Na’o Tusiga Faatekinolosi
Saunia mo le Faamanatuga i le Vaiaso Atoa
O le mulimuli ia Iesu Keriso i aso taitasi e avea ai o tatou olaga o se fiafiaga.
Ata na tusia e Joshua Dennis
O se mafuaaga autu tatou te faapotopoto ai i le Sapati o le “osi a’e i luga au faamanatuga i [le] aso paia [o le Alii]” (Mataupu Faavae ma Feagaiga 59:9). O se taimi taua lenei i le aluga o le vaiaso e toe manatunatu ai ia Iesu Keriso ma Lana Togiola ma faafou ai la tatou tautinoga e ola i le talalelei ma mulimuli i le fuafuaga a le Tama Faalelagi, lea e mafai ai ona tatou toe foi atu ia te Ia.
Na saunoa Elder Jeffrey R. Holland o le Korama a Aposetolo e Toasefululua e faapea o a tatou sauniga o le Sapati i le lotu ua mamanuina e faamamafa ai “le faamanatuga o le Talisuaga a le Alii o le mataupu autu paia, ma faamamaluina o lo tatou aafiaga faalevaiaso o tapuaiga.” 1
Ae e ui lava i le taua o le faamanatuga, o nisi taimi e faalavelave ai ia i tatou le feoa’i solo o mafaufauga ma popolega i le taimi o le faatautaiga o lenei sauniga. Atonu tatou te le taulai atoa atu ai i le taua o mea o loo tatou faia.
E mafai faapefea ona tatou saunia o tatou mafaufau ma loto ina ia tapuai atoatoa atili i le Alii i le taimi o le faatautaiga o le faamanatuga? E mafai faapefea ona tatou saunia i le Aso Sa ma i le aluga o o tatou vaiaso pe a tele naua popolega ma tiutetauave o loo i luga o o tatou tauau? O manatu nei e lima mo le faia o le faamanatuga o se aafiaga e sili atu ona paia.
1. Saili e mulimuli ia Keriso i mea uma e te faia.
Na saunoa mai Elder Alfred Kyungu o le Fitugafulu e faapea: “Ina ia avea o se soo o Keriso o le tauivi lea e faaogatusa a tatou faatinoga, amio, ma olaga i le Faaola. O le mauaina lea o amio faaleatua. O le avea lea o se soo moni o Iesu Keriso.” 2
E tatau ona i ai le Tama Faalelagi ma le Faaola i le totonugalemu o o tatou olaga. O se vaega o la tatou feagaiga ia manatua pea Iesu Keriso (tagai i le Mataupu Faavae ma Feagaiga 20:77, 79), e mafai ona tatou faia le mea sili tatou te mafaia i aso taitasi e mulimuli ai ia te Ia. A tatou ola i lenei ala, e mafai ona Ia faamanuiaina i tatou; ma o le a sili atu ona saunia o tatou loto e fetagofi i le faamanatuga i aso Sapati taitasi. E oo ina faigofie atu ona taulai atu ia te Ia pe a tatou saili e ola e pei ona sa Ia faia.
2. Fai le taumafaiga ia auai i le sauniga.
Na aoao mai Peresitene Dallin H. Oaks, Fesoasoani Muamua i le Au Peresitene Sili e faapea “o le sauniga o le faamanatuga e avea ai le sauniga faamanatuga ma sauniga aupito sili ona paia ma taua i le Ekalesia.” 3 O a tatou taumafaiga i le o mai i lenei sauniga e mafai ona faia ai se eseesega.
Na faapea mai Elder Holland: “Ua uunaia tatou ia o mai vave ma le faaaloalo ia tatou sauniga, laei ma le talafeagai mo le auai i se sauniga paia. O “laei sili o le Aso Sa” ua tau galoma atu lona uiga moni i o tatou taimi, ma o le faaalia o le faaaloalo mo Ia o Lē e Ana le [sauniga] lea tatou te o mai i ai, e tatau ai ona tatou toefuatai maia lena tumasani o foligavaaia ma laei o le Sapati i soo se taimi ma se nofoaga tatou te mafaia ai.
Na ia faaopoopo mai, “Ae mo le vave mai [i sauniga], e tuu atu lava le pepa faataga ma le alofa tele mo nai tina faamanuiaina, o e e taunuu atu ma tamaiti ma tuisi ma ato a tamaiti o gasolo atu ma le le maopoopo maoae, ia ua laki foi le mafai ona oo atu i le lotu.” 4
O nisi taimi o le alu i le lotu i le Sapati e ono faigata. Ae e silafia e le Tama Faalelagi au tauiviga ma e faafofoga i au tatalo. Na te vaaia foi i au taumafaiga, ma o le a Ia faamanuiaina oe a o e sau i le lotu ma ai ma inu i le faamanatuga tusa lava pe lagona o le olaga e pei o se asiosio po o le sau i le lotu e faigata. Na saunoa mai Elder Randy D. Funk o le Fitugafulu, “Ina ia maua faamanuiaga agaalofa ua ofoina mai e [Tama Faalelagi], e tatau ona tatou galulue e talia.” 5 E fiafia le Tama Faalelagi ma le Alii i faatinoga; La te fiafia e vaai ia i tatou o taumafai i le mea sili tatou te mafaia e mulimuli ia Iesu Keriso.
3. Mafaufau i faamanuiaga mai lou vaiaso—ina ua e vaai i le aao o le Alii i lou olaga.
Na aoao mai Elder Ronald A. Rasband o le Korama o Aposetolo e Toasefululua: “O loo taitaia oe e le aao o le Alii. E ala mai i le ‘fuafuaga paia,’ ua i ai o Ia i auiliiliga iti faapea foi i mea iloga o lou olaga.” 6
Faaalu se taimi i aso uma e iloa ai le taimi na fesoasoani ai le Tama Faalelagi ma Iesu Keriso ia te oe e tuputupu a’e pe faamanuiaina. Atonu na e ausia se sini. Atonu na e mauaina se tala fiafia e uiga i se faamanuiaga faaletino. Atonu na e lagonaina le malosi e onosaia ai faigata. Po o le a lava le mea na tupu, taumafai ia manatua le Atua i mea uma ma iloa faamanuiaga paia. 7
E silafia e le Alii o tatou faanoanoaga, ma Na te silafia foi o tatou olioli. O le manatuaina o Ia i mea uma e fesoasoani tatou te faalagolago ai ia te Ia ma i le mana o le Togiola. A o le’i faavaeina le faamanatuga, sa avatu e le Faaola le “faafetai” (Luka 22:19); e mafai ona tatou maua le olioli pe a tatou mulimuli i Lana faataitaiga.
4. Mafaufau i taimi o le vaiaso na e le atoatoa ai; salamo ma fai se fuafuaga mo le faaleleia atili.
“I le sauniuniga mo le faamanatuga i vaiaso taitasi, e faaalu ai e tagata o le Ekalesia le taimi e iloilo ai o latou olaga ma salamo mai agasala. Latou te le manaomia ona atoatoa ina ia fetagofi le faamanatuga, ae e tatau ona i ai so latou agaga o le lotomaualalo ma le salamo i o latou loto.” 8
O le faamanatuga o se faamanatu faalevaiaso e salamo mai a tatou agasala. Ae o le salamo e tatau foi ona avea o se faagasologa i aso taitasi e fesoasoani ia i tatou e saunia e faafou a tatou feagaiga i le Sapati. Faaalu se taimi i aso uma e tomanatu ai pe na faapefea ona e sasi ona fai lea o se fuafuaga ma le Tama Faalelagi ma le Faaola ina ia lelei atili mo le aso e sosoo ai ma le vaiaso a sau. O lenei faagasologa faifai pea o le salamo o le a fesoasoani ia te oe e talisapaia atili ai le faamanatuga a o e lagonaina e le aunoa le mana faamama ua ofoina mai ia i tatou e ala ia Iesu Keriso ma Lana Togiola.
A o tatou saili e faaleleia atili, e mafai ona tatou manatua le mea na fautua mai ai Elder Michael A. Dunn o le Fitugafulu ina ua valaaulia i tatou ia avea ma “se pasene se tasi sili atu ona lelei” i aso taitasi: “Pe o le a aoga ni fetuunaiga laiti e galuea’i ai le ‘liuga tele’ [Alema 5:14] e te manao ai? A lelei ona faatino, e 99 pasene lo’u talitonuga o le a aogā! Ae o le lapata’iga e tasi i lea faiga e faapea, mo nai manuia laiti e tuufaatasia mo lo tatou lelei, e tatau ona i ai se taumafaiga faifaipea, i lea aso ma lea aso. Ma e ui atonu tatou te ono lē atoatoa, ae e tatau ona tatou pulunaunau ia tutusa lo tatou vilivilita’i ma le onosai. Faia lena mea, ma o le a aumaia e taui suamalie o le amiotonu faateleina le olioli ma le filemu o loo e sailia.” 9
5. Manatua o le salamo o se faagasologa fiafia, ae le o se mea faanoanoa.
Na aoao mai e Peresitene Russell M. Nelson: “E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani, i aso taitasi i le salamo. O le salamo e le o se mea e tupu; ae o se faagasologa. O le ki lea i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso.” 10
Ua silafia e le Tama Faalelagi ma Iesu Keriso tatou te le atoatoa ma o le a tatou faia uma ni mea sese. O le Togiola a Iesu Keriso tatou te maua ai le avanoa e toe foi atu ai i lo La‘ua afioaga. Ona o lenei mea, o le salamo o se faamanuiaga, ma o le faamanatuga e fesoasoani ia i tatou i lena faagasologa. Tatou te fetagofi i le faamanatuga i vaiaso taitasi ina ia mafai ona tatou toe ta’utino atu i le Alii.
Na valaaulia e Peresitene Nelson i tatou “ia fai lou Sapati ma fiafiaga a o e tapuai atu ia te Ia, taumafa i le faamanatuga, ma tausia le paia o Lona aso.” 11 A o tatou mulimuli i fautuaga a perofeta ma aposetolo ina ia talisapaia le Tama Faalelagi, Iesu Keriso ma Lana Togiola, ma le faamanatuga, o le a le na o le Sapati lo tatou fiafiaga—o le mulimuli i le Tama Faalelagi ma Iesu Keriso o le a avea ai o tatou olaga o se fiafiaga.