“Elder James W. McConkie III,” Liaona, Māe 2022.
Elder James W. McConkie III
Ritōl Eutiej Jiljilimjuonn̄oul an Kabun̄ in
Ke Elder James W. McConkie III ekar tōparļo̧k Czechoslovakia ilo 1990 āinwōt juon mijenede edik, laļ eo ekar jino oktak jān communism im pojak n̄an bar jino etale ļōmņak ko im tōmak ko an kabun̄. “Ikar pād ilo ijo ejim̧we ilo iien eo ejim̧we ippān armej ro rejim̧we,” ekar ba.
Ekar tokālik ro̧o̧l n̄an eria eo āinwōt juon eo edik im etimjemļo̧k, kajutak juon nonprofit foundation, innām jerbal āinwōt juon būreejtōn n̄an Czech/Slovak Mijen.
Ke ekar 12 iiō dettan, jinen im jemen raar kajjitōk ippān n̄an ekkatak kōn bok ko jān ritōl ro an Kabun̄ in innām ekōnono kake ta eo ekar riiti. “Jinō im jema rekar tōmak ilo aorōk in katakin ajri ro nejier gospel eo, ilo an rōjan̄ ilo Katak im Bujen Ko,” Elder McConkie ekar ba. “Jekjōn 68 ej karuwainene m̧am̧a im baba ro n̄an katakin ajri ro nejier ‘katak in ukeļo̧k’ im ‘tōmak ilo Kraist’ (eoon 25). Jinō im jema rekar lukkuun bōk menin ilo m̧ool.”
En̄jake eo an kōn kajoor eo an gospel in n̄an ukōt armej ekar pād ilo tum̧wūlaļin būruen. Ekar loe bwe ejja menin wōt ekar waļo̧k n̄an Armej ro Rekwojarjar ilo Czech Republic im Slovakia.
Elder James Wilson McConkie III ekar ļotak ilo Salt Lake City, Utah, USA, ilo Ọkwōj 27, 1971, n̄an James Wilson McConkie II im Judith Miller McConkie. Ekar m̧areik Laurel Springer ilo Juļae 1995 ilo Salt Lake Tampeļ. Ewōr emān nejier ajri.
Elder McConkie ekar kadiwōjļo̧k jān University of Utah kōn juon bachelor’s degree ilo history ilo 1995 im bōk juon law degree ilo 1999 jān National Law Center ilo George Washington University. Raan kein ekar jerbal āinwōt juon attorney ilo Workman Nydegger im juon tūreektōr ilo Wallace Toronto Foundation, eo ekar jipan̄ kajutake.
Elder McConkie ekar jerbal āinwōt juon stake būreejtōn ilo iien eo kar kūr e. Ekar barāinwōt jerbal āinwōt juon bisop, high ko̧o̧njeļ, rikakpilōklōk ilo bisoprik, ritōl an mijen an ward, rikakpilōklōk ilo doulul eo an elder ro, rūkaki in kūlaaj in kōppopo n̄an mijen, rūkaki in Gospel Doctrine, im būreejtōn an Doulul eo an Likao ro an ward.