Iakwe eo Ekwojarjar ilo Karōk eo an Jemed
Jibadbad eo n̄an katak im kakien ko an Kabun̄ in em̧ōj an jepļaaktok ej n̄an kōpooj lo̧mo̧o̧r an ajri ro nejin Anij n̄an mour ijo utiejtata ilo aibojooj eo eutiej.
Karōk eo an gospel in ej juon kwaļo̧k kōn iakwe eo an Jemedwōj Ilan̄ n̄an aolep ajri ro Nejin. N̄an meļeļe menin, jej aikuj lale bwe jen meļeļe karōk eo An im kien ko An. E ej lukkuun iakwe ajri ro Nejin bwe E eaar letok Nejin Emake Wōt, Jisōs Kraist, bwe en ad Rilo̧mo̧o̧r im Ripinmuur, n̄an en̄taan im mej kōn kōj. Ilo Kabun̄ eo an Jisōs Kraist im Armej ro Rekwojarjar ilo Raan Ro Āliktata, ewōr juon ad meļeļe ejenolo̧k kōn karōk eo an Jemedwōj Ilan̄. Menin ej letok n̄an kōj juon wāween eoktak n̄an lale jibadbad eo an mour in, ekajet eo ekwojarjar n̄an ļoore, im mejān kajjik eo indeeo an aolep ajri ro Anij.
Ij iakwe kom̧, ro jeiū im jatū. Ij iakwe aolep ajri ro nejin Anij. Ke rekar kajjitikini Jisōs, “Ewi kien eo eļap ilo kien ko?” Ekar katakin bwe iakwe Anij im ro riturid rej kien ko reļļap an Anij.1 Kien kein rej jinoin kōnke rej karuwaineneik kōj n̄an eddōkļo̧k ilo mour in jetōb n̄an kappukot iakwe eo an Anij n̄an kōj. Ij kōjatdikdik bwe aolep renaaj meļeļe kōn katak in kōn iakwe im kakien ko me Jemedwōj Ilan̄ im Nejin, Jisōs Kraist, rekar likūti ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ta eo ij ba ijin ej n̄an kalikkar meļeļein iakwe eo an Anij bwe katak im kakien ko an Kabun̄ in rekar im̧we.
I.
Naan in ekajet eo me ejjab jim̧we ilo mour in ej bwe armej ro rem̧m̧an renaaj etal n̄an juon jikin ņaetan lan̄ im armej ro renana renaaj etal n̄an juon jikin ejjeļo̧k jem̧ļo̧kin ņaetan hell. Ebōd menin ke ewōr wōt ruo jikin ko n̄an ro rejjab pokake aolep kien ko me rekkar n̄an lan̄ im naaj ekkar n̄an hell.
Ewōr juon an Jemedwōj Ilan̄ eo ej iakwe karōk em̧m̧antata n̄an ajri ro Nejin. Katak eo kar kōjepļaaktok ilo Kabun̄ eo an Jisōs Kraist ej bwe aolep ajri ro nejin Anij—ilo ejjeļo̧k kalijekļo̧k n̄an ļōmņake ijin—enaaj etal n̄an juon laļ in aiboojoj.2 “Ilo im̧ōn Jema elōn̄ jikin,”3 Jisōs eaar katakin. Kōn revelesōn eo rainin jej jeļā bwe jikin kein jilu rej pād ilo aiboojoj ko roktak jān doon. Ilo Ekajet eo Āliktata kajjojo iaad renaaj ekajet ekkar n̄an jerbal im ikdeleel ko an būruwōd.4 Moktaļo̧k, jej aikuj en̄taan kōn jerawiwi ko ad jaar jab ukweļo̧k jeni. Jeje ko rekwojarjar rej kalikkare.5 Bwe ekajet eo ad ejim̧we enaaj letok jikid ilo juon iaan aibojooj kein. Aaet, ilo ad jeļā jān revelesōn eo rainin, aolep “renaaj ekajet … , im aolep armej otemjej enaaj bōk ekkar n̄an jerbal ko an make, tōln̄an eo an make, ilo m̧ōko im̧ōn Irooj ko repojak.”6
Irooj eaar kāālet n̄an kwaļo̧k jidik oktak eo kōn ruo iaan aiboojoj in laļ ko. N̄an keidi, Irooj ekar kwaļo̧k kōn aiboojoj in laļ eo eutiejļo̧k, eo Baibōļ ej kōmeļeļeiki āinwōt “aiboojoj eo an aļ.”7
Ilo aibojooj eo an “selestial”8 ewōr jilu laļ ak jikin ko.9 Ijo eutiejtata ej mour ijo eutiejtata ilo laļ eo an selestial, ijo jenaaj erom̧ āinwōt Jemedwōj Ilan̄ im Nejin, Jisōs Kraist. N̄an jipan̄ kōj kōļapļo̧k m̧wiļ an anij raņ n̄an oktak eo ekkar n̄an kile kwojarjar eo ad ekwojarjar, Irooj eaar kwaļo̧k katak im kar letok kien ko pedped ioon kien eo indeeo. En̄in ta eo jej kwaļo̧k kake ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata kōn jibadbad eo an katak im kakien ko kar kōjepļaaki tok ej n̄an kōpooj ajri ro nejin Anij n̄an lo̧mo̧o̧r ilo aibojooj eo an selestial im, eļaptata, n̄an mour ijo eutiejtata.
Bujen ko kar kōm̧m̧ani im kōjeraam̧m̧an ko kar kallim̧ur kaki im n̄an kōjparoki ilo tampeļ ko an Anij rej kii ko. Meļeļein tampeļ ko ad kalōki ipeļaakin laļ in, eo me kumi in al eo rekar al kake. Jet rej pok kōn katak in, rejjab meļeļe ke bujen ko im kain̄i ko ilo tampeļ rej tōlļo̧k kōj n̄an bōk mour ijo eutiejtata. Ennaan in emaron̄ meļeļe kōn m̧ool eo kar kwaļo̧ke kōn laļ ko jilu raiboojoj. Kōn iakwe eo eļap an Jemedwōj Ilan̄ n̄an aolep ro Nejin, E ekar letok aiboojoj an laļ ko jet—āinwōt an Elder Quentin L. Cook kar kōmeļeļeiki inne— ko me eļapļo̧k aer aibojooj jen ad maron̄ in meļeļe.10
Pinmuur eo an Jisōs Kraist ekōm̧m̧an bwe en pidodo men otemjej. E ekar kwaļo̧k bwe Ej “kaiboojoj Jemān, im kōjparok aolep jerbal ko an Pein.”11 Bwe lo̧mo̧o̧r en bōk jikin ilo aiboojoj in laļ ko roktak jān doon. Jej jeļā jān revelesōn eo rainin bwe “aolep aelōn̄ in kiin̄ ko em̧ōj leļo̧k n̄an er juon kien.”12 Eo eaorōktata:
“Bwe e eo ej jab maron̄ pokake kien eo an aelōn̄ selestial ej jab maron̄ mour ilo aiboojoj in selestial.
“Im e eo ej jab maron̄ pokake kien eo an aelōn̄ in terrestrial eban mour ilo aiboojoj eo an terrestrial.
“Im e eo ej jab maron̄ pokake kien eo an aelōn̄ in telestial ej jab maron̄ mour ilo aiboojoj eo an telestial.”13
Ilo naan ko jet, aibojooj in laļ eo jej bōke ilo Ekajet eo Āliktata ej eletok in kien ko jej kāleti n̄an pād ilo karōk eo an Jemedwōj Ilan̄. Ium̧win karōk in ewōr elōn̄ļo̧k laļ ko me aolep ro Nejin renaaj etal n̄an juon laļ ijo renaaj “pād.”
II.
Katak ko im kakien ko an an Kabun̄ eo an Irooj em̧ōj an jepļaaktok ej mour kake m̧ool ko indeeo ilo wāween eo emaron̄ dipio ilo meļeļe wōt ilo karōk eo an Jemedwōj Ilan̄ eo ej iakwe n̄an aolep ajri ro Nejin.
Aaet, jej kautiej anemkwoj an kajjojo armej. Aolep rejeļā kōn jipan̄ ko an Kabun̄ in n̄an lōn̄aj anemkwoj in kabun̄. Kijejeto kein rej jipan̄ rie karōk eo an Jemedwōj Ilan̄. Jej kappukot n̄an jipan̄ aolep ajri ro Nejin—ejjab membōr ro wōt ad—m̧ōņōņō kōn anemkwoj eo em̧m̧an n̄an kāālet.
Ejjeļo̧k oktak, jet iien armej rej kajjitōk etke jej jilkinļo̧k mijenede ro n̄an elōn̄ laļ ko, aaet ilubwilijin oran armej in Rikūrijin ro. Rej bar kajjitōk ippād etke jej leļo̧k menin jipan̄ n̄an armej ro rejjab membōr in Kabun̄ in ijeļo̧kin leļo̧k n̄an jerbal in mijenede. Jej kōm̧m̧ani menin kōnke Irooj ekar katakin kōj n̄an kauteij aolep ajri ro Nejin āinwōt ro jeim̧ im jatūm̧, im jej kōņaan jake jōbōl eo jeraam̧m̧an ko ad ilo jetōb im kanniōk ippān jabdewōt.
Katak eo indeeo ebarāinwōt wōr ippād juon reim̧aanļo̧k eo eoktak ioon ajri ro. Kōn errem̧aanļo̧k in jej lo āinwōt m̧ōttan wōt jibadbad eo n̄an karuttoļo̧k ajri ro āinwōt m̧ōttan karōk eo ekwojarjar. Ej juon m̧ōņōņō im jerbal ekwojarjar n̄an ro rej leļo̧k kajoor n̄an bōk kūņaer ie. Kōn menin, kar kean̄ kōj n̄an katakin im dāpij wōt pedped ko im imminene ko me rej letok jekjek ko rem̧m̧antata n̄an ejaake im kam̧ōņōņōik ajri ro aolep ium̧win karōk eo an Anij.
III.
Āliktata, Kabun̄ eo an Jisōs Kraist im Armej ro Rekwōjarjar ilo Raan Ko Āliktata jeļā kake āinwōt Kabun̄ eo ej pedped wōt ioon baam̧le. Bōtaab ejjab lukkuun meļeļe aorōkin bwe baam̧le eo ad ej io̧lepen ejjab bwe n̄an jemdoon ko an mour in. Jem̧jerā ko an indeeo rej barāinwōt pedped ko n̄an tōmak eo ad. Mijen eo an Kabun̄ in em̧ōj an jepļaaktok ej n̄an jipan̄ aolep ajri ro nejin Anij epenpen n̄an ta eo Anij ekōņaan kōn mejān kajjik eo aer. Jān lo̧mo̧o̧r eo kar letok kōn Pinmuur eo an Kraist, bwe aolep ren bōk mour indeeo (mour ijo eutiejtata ilo laļ eo an seletial), eo jined Iv ekar kwaļo̧k “Anij ej leļo̧k n̄an aolep ro rej pokake.”14 Menin eļapļo̧k jān lo̧mo̧o̧r. Būreejtōn Russell M. Nelson eaar kakeememj kōj “Ilo karōk indeeo eo an Anij, lo̧mo̧o̧r ej men eo eaorōktata an kajjojo; [ak] mour ijo eutiejtata ej aorōk eo an baam̧le.”15
Katak eo n̄an kōj ej bwe revelesōn eo an Anij kōn mour ijo eutiej maron̄ wōt jolete jen tiljek n̄an bujen ko an m̧are indeeo ikōtaan ļeo im lieo.16 En̄in ej tokjen ad katakin bwe “ānbwinid jān doon ej juōn jōkjōk eo eaorōk n̄an kwaļo̧k kadkad in kajjojo ilo mour eo m̧okta, im kadkad in kajjojo ilo mour in, im kadkad eo ejjeļok jemļokin im unleplepin.”17
En̄in ej unin an Irooj kar kōjepļaaktok Kabun̄ in An n̄an jum̧ae social im men ko rejekkar n̄an kapen katak eo An ikōtaan juon em̧m̧aan im juon kōrā, n̄an jum̧ae oktak ko me ej kapok ak ukōt m̧ōraņ ak oktak ko ikōtaan em̧m̧aan ro im kōrā ro.
Jerbal eo emakijkij an Kabun̄ in ej dāpij jim̧we eo. Jej meļeļe. Karōk eo an Jemedwōj Ilan̄ ej kōtļo̧k bwe en wōr “jum̧ae ilo men otemjeļo̧k,”18 im jerbal eo an Setan ej n̄an jum̧ae karōk eo eaorōk. Ilo m̧ool, ej kappukot n̄an jum̧ae eddōkļo̧k eo ņae mour ijo eutiejtata kōn kakkure m̧ae, kabweer neji, ak kapok em̧m̧aan ak kōrā. Ijoke, jej jeļā bwe ilo jibadbad in ekwojarjar im karōk in an Jemedwōj Ilan̄ eo ej iakwe eban oktak. Jekjek ko ad make remaron̄ oktak, im karōk eo an Anij eaorōk, ro rej tiljek ilo kōjparok bujen ko aer naaj bōk iien em̧m̧an n̄an epenpen kōn kōjeraam̧m̧an ko kar kallim̧ur kaki.19
Juon katak eaorōk n̄an jipan̄ ej kōppopo n̄an mour indeeo “mennin letok eo eļaptata ian mennin letok ko an Anij,”20 ilo 1995 kean̄ eo an baam̧le.21 Kean̄ ko rej, ilo m̧ool, oktak jān kien ko jet kiiō, imminene ko, im jipan̄ ko, āinwōt jokwe ippān im m̧are em̧m̧aan n̄an em̧m̧aan im kōrā n̄an kōrā. Ro rejjab lukkuun meļeļe karōk eo an Jemed eo ej iakwe n̄an ro Nejin emaron̄ lale kean̄ eo an baam̧le eļap jen baj kakien in ennaan eo eaikuj in oktak. N̄an keidi, jej kapene bwe kean̄ eo kōn baam̧le ej kōmeļeļeik kain jemjerā ko an baam̧le me m̧ōttan eo aorōktata an ad eddōkļo̧k indeeo emaron̄ waļo̧k.
En̄in ej kobban katak eo ejejjet im kakien ko an Kabun̄ eo an Jisōs Kraist ekar jepļaaktok ilo Raan ko Āliktata.
IV.
Ilo elōn̄ jem̧doon ko im jekjek ko ilo mour in, eoktak adwōj mour jān doon. Āinwōt ro rikaļooraņ Jisōs Kraist ro raikuj iakwe armej ro ad, jej aikuj mour aenōm̧m̧an ippān ro rejjab tōmak āinwōt kōj. Jej aolep ro nejin Jemedwōj Ilan̄ eo ej iakwe. N̄an kōj aolep, E ekar kōjenoļo̧k mour ālkin mej im, āliktata, juon aibojooj an aelōn̄ in kiin̄. Anij ekōņaan bwe jen aolep kajjieon̄ n̄an kōjeraam̧m̧an ko An routiej n̄an kōjparok kien ko An routiej, bujen ko, im kain̄i ko, aolep ko rej jemļo̧k ilo tampeļ ko An rekwojarjar kar kalōki ilo lal in. Jej aikuj kappukot n̄an kwaļo̧k m̧ool kein an indeeo n̄an ro jet. Ak kōn iakwe eo jej likjab kake n̄an eo rituriid, ak aer wōt pepe. Āinwōt juon rikanaan ilo Bok in Mormon ekar kwaļo̧k, jej aikuj “iakwe n̄an Anij im armej ”22
Āinwōt an kar Būreejtōn Russell M. Nelson kwaļo̧k ilo kweilo̧k eo ļo̧k, Ejjan̄in kar wōr juon iien ilo bwebwenato an laļ in ke jeļāļokjeņ eo ad kōn Rilo̧mo̧o̧r eo ej lukkkun aorōk n̄an kōj make im jejjet n̄an aolep jetōb an armej. … Katak eo erreo an Kraist ekajoor. Ej ukōt mour an aolep ro rej meļeļe im kappukot n̄an kōjerbale ilo mour eo an.”23
Bwe jen aolep kwaļo̧k katak in ekwojarjar ilo mour ko ad make, ij jar ilo etan Jisōs Kraist, amen.