau. O le taunuuga o le latou faatapulaaina lea o faamanuiaga a le Alii i olaga o le au Peña.
Faalauteleina o La Tatou Vaaiga Mamao ma la Tatou Li‘o
E le o se tala e le masani ai. O le toatele o i tatou e vaavaai atu i lo tatou epikopo o se taitai faaleagaga o la tatou uarota. O ia o le faitaulaga sili pulefaamalumalu i le uarota ma e umia ki o le perisitua e taitai ai le galuega a le Ekalesia i le uarota. Talu ai o lana matafaioi faatusi paia e aofia ai le auauna atu o se faamasino masani, tatou te manaomia ai lana fesoasoani i mataupu e faatatau i le agavaa ma le salamo. E nafa foi o ia ma le faaaogaina o punaoa a le Ekalesia e fesoasoani ai ia i latou e le tagolima. O le mea lea e masani lava o ia o le tagata muamua lea tatou te mafaufau i ai pe a tatou manaomia soo se ituaiga o fesoasoani.
Peitai, i Le Ekalesia a Iesu Keriso o le Au Paia o Aso e Gata Ai, e le nao le epikopo le tagata ua faatagaina e le Alii e fai ma Ona sui. O le auauna atu i lalo o le taitaiga o ki o le perisitua, ua i ai i isi alii ma tamaitai o le uarota le pule ma le mana e maua ai faaaliga ma fesoasoani ia i latou ua tofia i la latou tausiga. Ua tofia peresitene o le korama a toeaina ma le Aualofa e maua le taitaiga a le Atua e fesoasoani ai ia i tatou. O isi taitai o le uarota, uso ma tuafafine o auaunaga, ma soo se tasi na tuuina atu i ai se tofiga i lalo o le pule o ki o le perisitua e galulue ai mo le Alii, e mafai foi ona tuuina atu le fesoasoani e manaomia.
“Ua i ai i peresitene o korama a toeaina ma le Aualofa le tiutetauave ma faaaliga paia ua atofaina e fesoasoani ai i tagata o le au paia,” na saunoa ai Peresitene Jean B. Bingham, Peresitene Aoao o le Aualofa. “O tagata uma ua vaetofia mo se valaauga po o e ua mauaina se tofiga i lalo o ki o le perisitua ua i ai le pule ma ua i ai le aia tatau i le faaaliga e tatau ai e galulue ai i lena tiutetauave.” 1
E alofa le Atua ia i tatou, ma e finagalo o Ia e faaaoga Lona mana e le iu e faamanuia ai i tatou (tagai Mataupu Faavae ma Feagaiga 41:1). 2 Petai, e masani lava o se isi tagata e faaauala mai ai lona taulimaina o o tatou manaoga.” 3 Pe a tatou faatapulaaina i latou tatou te faatuatuaina e fesoasoani ia i tatou, atonu o loo tatou taofia mai o tatou olaga le tele o faamanuiaga e finagalo le Atua e tuuina mai ia i tatou, aua tatou te le o ausia tulaga ua Ia faatulagaina mo le mauaina o na faamanuiaga (tagai i le Mataupu Faavae ma Feagaiga 130:20–21). 4
Faamalosia o Peresitene o le Aualofa ma le Korama a Toeaina
I le konafesi aoao ia Aperila 2018, sa fofogaina mai ai e taitai ni suiga iloga, e aofia ai le toe faatulagaina o korama o le perisitua, o le faatomuaga o le auaunaga e sui ai faiaoga o aiga ma faiaoga asiasi, ma le siitiaina o au peresitene o le Aualofa ma korama a toeaina e fesoasoani e taitai le galuega o le faaolataga ma le faaeaga i le uarota. O nei suiga na faamamafaina ai le matafaioi a peresitene o aualofa ma korama a toeaina e “tauaveina le tiutetauave autu mo le … vaavaaia ma auauna atu i tagata o le Ekalesia,” 5 faapea foi ma le galulue faatasi e taulimaina manaoga faaletino i le galulue faatasi ai ma le epikopo. 6
O nei suiga talu ai nei i le faatulagaga o le Ekalesia, aiaiga faavae, ma polokalama sa faamoemoeina, o se vaega, ina ia “fesoasoani i korama a toeaina ma Aualofa ia ogatasi a latou galuega. … Ma ua mafai ai e le epikopo ona faasafua atu isi mau tiutetauave i peresitene o korama a toeaina ma peresitene o Aualofa ina ia mafai ai ona taulai atu le epikopo ma ona fesoasoani i o latou tiute autu” i le tupulaga faia‘e i le uarota. 7
Mo Epikopo: O Le Mana o le Faasafua Atu Faalelagi
Ona e i ai tiutetauave e na o le epikopo e mafai ona faataunuuina, o le i ai o peresitene o le Aualofa ma le korama a toeaina o e ua valaauina e fesoasoani e mafai ona avea ma se faamanuiaga sili i epikopo ma i tagata o le au paia e manaomia le fesoasoani.
Mo se faataitaiga, e na o le epikopo lava e mafai ona avea ma faamasino masani e faatatau i mataupu o le agavaa. E faapena foi, ua na o ia lava e i ai le tiutetauave mo le faaaogaina o taulaga anapogi ma mea tautupe a le uarota. O loo ia umia ki o le Perisitua Arona i le uarota ma e le mafai ona tuulafoaiina ona tiutetauave mo le tupulaga faia‘e.
O le mafai ona faamatuu atu o se faamanuiaga i le epikopo faapea foi i tagata o le uarota. “E tatau i se epikopo ona avea ma se tagata tomai faasafua atu, pe o le a olopalaina o ia i lalo o le avega o ona tiutetauave po o le le fiafia i le vaaia o le tele o tiute e lei faataunuuina,” na saunoa ai Peresitene Dallin H. Oaks, Fesoasoani Muamua i le Au Peresitene Sili. 8
“E manaomia ona malamalama le epikopo e le faaitiitia ai lona taua e lenei mea,” na saunoa ai Sister Reyna I. Aburto, Fesoasoani Lua i le Au Peresitene Aoao o le Aualofa. 9 I se isi itu, o le valaauliaina o isi e fesoasoani i le galuega a le Alii o le a fausia ma faamanuiaina ai i latou e ala i avanoa e auauna atu ai. O le taunuuga lena o le galue i le suafa o le Faaola ma i Lana pule e faamanuia ai isi.
Mo Taitai: E Faapefea Ona Faia?
O tagata o le ekalesia ma taitai e tele lava ina vaai i nei faamanuiaga i uarota ia na maua ai e tagata o le ekalesia le vaaiga manino o le auaunaga ma le mea o loo galulue faatasi ai peresitene o korama a toeaina ma le Aualofa faatasi ai ma le epikopo.
“O le mea e tatau ai, o peresitene o le korama a toeaina ma le Aualofa ua tatau ona galulue faatasi i manaoga o tagata latou te talanoaina pe a latou galulue faatasi i le auaunaga,” na saunoa ai Peresitene Bingham. “Ona latou feiloai lea ma le epikopo ina ia maua se malamalamaaga ma le faamaoniga i a latou fuafuaga e fesoasoani atu.” 10
E taua le iloa a o auauna atu tagata o le uarota, ua faia le galuega. “O le auaunaga o le faatinoga lea o le talalelei,” na saunoa ai Elder Walter F. González o le au Fitugafulu. “O manaoga o tagata o le au paia e le na o le galuega a peresitene o le korama a toeaina ma le Aualofa, e pei lava e le na o le galuega a le epikopo.” 11
“O le auaunaga o le ki lea i le taulimaina o manaoga ma le faataunuuina o le galuega o le faaolataga ma le faaeaga,” na saunoa ai Peresitene Bingham. “O le auaunaga o le valaaulia lea o tagata e o mai ia Keriso ma osia feagaiga o le malumalu ma Ia. O le auaunaga o le auala lea tatou te faailoa ai manaoga ma malosiaga o tagata o le ekalesia a o tatou lagolagoina i latou i le ola ai i le talalelei ma ia ola tutoatasi. 12
E Le o le Iuga
E lei leva ona faamalolo Marco o se epikopo, ae oo mai loa le faama‘i oti. Na leai se galuega a Uso Peña, ma sa osofaia le aiga i se taamilosaga fou o faalavelave faalelagona ma tulaga tautupe. I le mulimuli ai i le fautuaga a taitai o le Ekalesia ma le tusitaulima ua toe faafouina, 13 na taulamua le peresitene o le korama a le au toeaina a Peña i le sailia o auala musuia e lagolago ai i latou. I le fefautuaai ai ma le epikopo fou, sa musuia ai e le peresitene o le korama a toeaina le uunaiga e tofia Marco e fesoasoani ia Uso Peña.
Sa i ai iina le sootaga taua o le faatuatuaina. Ma faatasi ai ma le tofiga, na tuuina atu i lalo o le pule o ki o le perisitua, sa mafai ai e Marco ona faalagolago i le mauaina o le faaaliga o le a ia manaomia e fesoasoani ai. 14
“O le a ta‘ua e nisi o se mea ese le valaauina ai o au e fesoasoani ia Uso Peña ina ua mavae le tele o le taimi ma i latou o se epikopo,” o le tala lea a Marco. “Ae o lenei tofiga ua avea ma se aafiaga filifilia mo au. O se tofiga mai le Alii le fesoasoani e fai Lana galuega. Ou te faafetai i le mafai ona fesoasoani e siitia e le gata i avega a le au Peña ae faapea foi le epikopo.