Mour in Rikaļoor ro Rekajoor ilo Raan Ko Āliktata
Jen lōke, ejjab būromōj, kajoor, ejjab eko̧rko̧r, tōmak, ejjab mijak ilo ad kotak meram eo an Irooj ilo raan kein āliktata.
Anemkwōj in kāālet ilo mour ej juon menin letok eaorōk n̄an kajjojo iaan ajri ro Nejin.1 Kōj jej “kōtļo̧k n̄an kāālet anemkwōj im mour indeeo, kōn Rijojomar eo an armej otemjeļo̧k, ak n̄an kāālet kōm̧akoko im mej, ekkar n̄an kōm̧akoko im kajoor eo an devil.”2 Anij eban kipel kōj n̄an kōm̧m̧an em̧m̧an, im devil eban kipel kōj n̄an kōm̧m̧an nana.3 Men̄e jet remaron̄ ļōmņak bwe mour in ej juon jiāe ikōtaan Anij im rikapo eo, jon̄an an kajoor naan an Anij, juon naan jān Rilo̧mo̧o̧r eo “im Setan eikōn̄ im ilo̧k. … Ej [ad] kajoor me rej teeje—ejjab an Anij.”4
Āliktata jenaaj madmōde jokāālet ko ad ilo mour in me jekar kāālet n̄an kōm̧m̧ani.5 Innām ta eo aolepān ad ļōmņak, ikdeelel, naan, im jerbal ej ba kōn iakwe eo ad n̄an Rilo̧mo̧o̧r, Rikarejeran ro em̧ōj kāālete er, im Kabun̄ eo an me em̧ōj an jepļaaktok? Bujen ko ad ilo iien eo jekar peptaij, bōk priesthood, im tampeļ eļap ke aer aorōk n̄an kōj jān nōbar ko an laļ in ak jon̄an “em̧m̧an ko” rej waļo̧k ilo mejatoto ak social media? Iakwe eo ad n̄an Irooj im kien ko An ekajoorļo̧k ke jān iakwe eo ad n̄an jabdewōt men im jabdewōt armej ilo mour in?
Rikapo eo im ro rej loore rekar kajjieon̄ aolep iien n̄an kakkure jerbal ko an Kraist im rikanaan ro an. Kien ko an Rilo̧mo̧o̧r, n̄e rejjab kōjo̧o̧li aolepāer, em̧ōj jekpen ņae ke ejjeļo̧k tokjeņ jān elōn̄ ro ilo laļ in rainin. Ribōkto bōktak naan an Anij ro me rej katakin kōn m̧ool ko me “rejjab ekkar” ekkā aer jūļo̧ki. Aaet Rilo̧mo̧o̧r eo make kar kūr e “juon armej e mattiia, im ej idaak wain,”6 kar kinaake kōn an kakkure en̄jake ko an armej im kōm̧m̧an akweel. Mōjņo̧ im akweel in jetōb “pepe ekōjkan aer naaj pukwōj An in naan,”7 im “kabun̄” eo An me rikūrijin ro jinoin rekar pād “ijoko otemjej … rej kōnono ṇae e.”8
Rilo̧mo̧o̧r im rikaļoor ro An jinoin rekar ioon jum̧ae ko jān ippāer make im jān ro jet, im jej en̄jake ejja āindein wōt. Rainin elukkuun pen n̄an peran wōt im mour kōn tōmak eo ad ilo ad jab ioon an armej ro me rej leļo̧k aer n̄an men ko an laļ in jitōn̄ kōj im kajjirere kake kōj. Lōke Rilo̧mo̧o̧r ilo ad ļoore ej menin kōjeraam̧m̧an, ak ilo iien ko jej po ilo kōnana ko im kakkure ko an ro rej errā n̄an “mōn̄ā, idaak, im lan̄lōn̄,”9 ilo katak in, ijo tōmak ilo Kraist, pokake, im ukweļo̧k rej pinej jenkwon riab eo ke Anij ej kōtļo̧k ad jerawiwi jidik kōnke E elukkuun iakwe kōj.
Ekōnono “mekarta jān [Ainikiō] make ak jān ainikien ro [rikarejera],”10 Rilo̧mo̧o̧r ekar ke jab ba bwe ilo raan ko ad bwe “iien enaaj itok n̄e renaaj dike katak eṃṃan, a kōn ṃōṃ ko aer renaaj korḷọk ro ri kaki ñan er make” im bwe elon̄ ro “im renaaj oktakḷọk lọjilñier jān ṃool, im naaj ilọk ñan bwebwenato re waan”?11 E kar jab ke būromōj ilo an ba “ejjeḷọk tokjān aer kabuñ ñan Eō, ñe rej katakin, kōn naan in katak, kien ko an armej”?12 E ekar jab ke kakkōl “jet iaami renaaj jutak, im kōnono men ko re ankeke, bwe ren kareel ro rū kaḷoor ilọkaer”?13 E kar jab ke loe “nana [naaj kar ņae etan] eṃṃan, im eṃṃan ñan nana,”14 im bwe “ro an armej ri kōjdat renaaj ro nukun”?15
Innem ak kōj? Jej aikuj ke ko̧r im mijak? Jej ke mour kōn kabun̄ eo ad kōn etale ko rem̧wūlaļ? Em̧ool jaab! Kōn tōmak ilo Kraist, jej jab aikuj mijak an armej aer jab errā ak lōļn̄o̧n̄ kōn aer luuk kōj kōn naan ko renana.16 Kōn Rilo̧mo̧o̧r ilo jōbwe eo im rikanaan ro remour n̄an tōl im kipel kōj, “wōn eo emaron̄ juṃae ņae kōj?”17 Jen lōke, ejjab būromōj, kajoor, ejjab eko̧rko̧r, tōmak, ejjab mijak ilo ad kotak meram eo an Irooj ilo raan kein āliktata.18
Rilo̧mo̧o̧r eo ekar kalikkar bwe “ro otemjej renaaj kwaḷọk Eō iṃaan mejān armej, Inaaj barāinwōt kwaḷọk er iṃaan mejān Jema. … A jabdewōt eo enaaj kaarmejjet Eō iṃaan mejān armej, Inaaj barāinwōt kaarmejjete iṃaan mejān Jema.”19
Innām, ilo an jet kōņaan juon Anij eo ej itok ilo ejelo̧k kien ko, jān lukkuun kam̧ool, ilo naan ko an Elder D. Todd Christofferson, bwe “juon Anij eo ejjab kōm̧m̧an karōk ko rejenolo̧k eoktak jān juon Anij eo ejjab mour.”20
Ilo an jejjo kōņaan kāālet ilo kien ko rej ļoori, kōj kajjojo jen m̧ōņōņō ilo ad bōke karuwainene eo an Rilo̧mo̧o̧r n̄an “mour ekkar n̄an naan otemjej ej diwōjtok jān lo̧n̄iin Anij.”21
Ilo an elōn̄ ro rej tōmak bwe Irooj im Kabun̄ eo An rej kōtlo̧k n̄an kōm̧m̧ane jabdewōt men eo [būruōmi] ej kōņaan,”22 jān lukkuun kajoor ilo im kwaļo̧k ke menin ebōd n̄an “ḷoor elōñ armej ñan kōṃṃani men ko renana,”23 kōnke “jarlepju ejjamin kōm̧m̧an ta eo ejimwe ta eo Anij emōj an ba bōd.”24
“O kwōn keememej, kwōn keememej … ekōjkan [ak ejjeļo̧k wōņāān] an jejjet kien ko an Anij.”25 Katakin er ilo alikkar remaron̄ watōki āinwōt juon jerbal in jum̧ae. Jān kautiej ilo ad kwaļo̧k ke ejjab maron̄ wōt ak eaorōk n̄an iakwe juon ajri nejin Anij eo em̧ōņōņō kōn tōmak ko reoktak jān tōmak eo ad make.
Jemaron̄ m̧ōttāik im kautiej ro jet ilo ad jab errā ilo tōmak ko aer ak kōm̧m̧an ko aer me rejjab jejjet ippān ankilaan Irooj. Jejjab aikuj kaarmejete m̧ool eo ilo ad errā im ikdelel eo an men ko imejatoto ak social media.
Zaion im Babylon rej oktak jān doon. “Ejjeḷọk armej e maroñ pokake ruo irooj.”26 Jān aolep keememej kajjitōk eo ekajoor an Rilo̧mo̧o̧r, “Etke koṃij likūt Eta, Irooj, Irooj, im jab kōm̧anm̧an men ko Ij ba kaki?”27
Jen kwaļo̧k ad iakwe Irooj kōn aolepān būruer, im make pokake.
N̄e kwoj pād ikōtaan mour in rikaļoor im laļ in, jouj im keememej bwe am̧ Rilo̧mo̧o̧r eļap iakwe ippān “jilkintok juon karuwainene … , bwe pein tūriam̧okake rej erļo̧k [n̄an kwe], im ej ba: Kom̧in ukeļo̧k, im Inaaj bōk kom̧”28
Būreejtōn Russell M. Nelson ekar katakin bwe Jisōs Kraist “enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok.”29 Ak ekar barāinwōt kajjitōk bwe “ro rej kāālet ial eo an Irooj enaaj eļļā ioon kaje.”30 Ilo “bwe eṃōj likūt er im tōllọkun kōn aer eñtaan kōn Āt eo”31 bwe iien ko ad en ļap ilo ad “kōtļo̧k Ainikien bwe en m̧oktata ioon jen ko jet jabdewōt.”32
“Im e m̧ōņōņō,” Rilo̧mo̧o̧r eo ekar ba, “jabdewōt eo e jāmin tipñōl kōn Ña.”33 Joko jet jej ekkatak bwe “aenōṃṃan eḷap ippān ro rej yokwe kien ko Aṃ: im ejjeḷọk unin ḷōkatip ippāer.”34 Ejjeļo̧k! Kiiō jān kajjitōk ippād make, “a ej pād n̄an jidik iien, im ke en̄taan ak matōrtōr ej waḷọk kōn naan eo, e ṃōkaj aō buñ?35 Ij ke ekkal pen ioon deka eo an Jisōs Kraist im rijerbal ro An?”
Ro rej ekkatak rej ba bwe mool ej juon men eo ejjab wōr, bwe ejjeļļo̧k katak ko rem̧ool. Ta eo rej kajjieon̄ in lukkuun ba bwe ejjeļo̧k jerawiwi,36 bwe “jabdewōt men eo armej ej kōm̧m̧ane [ejjeļo̧k] ruōn,”37 juon katak eo me rikapo eo ej m̧ōņōņō bwe e eo ej rijeje! Jān barāinwōt mejmejkaruo kōn oļip ko rej nuknuk in sip ko ro rej kajjieon̄ kaal tok m̧ōttan im “[ekkā aer kōjerbale] mālōtlōt eo aer n̄an kalibubuiki m̧wil ko aer make me rejjab jim̧we.”38
N̄e jelukkuun kōņaan erom̧ rikaļoor ro rekajoor an Kraist, jenaaj pukōt juon wāween. N̄e ejjab, rikapo eo enaaj kapoik kōj ilo elōn̄ wāween ko. Ak āinwōt rikaļoor ro retiljek, “jej jab aikuj joļo̧k bōd kōn tōmak ko ad ak pāāk jān ta eo jejeļā ej mool.”39
N̄an kajōm̧ļo̧ke, juon naan kōn 15 rikarejan Anij rekar jijet likū. Ilo an men ko an laļ in “ba n̄an rilolo ro, Jab lo; im n̄an ro rikanaan ro, Jab rūkaanij,”40 ro retiljek rej “kōpālpel er kōn kōjeraam̧m̧an ko jān lan̄, aaet, im kōn kien ko rej jab jet wōt, im kōn revelesōn ko ilo iien ko aer.”41
Ejjab kabwilōn̄lōn̄, em̧m̧aan rein ekkā aer erom̧ aen in bōbrae ejarōmrōm n̄an ro rej jab m̧ōņōņō ilo naan eo an Anij āinwōt an rikanaan ro kwaļo̧k kake. Ro rej kaarmejete rikanaan ro rej jab jeļā bwe “ejjeḷọk naan in rūkaanij an jeje [ko ej] jān an armej ro make ḷōmṇak” ak itok jān ankilaan armej, “a armej [raar] [kōnono jān] Anij, [kōn] an Jetōb Kwōjarjar kokōnonoik er.”42
Āinwōt Paul, armej rein an Anij rej “jab … jook kōn kōnnaan an ad Irooj” im rej an “ri kalbuuj[ro]”43 ilo wāween eo me katak ko rej katakin ejjab aer ak Eo ej kūr er. Āinwōt Piter, rej “jab kōnono men ko kōm ar loi im roñjake.”44 Ij kamool bwe Būreejtōnji eo Kein Kajuon im Doulul eo an Jon̄oulruo Rijilōk ro rej em̧m̧aan ro rem̧m̧an im rem̧ool ro me rej iakwe Anij im ajri ro Nejin im ro me je iakwe Er. Naan ko aer jenaaj bōke āinwōt jān lo̧n̄iin Irooj make “ilo aolep kōmmaanwa im tōmak. Bwe jān kōm̧m̧ani men kein aor ko an hell rej jāmin anjo̧ ņae [kom̧]; … im Irooj Anij enaaj kajjeplōklōk kajoor ko an marok jān [kōj]”45
“Ejjeļo̧k pā ettoon emaron̄ kabōjrak jerbal in jān an wōnm̧aanļo̧k”;46 enaaj m̧aaj ilo ainikien eļap ippān ak ejjab ippān kwe im n̄a, kiiō “koṃwin kāālōt rainin wōn eo koṃ naaj jerbal ñan e.”47 Lale kwar bwebwe ak leln̄o̧n̄ kōn ainikien kapo ko reļaaj rej itok jān m̧weo eļap im kilep. Ainikier ko raneļap ejjab māāje im̧we eo eaenōm̧m̧an kōn ainikien eo elur, edik ioon bōro ko rerub im jetōb ko rettā.
Ij kam̧ool bwe Kraist emour, bwe E ej ad Rilo̧mo̧o̧r im Ripinmuur, im bwe E ej tōl Kabun̄ in An jān Būreejtōnji eo Kein Kajuon im Doulul eo eo an Jon̄oulruo Rijilōk ro, aaet n̄an lukkuun kōm̧m̧an bwe jān jab “jeplōklōk āinwōt ṇo ko, im ṃakūtkūt kōn jabdewōt kōto in katak.”48
“Rikaļoor ro rem̧ool an Jisōs Kraist,” Būreejtōn Nelson ekar katakin, “rej m̧ōņōņō in jenolo̧k jān ro jet, kōnono, im oktak jān armej ro an laļ in. Rej jab mijak, rewūjlepļo̧k, im peran.”49
Ro jeiū im jatū, ej juon raan em̧m̧an n̄an em̧m̧an. Ilo āt eo ekwojarjar etan Jisōs Kraist, amen.