Kraist Ej Kōmour Bōro ko Rerub
E emaron̄ kōmour jem̧jerā eo ad ippān Anij me erub, jem̧jerā ko rerub ippān ro jet, im m̧ōttan ko rerub ilo kōj make.
Jejjo iiō ko rem̧ootļo̧k, ilo juon iien an baam̧le ippān doon, ļaddik eo nej nejū me rualitōk an iiō etan in William ekar kajjitōk ippān ļaddik eo nejū, Briton, eļan̄n̄e ekōņaan ikkure kōn bo̧o̧ļ ippān. Briton ekar itok limoin ilo an uwaak, “Aaet! Ilukkuun m̧ōņōņō in!” Ālkin aer kar ikkure ium̧win juon iien eaitok, bo̧o̧ļ eo ekar rōļo̧k jān ippān Briton, im jidiļo̧k im rube juon iaan pot ko an jibun me elukkuun aorōk.
Briton ekar nana an mour. Ke ej jino an aiin tipdikdik in pot eo, William ekar etal n̄an ippān ļaddik in nej jatin im popoiki ālikin. Innem ekar kaenōm̧m̧an, “Jab inepata, Briton. Ikar bar rube juon men ilo m̧weo im̧ōn Bubu im Jim̧m̧a, im Bubu ekar jibūr eō im atbokwoj eō im ba, Ej EM̧M̧AN wōt, William. Ej ļalem wōt am̧ iiō.’”
Innem Briton ekar uwaak, “Ak, William, n̄a ke 23 aō iiō!”
Jemaron̄ ekkatak eļapļo̧k jān jeje ko rekwojarjar kōn wāween an ad Rilo̧mo̧o̧r, Jisōs Kraist, naaj jipan̄ kōj bwe en wājepedik ad kōm̧adm̧ōdi men ko ilo mour ko ad me rerub, jekdo̧o̧n jete ad iiō. E emaron̄ kōmour jem̧jerā eo ad ippān Anij me erub, jem̧jerā ko rerub ippān ro jet, im m̧ōttan ko rerub ilo kōj make.
Jem̧jerā eo Ad Ippān Anij Me Erub
Ilo an Rilo̧mo̧o̧r kar katakin ilo tampeļ, juon kōrā kar bōktok n̄an E jān scraib im Pharisee ro. Jejjab jeļā kōn likio in bwebwenato eo an, jejeļā wōt ke kōrā in kar “jibwe ilo ļōn̄.”1 Emakijkij jeje ko rekwojarjar ej kwaļo̧k jidik m̧ōttan mour an juon armej, im pedped wōt ioon m̧ōttan in, kōj jet iien jej kōņaan bōk nōbar ak kaje. Ejjeļo̧k juon mour an armej emaron̄ meļeļe kōn juon iien ekabwilōn̄lōn̄ ak juon iien ajļo̧k kōn inepata ilo lo̧bwilej. Jibadbad eo an bwebwenato ko ilo jeje ko rekwojarjar ej n̄an jipan̄ kōj lo bwe Jisōs Kraist ekar uwaak eo, im E ej uwaak eo kiiō. E ejeļā likio in bwebwenato ko ad im elukkuun jeļā ta eo jej en̄taan kake, barāinwōt jon̄an ko jemaron̄i im men ko jej ekkōl kaki.
Kar uwaak eo an Kraist n̄an kōrā in eaorōk nejin Anij “Im Ña I jab liaakḷọk eok; kwōn ilọk im jab bar jerọwiwi.”2 Bar juon wāween ba “kwōn ilọk im jab bar jerọwiwi” emaron̄ bar “ilo̧k im oktak.” Rilo̧mo̧o̧r ekar karuwaineneik e n̄an ukweļo̧k: n̄an ukōt m̧wil ko m̧wilin, ro ej iiaio ippāer, wāween eo ekar en̄jake kōn e make, im ilo buruōn.
Kōn Jisōs Kraist, kāālet eo n̄an “ilo̧k im oktak” emaron̄ bar kōtļo̧k bwe jān “ilo̧k im bōk kōmour,” bwe E ej kein jipan̄ eo n̄an kōmour aolep men ko rerub ilo mour ko ad. Āinwōt an Rijipan̄ im Rijojomar ippān Jemān, Kraist ekar karreoik im kōmour jem̧jerā ko rerub—eļaptata an aorōk, jem̧jerā ko ad ippān Anij.
Ukok eo an Josep Smith ej kalikkar bwe kōrā eo ekar ļoor kapilōk eo an Rilo̧mo̧o̧r im ekar ukōt mour eo an: “Im kōrā eo eaar kaibojooj Anij jān iien eo, im ekar tōmak ilo Etan.”3 Ekaburom̧ōjm̧ōj bwe jejjab jeļā etan, ak meļeļe ko jet kōn mour eo an ālkin iien in kōnke enkar menin aikuj kōttōpar eļap, ettā, im tōmak ilo Jisōs Kraist n̄an kōrā in n̄an ukweļo̧k im oktak. Ta eo jejeļā ej bwe e kar juon kōrā eo “ear tōmak ilo Etan” kōn juon meļeļe eo ke ekar jab ļe ilōn̄inļo̧k katok eo An ejjeļo̧k jem̧ļo̧kin im ej n̄an indeeo.
Jem̧jerā ko Rerub ippān Ro jet
Ilo Luk jebta 15 jej riiti juon būrabōļ kōn juon em̧m̧aan eo ekar wōr ruo nejin ļaddik. Diktata eo nejin ekar kajjitōk ippān jemān kōn jem̧ļo̧k ko an, ilo̧k n̄an āne ettoļo̧k im jerwaani ṃweiuk ko an kōn an tūbḷotak e make.4
“Im ke e jako men otemjej, eļap n̄ūta ej waļo̧k i āne eo; im e jino an aikuj.
“Im ej ilo̧k im koba ippān juon ri āne eo; im ej jilkinļo̧k e ijo jikin kallib ko an bwe en naajdik piik ko.
“Im e kōņaan kobrak lo̧jien kōn m̧ōttan kijen piik: im ejjeļo̧k armej ej leļo̧k n̄an e.
“Im ke ej ian̄aktok an, e ba, E nan̄in lōn̄ ri jerbal an jema ewor m̧ōttir pilawā ippaer, im n̄a ij jako ijin kōn kwōle!
“I naaj jutak im ilōk n̄an jema, im I naaj ba n̄an e, Jema, I ar kōm̧anm̧an nana ņae lan̄ im im̧aan mejom̧,
“Ij patkake bwe ren likūt eta nejōm̧: kwōn kōm̧m̧an n̄an eō āinwōt juon iaan ro am̧ ri jerbal.
“Im e jutak, im itok n̄an jemān. A ke ej ettoļo̧k wōt, jemān ej kile e, im tūriam̧o̧kake, im ettōr, im bun̄ ioon kōnwaan, im mejānmaik e.”5
M̧ool eo bwe jemān ekar ettōrļo̧k n̄an ippān ļaddik eo nejin, Ij tōmak, eaorōk. Metak eo ļaddik eo nejin ekar kōmetake kake ekar lukkuun m̧wūlaļ im kabwilōn̄lōn̄. Ejjeļo̧k oktak, jemān emaron̄ kar lukkuun jook kōn kōm̧m̧an ko an ļaddik eo nejin.
Kōn menin, etke Jemān ekar jab kōttar an ļaddik eo nejin joļo̧k an bōd? Etke ekar jab kōttar an kōm̧m̧an juon katok n̄an kōļļā wōņāān jorrāān eo ak kōkm̧anm̧anļo̧k jorrāān eo m̧okta jān an jeorļo̧k bōd im iakwe? En̄in ej juon men eto aō baj kōļmenļo̧kjeņ kake.
Irooj ej katakin kōj bwe jeorļo̧k an ro jet bōd ej juon kien ilo aolepen laļ in: “N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd.”6 Jeorļo̧k bōd emaron̄ bōk eļap peran im ettā. Emaron̄ bar bōk iien. Emenin aikuj bwe jen likūt ad tōmak ilo Irooj āinwōt ad bōk eddo kōn jekjek ko ilo būruōd. Erkein rej aorōkin im kajoor in anemkwoj in kāālet eo ad.
Kōn jin̄n̄a ak pija in kōn Jemān eo ilo būrabōļ eo kōn nejin eo ejerawaan, Rilo̧mo̧o̧r eo ekar kwaļo̧k bwe jeorļo̧k bōd ej juon iaan menin letok ko routiej tata me jemaron̄ kwaļo̧k n̄an doon im eļaptata kōj make. Jab kaddodoik būruōd kōn jeorļo̧k bōd ejjab juon men epidodo aolep iien, ak kōn kajoor in kōmaron̄ eo an Jisōs Kraist, emaron̄ kūrm̧ool.
Mōttan ko Rerub ilo Kōj make
Ilo Jerbal jebta 3 jej ekkatak kōn juon em̧m̧aan eo me ekar ļotak kōn kūrro “im raar bōktok im likūt e raan otemjej ṇa iturin kōjām in tempel, etan kōjām eo Wūlio, bwe en kajjitōk ṃweiien tūriaṃo jān ro rej deḷọñ ilowaan tempel.”7
Rikūrro eo ej kajjitōk jāān ekar rūtto ilōn̄inļo̧k 40 iiō rūttoon8 im ekar kōmaat aolepen mour eo an ilo juon jekjek in kōņaan im kōttar me ejjeļo̧k jem̧ļo̧k, bwe e ekar pedped ioon jouj an ro jet.
Juon raan ekar lo “Ke ej lo Piter im Jon re nan̄in deļo̧n̄ ilowaan tempel [im] ej kajjitōk m̧weiien tūriam̧o.
“Im Piter ej kalimjeke kab Jon, im e ba, Kwōn lale kōmro.
“Im ej eo̧ron̄ erro, im ļōmņak enaaj bōk men eo jabdewōt jān er.
“A Piter ej ba, Ejjeļo̧k silver ak gold ippa; ak men eo ewōr ippa; ij lewōj n̄an eok: Ilo etan Jisōs Kraist ri Nazeret, kwon jutak im etal.
“Im ej jibwe anmoonņōn, im kajutak e: im e m̧ōkaj an pen neen im kwōlelein neen.
“Im ej kaure im jutak, im etetal, im ej deļo̧n̄ ippāerro ņa ilowaan tempel; ej etetal, im kāke, im wūjtake Anij.”9
Jet iien jemaron̄ lo ad make, āinwōt rikūrro eo ej kajjitōk jāān ilo kōjem̧ eo an tampeļ eo, ilo kijenmej—ak jet iien jaje kijenmej—“[kattar] Irooj.”10 Kōttar n̄an bōk kōmour ilo jetōb ak en̄jake. Kōttar uwaak ko me rej un̄ūr ijo em̧ūlaļ tata ilo būruōd. Kōttar juon menin bwilōn̄.
Kōttar Irooj emaron̄ erom̧ juon jikin ekwojarjar—juon jikin kōjatōltōl im karreo ijo jemaron̄ itok n̄an jeļā Rilo̧mo̧o̧r ilo juon wāween em̧ūlaļ im ad make. Kōttar Irooj emaron̄ bar erom̧ juon jikin ijo jej lo ad kajjitōkin kōj make, “O Anij, kwo pād ia?”11—juon jikin ijo niknik ilo men ko an jetōb emenin aikuj n̄an kōj n̄an kōmourruur tōmak ko ad ilo Kraist ilo ad lukkkun m̧ool in kālet E im bar kālet E im bar kālet E. Ijeļā kōn jikin in, im imeļeļe kain kōttar rot in.
Ikar joļo̧k elōn̄ awa ko ilo jikin taktō kōn kāānjer, ikar kobaik en̄taan ko aō ippān elōn̄ ro rekar jan̄nuwaad n̄an bōk kōmour. Jet rekar mour; ro jet rekar jab. Ikar ekkatak ilo juon wāween ekabwilōn̄lōn̄ bwe anemkwoj jān māllijon̄ ko ad eokkotaktak n̄an kajjojo iaad, im kōn menin ej aikuj dikļo̧k ad mije wāween eo me jej bōk anemkwoj ie im en ļapļo̧k kōn Rikanemkwoj eo Make. Kōnono ko ad aolep iien rej aikuj kwaļo̧k kōn Jisōs Kraist!
Kōjerbal tōmak eo ad ilo Kraist ej meļeļein ejjab lōke wōt ankilaan Anij ak barāinwōt iien ko An. Bwe E elukkuun jeļā ta eo jej aikuji im n̄aat eo jej aikuji. N̄e jej kōm̧m̧ane ankilaan Irooj, āliktata jenaaj bōk eļapļo̧k jān jon̄an eo jekar kōņaan.
Ro m̧ōtta rejitōnbōro, ewōr aolep ippād juon men ilo mour ko ad me erub me ej aikuj bwe en karben, kōm̧m̧an, ak kōmour. Ilo ad oktakļo̧k n̄an Rilo̧mo̧o̧r, ilo ad karōk būruōd im ļōmņak ko ad n̄an E, ilo ad ukweļo̧k, E ej itok n̄an ippād “kōn kōmour ilo pein bao ko Pein,”12 likūt pā ko pein im jiburlepe kōj, im ba, “Ej EM̧M̧AN WŌT. Ej lalem wōt am̧ iiō—ak 16, 23, 48, 64, 91. Jemaron̄ kōm̧m̧ane menin ippān doon!”
Ij kam̧ool bwe ejjeļo̧k juon men ilo mour eo am̧ me erub im ej ilōn̄inļo̧k kajoor in kōmour, pinmuur, im kōmaron̄ eo an Jisōs Kraist. Ilo et eo ekwojarjar im kwojarjar etan E eo im ekajoor n̄an kōmour, Jisōs Kraist, amen.