Kiiō Etōreen
Kiiō ej iien eo jemaron̄ in ekkatak. Kiiō ej iien eo jemaron̄ in ukweļo̧k. Kiiō ej iien eo jemaron̄ kojeraam̧m̧an ro jet.
Ro jeiū im jatū rejitōn bōro, kweilo̧k in eļap ebun̄bun̄ ilo elōn̄ wāween ko. Jekar jeraam̧m̧an kōn jar ko, ennaan ko, im al ko. Jekar bōk im̧we jān rijerbal ro an Irooj.
Jekar bōk tōl ko raorōk kōn ilju im jekļaj. Jar eo aō ej bwe Jetōb eo ekar kōnono n̄an kom̧ kaju kōn men ko Irooj enaaj kōņaan kar bwe kom̧in kōm̧m̧ani.
Ilju im jekļaj ej aolep iien jab alikkar. Mejatoto ej oktak. Ito itak in Jeraam̧m̧an ko jab maron̄ anto̧o̧ni. Kakkure ko, itaak in wa ko, im nan̄inmej ko remaron̄ m̧ōkaj aer ukōt mour. Makūtkūt kein reļļap retarjān jon̄an maron̄ ko ad. Ak elōn̄ jet men ko jemaron̄ oņaaki ekitbuuj, wāween ad karōk ad iien kajjojo raan.
Em̧m̧an ippa poem in jān Henry Van Dyke, kar likūt ilo juon sundial ilo Wells College ilo New York. Ej konono āinwōt in:
Annan̄ eo ekar kōm̧m̧an jān pā eo ejjab maron̄ em̧m̧akūtkūt ioon juon mijiin.
Kōjenolo̧k ilju jān jem̧aan:
Mokta jāne, awa eo ejjan̄in itok,
Ilo marok, im eļļā jān jon̄an kajoor.
Likin ļain eban ro̧o̧l tok,
Awa eo ad emootļo̧k, im ejako n̄an ad kōjerbale:
Kiiō annan̄ eo ej jutak kwaļo̧k ļōmņak bwe juon wōt awa ej ad n̄an kōjerbale—
Im ej awa eo KIIŌ ijo ļain in annan eo ioon mijiin eo ej jutak.1
Aaet, jej aikuj ekkatak jān tōre ko etto, im aaet, jej aikuj in m̧aanjabpopo n̄an ilju im jekļaj. Ak kiiō wōt jemaron̄ ke kōm̧m̧ane. Kiiō ej iien eo jemaron̄ in ekkatak. Kiiō ej iien eo jemaron̄ in ukweļo̧k. Kiiō ej iien eo jemaron̄ kōjeraam̧m̧an ro jet im “kotak lōn̄ļo̧k pā ko rej allitoto.”2 Āinwōt an Mormon ko̧o̧njeļ e ļaddik eo nejin Moronai, “Jān niknik jerbal; … bwe ewōr juon jerbal n̄an ad kōm̧m̧ane [kiiō] ilo ābwinnin kle in, bwe jān maron̄ anjo̧ ioon rikōjdat in aolep weeppān im kakkijeik ad ilo aelōn̄ in Anij.”3
Rikapo eo ej jāmin kiki. Enaaj wōr jum̧ae aolep iien n̄an m̧ool eo. Ij āliji naan in rōjan̄ in aō jān jibbon̄ in n̄an men ko otemjej renaaj kōļapļo̧k kajoor in jetōb eo ej im̧we jerbal eo ami em̧m̧an, n̄an wōnm̧aanļo̧k wōt jān jabdewōt kain apan̄ ko im iien ko rem̧m̧an rej itok.
Jetōb in iien eo em̧m̧an ej ļapļo̧k ilo ad kabun̄jar ilo tampeļ im bwe jeļāļo̧kjeņ im kōjeraam̧m̧an ko jej būki jān etal n̄an tampeļ eo ejelet kōj ilo aolep jon̄ak ko kōj make im kajjojo armej. Ij akweļap ippemi n̄an jum̧ae wāween ko an laļ in ilo pedped wōt ioon kōjeraam̧m̧an ko indeeo an tampeļ eo. Iien ko ami ijeņ rej bōktok kōjeraam̧m̧an ko indeeo.
Ilo an Kabun̄ in eddōkļo̧k, jej kajjieon̄ kōm̧m̧an eddōkļo̧k jān kalōk elōn̄ļo̧k tampeļ ko. En̄oulemān tampeļ ko rekāāl kiiō rej ekkaļ. Elōn̄ļo̧k rej maron̄ kōkāāli. Ij jar kōn armej rein rekapāāl ro rej jerbali būrojāāk ko ipeļaakin laļ in.
Ilo jetōb in lukkuun jar im kam̧m̧oolol, ij m̧ōņōņō in kōjjeļļā kōn karōk ko ad n̄an kalōk juon tampeļ ekāāl ilo kajjojo iaan jikin kein rej ellaajrak: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; im Modesto, California.
Tampeļ kein 17 renaaj kōjeraam̧m̧an elōn̄ mour ko jim̧or ilo jait kein ruo an rōn̄ōl eo. Ij iakwe kom̧, ro jeiū im jatū rejitōn bōro. Im eaorōktata, Irooj ej iakwe kom̧. E ej am̧ Rilo̧mo̧o̧r im am̧ Ripinmuur. Ej tōl im jineete Kabun̄ in An. Kōm̧m̧an bwe jen erom̧ juon jarlepju in armej rerreo an Irooj, eo ekar ba, “Im koṃnaaj armej ro aō, im N̄a Inaaj Anij eo ami.”4
Kōn menin ij jar, ilo āt eo ekwojarjar etan Jisōs Kraist. amen.