Būreejtōn Nelson ej Jerbal in Karejar

Kōjerbal kadiwōjļo̧k ko imejatoto an nokon im post ko ilo social media, Būreejtōn Russell M. Nelson ej wōnm̧aanļo̧k wōt ilo kajjitōk ippān aolep n̄an itok n̄an Kraist im ekkatak jān E.

Ilo juon iien kadiwōjļo̧k imejatoto an nokon, Būreejtōn Nelson ekar kōketak ro uwaan Kabun̄ in ilo Oklahoma im Kansas, USA, n̄an kalimjōk wōt “juon iaan menin letok ko reļļap tata an Jemedwōj Ilan̄ ekar letok n̄an likūt mour ko ad ilo E im Nejin Jitōnbōro Bōro,” ekar ba. “N̄aij kōnnaan kōn Bok in Mormon. Ej juon menin letok jān Anij. Ej dōkā in jabōn em̧ n̄an tōmak in ad kōnke ej pād ie lukkuun aorōk eo, dilepān katak eo An.”

Ekōnono n̄an membōr ro ilo California, USA, ilo bar juon iien kadiwōjļok imejatoto, Būreejtōn Nelson ekar leļo̧k jilu kūr ko: (1) pukōt m̧ool eo kōn jar, lin̄ūri jeje ko rekwojarjar, im ekkatak naan ko an rikanaan ro, rilolo ro, im ribōk revelesōn ro (2) kōlapļo̧k kajoor in jetōb eo im jeļā kile kōn kōm̧m̧ani bujen ko ippān Anij im kōjparoki; im (3) niknik ilo bōk koņaam̧ ilo jipan̄ aiintok Israel.

Im ilo juon kadiwōjļo̧k imejatoto n̄an 48 laļ ko, Būreejtōn Nelson ekar kakeememej Rikwojarjar in Europe ro: “Elōn̄ iaan ro m̧ōttami rej kappukōt n̄an meļeļe etke rej pād ioon laļ in. Rej kōņaan jeļā eļan̄n̄e mour in ewōr jabdewōt meļeļe in im an jibadbad. Rej kōņaan kōm̧m̧an juon oktak ilo laļ in. Rej ļōmņak wōn eo rej maron̄ lōke. Kom̧ij kile ke bwe ewōr ippāmi uwaak ko me ro m̧ōttami rej kappukōti?”

Ilo social media, Būreejtōn Nelson ej kajjitōk ippād ejjab wōt n̄an en̄jake kam̧m̧oolol ak n̄an kwaļo̧k e. Ej kajjitōk ippād n̄an kōm̧m̧an jikin ilo būruōd n̄an ro “me rej kakkōt n̄an lo meram eo an Rilo̧mo̧o̧r im n̄an en̄jake iakwe eo An.” Ekar rōjan̄ kōj n̄an “jerbal ippād doon n̄an ilo̧k jān m̧wil ko an kowaan im m̧akūtkūt ko an kalijōkļo̧k.” Im ekar kam̧ool bwe “ewōr juon unjen jipan̄ me jemaron̄ aolep oktakļo̧k n̄ane n̄e ejjab kōkm̧anm̧anļo̧k iakwe eo jej en̄jake kōn ro jet ak n̄an kōm̧m̧ane būruōd n̄e rej en̄jake an rub—Rilo̧mo̧o̧r Jisōs Kraist.”