Jerbal In Jipan̄ an Mijenede Ekar Kōjeraam̧m̧an Mour Eo Aō N̄an Indeeo
Ij jar bwe kom̧ likao ro im jiron̄ ro im ro jinemi im jemāmi naaj lo im jeļā ekōjkan an jerbal in jipan̄ an mijenede naaj indeeo kōjeraam̧m̧an mour eo ami.
Kom̧m̧ool, Būreejtōn Nelson, kōn bar kwaļo̧k kapilōk jab eo ikkijien jerbal in mijenede.
Ro jeiū im jatū, jejjo iiō ko remootļo̧k ke ikar kōnono ilo kweilo̧k eo eļap, ejidimikij an jab em̧m̧an aō kar erre kōn māj eo ituanmiin̄ kōn juon men eo kar ņa etan macular degeneration, eo ekar jidik kōn jidik nana ļo̧k im ekar kōm̧m̧an bwe en jab em̧m̧an aō erre kōn māj jab in.
Ilo aō kar ļon̄tak kōn apan̄ in, eļapļo̧k aō kam̧m̧oolol kōn kain visōn ko jet, ekoba juon kōļmenļo̧kjeņ ekāāl kōn men ko kar waļo̧k m̧okta. Ilo aō kar reilikļo̧k ilo mour eo aō, ikar maron̄ in lo jet en̄jake ko me raar kōm̧m̧ane juon oktak eļap. Juon iaan en̄jake ko ej ekōjkan an jebal in jipan̄ an mijenede eo aō aolep raan āinwōt juon likao ilo England kar kōjeraam̧m̧an mour eo aō im ļame mejān kajjik in jetōb eo aō.
Ikar kejōkļo̧kjeņ kōn ekōjkan an kapan̄pan̄ ko an menin jeraam̧m̧an ko kar m̧ōttan Great Depression eo ilo kar 1930 ko kar tōlļo̧k n̄an juon jekjek ejerata n̄an ro jinō im jema im baam̧le eo am. Jema ekar lukkuun in leļo̧k an ilo kōjparok jikin wia kake waan ettōr eo an im rejtake juon baam̧le ilo tōre in epen me ilo juon iien ro jinō im jema raar jab etal n̄an jar.
Men̄e kōm kar jab etal n̄an iien jar ko āinwōt juon baam̧le, ekar jab bōbrae eō jān aō pād ie jet iien ippān ro m̧ōtta.
Ilo raan ko, etal n̄an juon mijen ekar juon men eo ikar ļōmņak in kōm̧m̧ane, bōtaab ekar jab juon men eo ikar kōnono kake ippān ro jinō im jema.
Ke ikar pād ilo kaļōj, jejjo ro m̧ōtta im n̄a kar jokāālet n̄an jerbali mijen ko. Loļo̧k bisop eo aō, ikar kanne peba in mijenede eo aō ilo an ro jinō im jema kar jako ilo bukwōn eo. Ke ro jinō im jema raar jepļaaktok, ikar kailbōk er kōn ennaan eo bwe em̧ōj kūr eō n̄an jerbal ilo Great Britian. Ij kam̧m̧oolol kōn rejtake eo aer elo̧udin̄din̄ kōn jokāālet in, im kōn ro m̧ōtta rem̧m̧an me raar jipan̄ eō jokāālet n̄an jerbal.
Jerbal in jipan̄ an mijenede eo aō ekar kōpooj eō n̄an erom juon ļeo pālele em̧manļo̧k im baba im n̄an wājepedik ilo pejnej. Ekar barāinwōt kōpooj eō n̄an juon jerbal in jipan̄ to̧o̧n wōt aō mour n̄an Irooj ilo Kabun̄ eo An.
Ilo Eprōļ 1985 kweilo̧k eo eļap, kar jitōn̄ eō n̄an ekōnono ilo m̧wen̄an eo an priesthood. Ikar pedped e ennaan ko aō n̄an likao ro. Ikar kōnono kōn m̧aanjabpopo n̄an jerbal āinwōt juon mijenede. Ikar ba, “Iaan aolep kaminene ikar bōk ilo jerbal ko aō ilo Kabun̄ in, ejjeļo̧k ekar ļapļo̧k an aorōk n̄an eō jān kaminene eo ikar bōk āinwōt juon elder jon̄oul ruwatimjuon iiō-dettan jerbale juon mijen aolep raan.”1
Irooj ejeļā kajjiōm̧. N̄e kwoj jerbale mijen eo am̧, kwonaaj bōk en̄jake ko me renaaj jipan̄ eok em̧m̧anļo̧k am̧ jeļā Kajjien. Kwonaaj eddōkļo̧k ilo jetōb ilo jerbal n̄an E. Ilo Etan, naaj jilkinļo̧k eok ilo ijjilōk ko n̄an jerbal n̄an ro jet. E enaaj lewaj n̄an eok en̄jake ko kōn im̧we ko jān Jetōb Kwojarjar. Irooj enaaj kōmālim eok n̄an katakin ilo Etan. Kwonaaj maron̄ kwaļo̧k bwe E emaron̄ lōke eok im maron̄ kōjatdikdik ilo kwe.
Ilo ļalem allōn̄ ko remootļo̧k, Elder Jeffrey R. Holland im Elder Quentin L. Cook, ro me raar barāinwōt jerbal āinwōt mijenede ro ilo British Isles, kar koba ippa ilo loļo̧k membōr ro im mijenede ro ilo āne aiboojoj jab in. Ke kar pād ijo, ikar kejekļo̧kjeņ ioon en̄jake ko aō āinwōt juon mijenede edik. Ij kam̧ool bwe mijen eo aō ej ijo ikar itok n̄an jeļā bwe Jema Ilan̄ im aō Rilo̧mo̧o̧r, Jisōs Kraist, rejeļā kajjiō im iakwe eō.
Ikar jeraam̧m̧an n̄an wōr ruo aō mijen būreejtōn ro rem̧m̧an, Selvoy J. Boyer im Stainer Richards, ippānļo̧k ro m̧ōttāer rewiijilepļo̧k, Glady Boyer im Jane Richards. Erre likļo̧k, imaron̄ lo em̧ool eļapļo̧k an alikkar bwe raar lōke eō im iakwe eō. Raar katakin eō gospel eo. Raar kōtmene eļap jān n̄a. Raar letok n̄an eō elōn̄ jerbal ko reppen im iien ko rem̧m̧an an ritōl n̄an jipan̄ eō n̄an eddōkļo̧k im m̧aanjabpopo n̄an juon mour in jerbal in jipan̄.
Ikar barāinwōt kejekļo̧kjeņ kōn kar kūr eō jān Būreejtōn Spencer W. Kimball n̄an tōl Canada Toronto Mijen eo ippān lio pāleō jitōnbōro, Barbara, im an ajri ro nejim kar pād ippām. Būreejtōn Kimball ekar kūr kōm n̄an jerbal ilo Eprōļ 1974 eo, ejjab to ālikin an kar kwaļo̧k ennaan eo eim̧we an mijenede kar taitōļ in “When the World Will Be Converted.”2 Ilo ennaan eo Būreejtōn Kimball ekar kōmeļeļeik visōn eo an kōn ekōjkan an gospel eo naaj kar bōkļo̧k n̄an aolepān laļ in. Ekar kūr n̄an elōn̄ļo̧k mijenede ro jān aolepān laļ in. Ekar kakeememej kōj kōn kōtmene eo an Irooj “bwe aolep likao ro reaikuj … kotak juon ainikien kakkōl n̄an ro rej pād ioon laļ in.”3 Katak eo an Būreejtōn Kimball kōn kōtmene eo n̄an likao ro n̄an jerbale juon mijen ekar erom unin kōnono in bwebwenato eo ilo im̧ōko ipeļaakin laļ in. Kōtmene jab in ejjan̄in de oktak. Ij kam̧m̧oolol bwe Būreejtōn Russell M. Nelson ekar barāinwōt kapenļo̧k kōtmene eo an Irooj kiiō jibbon̄.
Ejako de 10 iiō jān iien eo Būreejtōn Thomas S. Monson ekar kōjjeļā kōn dikļo̧k in iiō in mijenede n̄an likao ro im jiron̄ ro.4 Ilo aō kalimjōkļo̧k, un eo eļap tata n̄an oktak in ekar n̄an leļo̧k eļapļo̧k n̄an jodikdik ro juon iien em̧m̧an enaaj ukōt mour n̄an jerbal āinwōt juon mijenede.
Āinwōt juon Rijilōk an Irooj Jisōs Kraist, inaaj kiiō kūr kom̧ likao ro—im jiron̄ ro me rej kōņaan jerbale juon mijen—n̄an jino kiiō n̄an kōnono ippān ro jinemi im jemāmi kōn jerbale juon mijen. Ij barāinwōt kajjitōk ippāmi n̄an kōnono ippān ro m̧ōttami kōn jerbale juon mijen, im eļan̄n̄e juon iaan ro m̧ōttami ejjab kanooj jeļā kōn jerbal, kōketak er n̄an kōnono ippān bisop eo aer.
Kallim̧uri kom̧ make im n̄an Jemedwōj Ilan̄ bwe kom̧ naaj jerbale juon mijen im bwe jān iien in m̧aanļo̧k kom̧ naaj kajjieon̄ n̄an kōjparok wōt erreo eo an būruōmi, peimi, im ļōmņak ko ami im erreo. Ij kajjitōk ippāmi n̄an bōk juon naan in kam̧ool kōn gospel eo an Jisōs Kraist kar kōjepļaaktok.
Baba ro im m̧am̧a ro an jodikdik rein rem̧m̧an, ewōr juon ami jerbal aorōk ilo jekjek in m̧aanjabpopo in. Jino rainin n̄an kōnono ippān ajri ro nejimi kōn jerbal in jipan̄ an mijenede. Jejeļā bwe baam̧le ej kareel eo ekajoor tata ilo jipan̄ likao ro im jiron̄ ro ad kōppopo.
Eļan̄n̄e kom̧ij pād wōt ilo iiō in jerbal in jipan̄ an mijenede ak jan̄in de jerbal kōn ajedeed in nan̄inmej eo ak un ko jet, ij kūr kom̧ n̄an jerbal kiiō. Kōnono ippān bisop eo am̧, im m̧aanjabpopo n̄an jerbal n̄an Irooj.
Ij kōketak kom̧ bisop ro n̄an jipan̄ aolep likao ro im jiron̄ ro me repaake iiō in mijenede n̄an m̧aanjabpopo n̄an jerbal, im ij barāinwōt kōketak kom̧ bisop ro n̄an kile ro me ebwe aer rūtto ak rejjan̄in de jerbal. Kajjitōk ippān kajjojo likao n̄an erom juon mijenede, barāinwōt kajjojo jiron̄ me rej kōņaan jerbal.
N̄an mijenede ro rej jerbal kiiō, kom̧ em̧ool. Mijen eo ami ekar ilo tōre in ajededd in nan̄inmej eo ipeļaakin laļ in. Āinwōt juon tōprak, en̄jake in mijen eo ami ekar ejjab āinwōt en̄jake in mijen eo aō ak en̄jake ko an jabdewōt mijenede ro me raar jerbal m̧okta jān 2020. Ijeļā ekar jab pidodo. Bōtaab jekdo̧o̧n ilo iien kein reppen, Irooj ekar wōr juon an jerbal n̄an kom̧ n̄an kōm̧m̧ane, im eļap an em̧m̧an ami kar kōm̧m̧ane. N̄an waanjon̄ak, kom̧ kar kōjerbal technology ilo wāween ko rekāāl n̄an pukōt ro me repojak n̄an ekkatak kōn Jepļaaktok in gospel eo an Jisōs Kraist. Ilo ami kar niknik ilo jerbal im ekkar n̄an maron̄ ko ami, ijeļā bwe Irooj ekar m̧ōņōņō kōn kijejeto eo ami. Ijeļā bwe jerbal in jipan̄ eo ami enaaj kōjeraam̧m̧an mour eo ami.
N̄e kom̧ij rōļo̧k jān mijen eo ami, keememej bwe kom̧ij jab kōtļo̧k jān niknik ilo Kabun̄ in. Eddōkļo̧k ilo iminene ko rem̧m̧an kom̧ kar ekkatak ilo mijen eo ami, wōnm̧aanļo̧k wōt n̄an kōkajoorļo̧k naan in kam̧ool eo ami, buuļ jerbal, jar, im pokake Irooj. Kautiej bujen ko kom̧ kar kōm̧m̧ani. Wōnm̧aanļo̧k wōt n̄an kōjeraam̧m̧an im jerbal n̄an ro jet.
Ij jar bwe kom̧ likao ro im jiron̄ ro im ro jinemi im jemāmi naaj lo im jeļā ekōjkan an jerbal in jipan̄ an mijenede naaj indeeo kōjeraam̧m̧an mour eo ami. Kōm̧m̧an bwe kom̧in jeļā ilo ļōmņak ko ami im en̄jake ilo būruōmi kajoor eo an kūr in an Irooj kar leļo̧k n̄an mijenede ro rem̧m̧an nejin Mosaia. Ekar ba, “Ilo̧k … katōt naan eo aō; ijoke kom̧ naaj kōmmaanwa ilo kijenmej im ban ko, bwe kom̧in maron̄ kwaļo̧k waanjon̄ok ko rem̧m̧an … ilo n̄a, im Inaaj kōm̧m̧ane eok kein jerbal ilo peiū n̄an lo̧mo̧o̧ren an elōn̄ armej.”5
Anij en kōjeraam̧m̧an jodikdik ro an Kabun̄ in n̄an ikdeelel n̄an m̧aanjabpopo im jerbal n̄an E ej aō jar ettā, eo ij ajeļo̧k kiiō jibbon̄ ilo etan ekwojarjar Irooj Jisōs Kraist, amen.