“Innām Inaaj Kōm̧m̧an Mennin Mōjņo̧ ko Ren Erom Kajoor”
Ilo ad kōttāik kōj make im kōjerbal tōmak ilo Jisōs Kraist, jouj an Kraist im en̄taan in pinmuur eo An ekwojarjar ej kapidodoik oktak.
Būreejtōn Thomas S. Monson juon iien ekar kwaļo̧k juon bwebwenato kōn kalbuuj an Warden Clinton Duffy. “Ilo 1940 ko im 1950 ko,[Warden Duffy] kar kanooj jeļā kajjien kōn kijejeto ko an n̄an jipan̄ kōmour em̧m̧aan ro ilo kalbuuj. Juon rikōraat eaar ba, ‘Kwoj akuj jeļā bwe leopard ko reban ukōt joko jikier!’
Warden Duffy eaar uwaak, ‘Kwoj aikuj jeļā bwe ijjab jerbal ippān leopard ko. Ij jerbal ippān em̧m̧aan ro, im em̧m̧aan ro remaron̄ oktak aolep raan.’”1
Juon iaan riab ko an Setan reļļap tata ej bwe em̧m̧aan ro im kōrā ro rejjab maron̄ oktak. Jab m̧ool in ej kwalo̧k im bar kwalo̧k ilo elōn̄ wāween ko ilo an laļ in ba bwe jejjab maron̄ oktak—ak enana, jejjab aikuj oktak. Kar katakin kōj bwe jekjek ko ad rej kalikkar wōn kōj. Jej aikuj “dāpij wōn eo lukkuun kōj,” bwe laļ in ej ba, “jen m̧ool n̄an kōj make.”
Jemaron̄ Oktak
Ilo an aorōk n̄an m̧ool n̄an kōj make, jej aikuj in m̧ool n̄an wōn lukkuun, m̧ool in kōj āinwōt ļaddik ro im leddik ro nejin Anij kōn juon paotok kwojarjar im mejākajjik n̄an erom āinwōt E.2 Eļan̄n̄e kōttōpar eo ad ej n̄an m̧ool n̄an paotok kwojarjar eo in im mejānkajjik eo, innām jenaaj aolep aikuj in oktak. Naan eo an jeje ko rekwojarjar kōn oktak ej ukweļo̧k. “Ebooļ armej ro” Būreejtōn Russell M. Nelson ekar katakin, “rej ļōmņak ukweļo̧k ej āinwōt kaje—juon men eo kajekdo̧o̧ne ijjelo̧kin wōt n̄e jekjek ko reļļap. … N̄e Jisōs ej kajjitōk ippam̧ im n̄a n̄an ‘ukweļo̧k,’ E ej kūr kōj n̄an oktak.”3
Jekjek ko an Anij
Computer software developer ro rej kōjerbal jekjek ko ilo ennaan ko n̄an ba n̄an kam̧putōr ko ta eo n̄an kōm̧m̧ane. Jet iien rej naan. Āinwōt ilo, eļan̄n̄e x ej m̧ool, innām kōm̧m̧ane y.
Irooj ej bar jerbal kōn jekjek: jekjek ko an tōmak, jekjek ko an jim̧we. jekjek ko an ukweļo̧k. Ekanooj lōn̄ waanjon̄ak in jekjek in ennaan ko jān Anij āinwōt:
“Eļan̄n̄e kwōj kōjparok kien ko Aō im niknik n̄an jem̧ļo̧k in [innām] kwo naaj bōk mour indeeo, eo ej mennin letok eo eļaptata ian mennin letok ko an Anij.”4
Ak “eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, [innām] Enaaj kwaļo̧k m̧ool in n̄an kom̧, jān kajoor eo an Jetōb Kwōjarjar.”5
Jekdo̧o̧n iakwe eo an Anij, men̄e ejjeļo̧k jem̧ļo̧kin im weppān, ej barāinwōt wōr an jekjek ko.6 N̄an waanjon̄ok:
“Eļan̄n̄e kom̧ij kōjparok kien ko Aō, [innām] kom̧ naaj pād ilo Aō yokwe; im āinwōt Iar kōjparok kien ko an Jema, im Ij pād ilo An yokwe.”7
Elder D. Todd Christofferson eaar kōmeļeļeik m̧ool in ke ekar kwaļo̧k: “Jet reminene in ba, ‘“Rilo̧mo̧o̧r ej iakwe eō āinwōt aō bar iakwe E,’ im bwe menin em̧ool. Bwe ejjab maron̄ bōk jabdewōt iaad n̄an aelōn̄ in Kiin̄ eo An āinwōt bar kōj, ‘bwe ejjeļo̧k men ettoon emaron̄ jokwe ijo, ak jokwe ilo im̧aan Mejān’ [Moses 6:57]. Jerawiwi ko rej aikuj jako m̧okta.”8
Mennin M̧ōjņo̧ ko Remaron̄ Erom Kajoor
Kōjeraam̧m̧an eo n̄an bōk kajoor eo an Anij n̄an jipan̄ kōj oktak ej ewōr an jekjek. Rilo̧mo̧o̧r eo, kōnono kōn rikanaan Moronai ilo Bok in Mormon, ekar kwaļo̧k: “Eļan̄n̄e armej rej itok n̄an Eō Inaaj kwaļo̧k n̄an er m̧ōjņo̧. Ij leļo̧k n̄an armej m̧ōjņo̧ bwe ren maron̄ ettā bōro; im Aō jouj ebwe n̄an aolep armej ro rej kōttāik er Im̧aō; bwe eļan̄n̄e rej kōttāik er Im̧aō, im wōr aer tōmak ilo N̄a, innām Inaaj kōm̧m̧an mennin m̧ōjņo̧ ko ren erom kajoor n̄an er.”9
N̄an lukkuun lale ta eo Irooj ej katakin kōj ijin, jinoin Ej ba bwe E ej leļo̧k n̄an em̧m̧aan ro im kōrā ro m̧ōjņo̧, juon jekjek, eo ej m̧ōttan wabanban eo ad jej ioone āinwōt armej rej likjab im wabanban. Jaar erom em̧m̧aan im kōrā ro ilo lukkuun piktokin kōnke Wōtlo̧k eo an Adam. Kōn Pinmuur eo an Jisōs Kraist, jemaron̄ anjo̧ ioon m̧ōjņo̧ ko ad, ak likjab ko ad.
Innām Ej ba bwe An jouj ebwe im bwe eļan̄n̄e jenaaj kōttāik kōj make im tōmak ilo E, innām E enaaj “kōm̧m̧an mennin m̧ōjņo̧ ko [elōn̄ļo̧k jen juon] ren erom̧ kajoor n̄an [kōj].” Ilo naan ko jet, ilo ad m̧okta oktak jān likjab ko ad, m̧ōjņo̧ ko ad, jenaaj maron̄ in ukōt m̧wiļ ko ad, m̧ōjņo̧ ko ad.
Men ko Aikulji n̄an Oktak
Jen etali men ko aikuji n̄an oktak ekkar n̄an jon̄ak eo an Irooj:
Juon, jej aikuj kōttāik kōj make. Jekjek eo an Irooj n̄an oktak ej ettā. “Eļan̄n̄e rej kōttāik er Im̧aō,”10 Ekar ba. Naan eo juon an ettā ej utiej bōro. Utiej bōro ej waļo̧k n̄e jej ļōmņak jejeļā men otemjeļo̧k—n̄e jej ļōmņak ak en̄jake ebōk m̧oktata ioon ta eo Anij ej ļōmņake ak en̄jake.
Kiin̄ Benjamin, ekar katakin bwe “bwe armej ilo lukkuun biktokin ej rikōjdāt n̄an Anij … im enaaj, indeeo im indeeo, … utūkļo̧k armej eo ilo lukkuun biktokin im erom juon rikwōjarjar kōn pinmuur eo an Kraist Irooj, im erom āinwōt wōt juon ajri ettā bōro, ettā, [im] ineem̧m̧an.”11
N̄an maron̄ oktak, jej aikuj utūkļo̧k armej ilo lukkuun biktokin im erom ettā im ettā bōro. Jej aikuj ettā n̄an ļoor rikanaan eo emour. Ettā n̄an kōm̧m̧an im kōjparok bujen ko an tampeļ. Ettā n̄an ukweļo̧k kajjojo raan. Jej aikuj in ettā n̄an kōņaan oktak, n̄an “kōtļo̧k būruwōd n̄an Anij.”12
Kein karuo, ej aikuj wōr ad tōmak ilo Jisōs Kraist. Bar juon alen, naan ko an Rilo̧mo̧o̧r: “Eļan̄n̄e rej kōttāik er Im̧aō, im wōr aer tōmak ilo N̄a,”13 Enaaj letok n̄an kōj kajoor n̄an anjo̧ ioon m̧ōjņo̧ ko ad. Ettā, koba ippān tōmak ilo Jisōs Kraist, enaaj kōm̧man ad bōk kajoor in kōmaron̄ eo an jouj eo An im tarlep in kōjeraam̧m̧an ko rej pād kōnke kōn Pinmuur eo An.
Būreejtōn Nelson ekar katakin bwe “ukweļo̧k eo em̧ool ej ijjino kōn tōmak bwe Jisōs Kraist ewōr an kajoor n̄an kareeo, kōmour, im kōkajoorļo̧k kōj. … Ej ad tōmak n̄an kōpeļļo̧k kajoor eo an Anij ilo mour ko ad.”14
Kein kajilu, kōn An tiriam̧o kake E emaron̄ kōm̧m̧ani mennin m̧ōjņo ko ren erom kajoor. Eļan̄n̄e jej kōttāik kōj make im wōr tōmak ilo Jisōs Kraist, innām An tiraim̧o enaaj kōmaron̄ kōj n̄an oktak. Ilo naan ko jet, E enaaj kōkajoor kōj n̄an oktak. Emaron̄ kōnke, āinwōt An ba, “aō jouj ebwe n̄an aolep armej.”15 An jouj in kōkajoor, kōmaron̄ ej letok n̄an kōj kajoor n̄an anjo̧ ioon aolep kabbōjrak ko, aolep apan̄ ko, im aolep m̧ōjņo̧ ko ilo ad kapukōt n̄an oktak.
Mōjņo̧ ko ad reļļap tata remaron̄ erom kajoor ko ad reļļap tata. Jemaron̄ oktak im “erom armej ro rekāāl.”16 Mennin m̧ōjņo̧ ko ilo m̧ool remaron̄ “erom kajoor n̄an [kōj].”17
Rilo̧mo̧o̧r ekar kwaļo̧k Pinmuur eo An ejjeļo̧k jem̧ļo̧kin im indeeo bwe jen maron̄ ilo m̧ool oktak, ukweļo̧k, im erom em̧m̧anļo̧k. Ilo m̧ool jemaron̄ in bar ļotak. Jemaron̄ anjo̧ ioon iminene ko, an̄ūrlep ko, im em̧ool “jab bar itok wōt in kōm̧m̧an nana.”18 Āinwōt ļaddik ro im leddik ro nejin Jemād ilo Lan̄, ewōr ilo kōj kajoor n̄an oktak.
Waanjon̄ak ko kōn Oktak
Jeje ko rekwojarjar reobrak kōn waanjon̄ak ko an em̧m̧aan ro im kōrā ro rekar oktak.
Saul, juon Parisi im eo eniknik Rijilōk ekar rikakkure m̧ōnjar an Rikirijin ro jinoin tata,19 ekar erom Paul, juon Rijilōk an Irooj Jisōs Kraist.
Alma eaar juon pris ilo im̧ōn ekajet eo an Kiin̄ Noa eo enana. Eaar ron̄ naan ko an Abinadi, lukkuun ukweļo̧k, im erom juon iaan mijenede ro reļļap ilo Bok in Mormon.
Ļeo nejin Alma ekar kōjerbal iien jodikdik eo an pukōt n̄an kakkure Kabun̄ eo. Ekar ibwiljin “rikajjōjōtata in ro rijero̧wiwi”20 m̧ae iien ekar bōk juon oktak in bōro im kar erom juon mijenede eo ekajoor ilo iien eo an make.
Moses kar kōkajririki jān baam̧le eo an Pero im kar rūttoļo̧k āinwōt juon kiin̄ an Rijiept. Bōtaab ke ekar meļeļe wōn kar lukkuun e im ekkatak kōn mejānkajjik kwojarjar eo an, ekar oktak im kar erom rikanaan eo leļo̧k kien n̄an e eļap an Kallim̧ur M̧okta.21
Jim̧m̧an kōrā eo ippa, James B. Keysor aolep iien eaar kabwilōn̄ eō kōn oktak in bōro eo an ekajoor.22 Ļotak jān bainier ro an Armej ro Rekwokjarjar ilo Raan Ko Āliktata ilo Salt Lake Valley ilo 1906 e, ekar jako jinen ke ekar dik wōt im apan̄ ilo aolepān iien jodikdik eo an. Iiō in jodikdik im rūm̧man ded ko an kar jab pād ilo Kabun̄ in; ilo tōre in ekar bōk elōn̄ iien iminene ko renana. Ijo wōt ke, ekar ioon im m̧areik juon kōrā etiljek, im ippān doon raar lale ļalem ajri ro.
Ilo 1943 eo, ālikin iiō ko reppen jān Great Depression eo im ilo iien Pata eo Laļ in II, Bud, ke kar ān̄inn̄ini jān ro m̧ōttan im baam̧le eo, kar ilo̧k jān Utah im em̧m̧akūtļo̧k n̄an Los Angles, California, n̄an kappok jerbal. Ilo tōre in ekar ettoļo̧k jān m̧weo im̧ōn ekar jokwe ippān sister eo an im ļeo pāleen, eo ekar jerbal āinwōt bisop an ward eo aer.
Kōn iakwe im kareel eo an sister eo an im brother-in-law eo an, ekar jino ro̧o̧ltok itok limo eo an ilo Kabun̄ in im jino riiti Bok in Mormon kajjojo bon̄ m̧okta jān an kiki.
Juon bon̄, ke ej riit Alma jebta 34, būruwōn ekar m̧weir ke ej riiti naan kein:
“Aaet, ikōņaan bwe kom̧in wōnm̧aantak im jab kapene būruōmi ļo̧k wōt. …
“Bwe lo, mour in ej iien eo n̄an armej bwe ren m̧aanjāppopo n̄an iioon Anij; aaet, lo raan eo ilo mour in ej raan eo n̄an armej bwe ren kōm̧m̧an jerbal ko aer.”23
Ke eaar riiti eoon kein, juon en̄jake ekajoor ekar itok ioon im ekar jeļā bwe ekar aikuj oktak, n̄an ukweļo̧k, im ekar jeļā ta eo ekar aikuj kōm̧m̧ane. Ekar jerkak jān kineen im bukwelōlō im jino jar, akweļap ippān Irooj bwe en jeorļo̧k an bōd im leļo̧k n̄an e kajoor eo ekar aikuji n̄an kōm̧m̧ani oktak ko ilo mour eo an. Jar eo an ekar uwaak, im jān tōre eo m̧aanļo̧k, ekar jab bar reilik. Bud ekar wōņm̧aanļo̧k n̄an jerbal ilo Kabun̄ in im tiljek wōt, ekar juon Armej ro Rekwojarjar ilo Raan Ko Āliktata eniknik ilo aolepān mour eo an. Ekar oktak ilo aolep men. An ļōmņak, būruōn, m̧akūtkūt ko an, m̧wilin raar oktak.
Ro jeiū im jatū, mejānkajjik eo ekwojarjar im jibadbad eo ad eļap tata ej n̄an erom āinwōt Jemedwōj Ilan̄ im Rilo̧mo̧o̧r, Jisōs Kraist. Jej kōm̧m̧ani menin ilo ad oktak, im ukweļo̧k. Jej bōk nememen Rilo̧mo̧o̧r eo ilo “paoktok ko [ad].”24 Jej erom kāāl, erreeo, oktak, im jej jerbal wōt jej wōnm̧aanļo̧k wōt ilo jerbale aolep raan. Jet iien emaron̄ āinwōt ruo nee m̧aanļo̧k im juon nee liktak, ak jej wōnm̧aanļo̧k wōt n̄an bun̄ m̧aanļo̧k wōt ilo ettā ilo tōmak.
Im ilo ad kōttāik kōj make im kōjerbal tōmak ilo Jisōs Kraist, jouj an Kraist im en̄taan in pinmuur eo An ekwojarjar ej kapidodoik oktak.
Ij kamo̧o̧l bwe Jisos Kraist ej lukkuun Rilo̧mo̧o̧r im Ripinmuur eo ad. An jouj ej ilo m̧ool bwe. Ij kwaļo̧k bwe E ej “iaļ, m̧ool, im mour.”25 Ilo etan Jisōs Kraist, amen.