2022
Itok ilowaan Wōrwōr an Anij.
Māe 2022
10:20

Itok ilowaan Wōrwōr an Anij.

Jān Elder Randy D. Funk

Jān Jiljilimjuonn̄oul eo

Ilowaan wōt wōrwōr eo an Anij, jej en̄jake an Seperd eo Em̧m̧an waje kōj, naajdik ilo kōjparok im jeraam̧m̧an n̄an en̄jake iakwe in pinmuur eo An.

Āinwōt m̧am̧a im baba ro reddik, Brother im Sister Samad rekar ekkatak gospel eo an Jisōs Kraist ilo m̧weo im̧weer ilo Semarang, Indonesia.1 Kar jijet ipeļaakin juon tebōļ edik, kōn juon ļaam̧ em̧ōjņo̧ an meram me ekar āinwōt eletok elōn̄ļo̧k ņam̧ ko jān meram, ruo mijenede reddik rekar katakin er m̧ool ko indeeo. Jān m̧ool in jar im tōl eo an Jetōb Kwojarjar, rekar itok n̄an tōmak ta eo rekar ekkatak im kar kāālet n̄an peptaij im erom̧ ro uwaan Kabun̄ eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Jokāālet jab in, im jon̄ak in mour eo aer jān tōre eo, ekar kōjeraam̧m̧an Brother im Sister Samad im baam̧le eo aer ilo aolep jekjek in mour ko aer.2

Rej ilubwilijin painieer ro m̧oktata in Rikwojarjar ro ilo Indonesia. Tokālik, rekar bōk kain̄i ko an tampeļ, im Brother Samad ekar jerbal āinwōt juon branch būreejtōn im innām district būreejtōn, ettōrļo̧k ilo Central Java n̄an kakūrm̧ool eddo ko an. Ium̧win 10 iiō ko, ekar jerbal āinwōt petriak eo kein kajuon an Surakarta Indonesia Stake.

Elder Funk ej pād ippān Sister im Brother Samas

Āinwōt juon iaan mijenede ro ilo m̧wiin ettā, eobrak kōn tōmak 49 iiō ko rej m̧ootļo̧k, ikar kam̧ool bwe ilo er ta eo Kiin̄ Benjamin ekar katakin ilo Bok in Mormon eo: “Ikōņaan bwe kom̧in ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij. Bwe lo, rej jeraam̧m̧an ilo aolep men ko otemjeļo̧k, jim̧or ilo kanniōk im jetōb.”3 Kōjeraam̧m̧an ko rej jiōbļo̧k n̄an mour ko an ro otemjej rej ļoor waanjon̄ak eo im katak ko an Jisōs Kraist, ro rej kāālet n̄an bōnbōn ilubwilijin rikaļoor ro An, rellōn̄, rem̧ōņōņō, im n̄an indeeo.4

Wōrwōr eo an Anij

Bujen peptaij eo an Alma ej karuwaineneik ro rekar aintok doon ilo Dān ko an Mormon ej ijjino ilo naan in: “Kiiō, āinwōt kom̧ij kōņaan itok ilo wōrwōr an Anij.”5

Flock of sheep in the country side standing next to a rock fence.

Juon wōrwōr, ak wōrwōr in sip, eo ej juon jikin kōttōrak ekilep, ekkā an ekkal kōn wōrwōr dōkā, ijo sip ko remaron̄ kōjparok ilo bon̄. Ewōr wōt juon kōjem̧ ie. Ilo jem̧ļo̧kin juon raan, rilale sip eo ej kūr sip ko. Rejeļā ainikien, im jān kōjem̧ eo rej deļo̧n̄e wōrwōr eo ekōjparok.

Armej ro doon Alma remaron̄ kar jeļā bwe rilale sip eo ej jutak imejān kōjem eo eaidik an wōrwōr eo bwe n̄e sip ko rej deļo̧n̄, rej bōnbōn6 im kinej ko aer im nan̄inmej ko rej lali im kōjparoki juon ilo̧k juon. Kōjparok im ājmour eo an sip eo ej pedped wōt ioon aer m̧ōņōņō in itok n̄an wōrwōr eo im pād wōt ilo wōrwōr eo.

Ilubwilijid emaron̄ wōr jet ro rej en̄jake bwe rej pād im̧aan jarlepju eo, bōlen ļōmņak edik aikuji er ak edik aer aorōk ak rejjab jān lowaan wōrwōr in. Im, āinwōt juon rilale sip, ilo wōrwōr eo an Anij jet iien jej juur neen bar juon im aikuj in ukweļo̧k ak jeorļo̧k bōd.

Ak Rilale Sip eo Em̧m̧an7—rilale sip eo ad em̧ool—ej aolep iien em̧m̧an. Ilowaan wōt wōrwōr eo an Anij, jej en̄jake An waje kōj, naajdik ilo kōjparok im jeraam̧m̧an n̄an en̄jake iakwe in pinmuur eo An. Ekar ba, “Iaar jeje etaṃ ilo lọpiden pā ko peiū; im wōrwōr ko aṃ rej iṃaō iien otemjej.”8 Rilo̧mo̧o̧r eo ad ekar jeje ioon lo̧piden pā ko Pein jerawiwi ko ad, metak ko, kaen̄tanaan ko,9 im aolep men kein rejjab em̧m̧an ilo mour in.10 Aolep rej ruwainene n̄an bōk kōjeraam̧m̧an kein, āinwōt aer “kōņaan itok”11 im kāālet bwe ren pād ilowaan wōrwōr eo. Menin letok eo an anemkwoj in kāālet ejjab baj jim̧we n̄an kāālet; ej ad iien em̧m̧an n̄an kāālet jim̧we eo. Im tōrerein wōrwōr ko rejjab juon mo ak ej juon kein jipan̄ kōjparok ilo jetōb.

Jisōs ekar katakin bwe ewōr “juon wōt bwij, im juon wōt seperd.”12 Eaar ba:

“A eo ej deļo̧n̄ ilo kōjām e seperd in sip ko.…

“Im sip eo ej ron̄jake ainikien … ,

“… im sip ko rej ļoore, bwe re jeļā ainikien.”13

Innām Jisōs ekar ba, “N̄a aor: eļan̄n̄e jabdewōt armej ej deļo̧n̄ kōn N̄a, e naaj mour,”14 katakin im kalikkare bwe ewōr wōt juon iaļ n̄an lowaan wōrwōr an Anij im juon wōt iaļ n̄an maron̄ mour. Ej jān im kōn Jisōs Kraist.15

Kōjeraam̧m̧an ko Rej Itok n̄an Ro Otemjej ilowaan Wōrwōr eo an Anij

Jej ekkatak wāween itok n̄an lowaan wōrwōr eo jān naan ko an Anij, eo me katak eo kar katakin jān Jisōs Kraist im rikanaan ro An.16 N̄e jej ļoor katak ko an Kraist im itok ilowaan wōrwōr eo kōn tōmak ilo Jisōs Kraist, ukweļo̧k, peptaij im kapen, im wōnm̧aanļo̧k wōt ilo tiljek,17 Alma ekar kallim̧ur kōn emān kōjeraam̧m̧an ko ad make, rejenelo̧k. Kom̧ maron̄ (1) “bōk lo̧mo̧o̧r an Anij,” (2) “bōnbōn ippān ro ilo jerkakpeje eo m̧oktata,” (3) “bōk mour indeeo,” im (4) Irooj enaaj “lutōkleplep eļapļo̧k Jetōb eo An ioomi.”18

Ālkin an Alma kar katakin kōn kōjeraam̧m̧an kein, armej ro rekar kabokboke peier kōn lan̄lōn̄. En̄in ej etke:

Juon: N̄an lo̧mo̧o̧r ej meļeļe in n̄an kōļļāik juon m̧uri ak eddo ak n̄an anemkwoj jān ta eo ekabūrom̧ōjm̧ōj ak kōmetak.19 Ejjeļo̧k juon jon̄an eddōkļo̧k eo ad make kōn ijo koņaad me emaron̄ karreoik kōj jān jerawiwi ko jekar kōm̧m̧ani ak ājmour jān kinej ko jekar en̄taan jāni eļan̄n̄e ejjab Pinmuur eo an Jisōs Kraist. E ej ad Rinpinmuur.20

Ruo: Kōnke kōn Jerkakpeje eo an Kraist, aolep naaj jerkakpeje.21 Ālkin an jetōb ko ad em̧m̧akūt jān ānbwin ko ad, jenaaj ilo ejjeļo̧k pere reim̧aanļo̧k n̄an n̄āāt eo jenaaj maron̄ bar juon alen koba ippān juon ānbwin ejerkakpeje eo me kōj jej iakwe. Jenaaj kijerjer reim̧aanļo̧k n̄an ad maron̄ pād ilubwilijin ro ilo Jerkakpeje eo Kein Kajuon.

Jilu: Mour indeeo ej meļeļe in n̄an mour ippān Anij im āinwōt An mour. Ej “mennin letok eo eļaptata ian mennin letok ko an Anij”22 im bōktok juon tarlep in lan̄lōn̄.23 Ej jibadbad eo eļaptata im kōttōbar eo an mour ko ad.

Emān: Jem̧jerā eo an juon iaan Doulul in Anij eo, Jetōb Kwojarjar, ej letok tōl eo emenin aikuj tata im kaenōm̧m̧an eo ilo mour in.24

Ļōmņak kōn jet iaan men ko rej kōm̧m̧an būrom̧ōj: inepata ej itok jān jerawiwi,25 būrom̧ōj im ajjimakeke jān mej an juon eo jej iakwe, im mijak jān ad jab jeļā ta ej waļo̧k n̄e jej mej. Ak n̄e jej deļo̧n̄e wōrwōr eo an Anij im kōjparok bujen ko ad Ippān, jej en̄jake aenōm̧m̧an im jeļā im lōke bwe Kraist enaaj lo̧mo̧o̧ren kōj jān jerawiwi ko ad, bwe jenolo̧k in jān ānbwinnid im jetōb eo ad enaaj m̧ōkaj an jem̧ļo̧k, im bwe jenaaj mour indeeo ippān Anij ilo juon wāween eaiboojoj.

Lōke ilo Kraist im Makūtkūt ilo Tōmak

Ro jeiū im jatū, jeje ko rekwojarjar rej obrak kōn waanjon̄ak ko kōn kajoor eo eaiboojoj an Rilo̧mo̧o̧r eo im tūriam̧o kake im jouj eo An. Ilo tōre in kwaļo̧k eo An ilo mour in, kōjeraam̧m̧an ko jān kōmour ko an rekar itok n̄an ro otemjej rekar lōke E im m̧akūtkūt ilo tōmak. N̄an waanjon̄ak, em̧m̧aan eo em̧ōjņo̧ ilo ļee in tutu eo ilo Bethesda ekar etetal ke, kōn tōmak, ekar ļoore naan in kean̄ ko an Rilo̧mo̧o̧r eo “jerkak, im bōk kiniōm̧ im etal.”26 Ro rekar nan̄inmej ak en̄taan ilo jabdewōt wāween ilo āne in Bun̄peļo̧k rekar mour ke “kōn juon wōt ainikien” er “raar wōnm̧aanļo̧k.”27

Āinļo̧k wōt, n̄an bōk kōjeraam̧m̧an ko rekabwilōn̄lōn̄ kar kallim̧ur kake n̄an ro rej itok n̄an lowaan wōrwōr eo an Anij ej aikuj ad baj kōm̧m̧ane menin—jej aikuj in kāālet n̄an itok. Alma eo Edik ekar katakin, “Im kiiō ij ba n̄an kom̧ bwe seperd eo em̧m̧an ej kūrļo̧k kom̧; im eļan̄n̄e kom̧ij eo̧ron̄ ainikien Enaaj bōkļo̧k kom̧ n̄an wōrwōr eo An.”28

Jet iiō rem̧ootļo̧k juon m̧ōtta ejitōn bōro ekar jako jān kāānjer. Ke kōrā eo pāleen, Sharon, ekar jino jeje kōn an nan̄inmej, ekar ba “Kōm̧ kar Kāālet Tōmak. Tōmak ilo ad Rilo̧mo̧o̧r, Jisōs Kraist. Tōmak ilo karōk eo an ad Jemedwōj Ilan̄, im tōmak bwe Ejeļā aikuj ko ad im kakūrm̧ool kallim̧ur ko An.”29

Ikar ioon elōn̄ Armej ro Rekwojarjar ilo Raan Ko Āliktata āinwōt Sharon eo ej en̄jake aenōm̧m̧an itulowa ilo jeļā bwe ekōjparok ilowaan wōrwōr an Anij, eļaptata n̄e kapo, jum̧ae, ak apan̄ ko rej itok.30 Rekar kāālet n̄an tōmak ilo Jisōs Kraist im n̄an ļoore rikanaan eo An. Rikanaan eo ad ejitōn bōro, Būreejtōn Russell M. Nelson, ekar katakin, “Men otemjej em̧m̧an ilo mour—aolep kōjeraam̧m̧an ko an mour indeeo—rej ijjino kōn tōmak.”31

Lukkuun Itok n̄an wōrwōr eo an Anij

Jim̧aan jim̧aan jim̧aaō James Sawyer Holman ekar itok n̄an Utah ilo 1847, ak ekar jab pād ilubwilijin ro rekar itaaktok ilo Juļae eo ippān Brigham Young. Ekar itok tokālik iiō eo im, ekkar n̄an rekoot ko an baam̧le, kar bōk eddo bōktok sip eo. Ekar jab tōparļo̧k Salt Lake Valley m̧ae Oktoba, ak e im sip eo rekar tōprak.32

Ilo bar juon wāween kōmeļeļeiki, jet iaad rej pād wōt ilo ad jan̄in itok n̄an wōrwōr eo. Ejjab aolep raar itakļo̧k ilo kumi eo m̧oktata. Ro jera, jouj im etal wōt ilo iaļ in—im jipan̄ ro jet—lukkuun itok ilowaan wōwōr eo an Anij. Kōjeraam̧m̧an ko an gospel eo an Jisōs Kraist reban jon̄i kōnke rej indeeo.

Ij lukkuun kam̧m̧oolol bwe imaron̄ juon uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ij kwaļo̧k aō kam̧ool kōn iakwe eo an Jemedwōj Ilan̄ im ad Ripinmuur, Jisōs Kraist, im kōn aenōm̧m̧an eo ej itok wōt jān Er—aenōm̧m̧an eo itulowa im kōjeraam̧m̧an ko loe ilo wōrwōr an Anij. Ilo etan Jisōs Kraist, amen.

Kakeememej ko

  1. Āinwōt elōn̄ Riindonesia ro an epepen eo an, Brother Samad ekar baj juon iaer. Kōrā eo pāleen, Sri Katoningsih, im ajri ro nejier rej kōjerbal Samad āinwōt etan baam̧le eo aer.

  2. Brother im Sister Samad rekar riboot bwe diktata 44 iaan ro nukier ilo baam̧le ko aer rej kiiō uwaan Kabun̄ in. Elōn̄ ro jet rej barāinwōt lan̄lōn̄ kōn kōjeraam̧m̧an ko an gospel eo kōnke kōn waanjon̄ak eo aer im jerbal in jipan̄ eo.

  3. Mosaia 2:41.

  4. Lale Katak im Bujen Ko 59:23.

  5. Mosaia 18:8.

  6. Lale Moronai 6:4.

  7. Lale Jon 10:14; bar lale Gerrit W. Gong, “Seperd Em̧m̧an, Ļaam̧ an Anij,” Liaona, Māe 2019, 97–101.

  8. Aiseia 49:16.

  9. Lale Alma 7:11–13.

  10. Lale Dale G. Renlund, “Illu kōn Kalijōkļo̧k,” Liaona, Māe 2021, 41–44.

  11. Mosaia 18:8.

  12. Jon 10:16.

  13. Jon 10:2–4.

  14. Jon 10:9.

  15. Lale 2 Nipai 31:21; Hilamōn 5:9.

  16. Lale Henry B. Eyring, “The Power of Teaching Doctrine,” Liahona, July 1999, 85. N̄e jej kappukot n̄an itok n̄an Kraist, jej aikuj itok ekkar n̄an naan ko an Kraist, “bwe ewōr juon wōt Anij im juon Seperd ioon aolepān laļ” (lale 1 Nipai 13:40–41).

  17. Katak ko an Kraist, rej baj kwaļo̧k, ej bwe aolep armej aolep jikin rej aikuj kōjerbal tōmak ilo Jisōs Kraist im Pinmuur eo An, ukweļo̧k, peptaij, bōk Jetōb Kwojarjar eo, im niknik n̄an jem̧ļo̧kin, ak, āinwōt an Rilo̧mo̧o̧r eo katakin ilo 3 Nipai 11:38, “kom̧ ban jolōt e aelōn̄ in Anij.”

  18. Mosaia 18:9, 10.

  19. Lale Merriam-Webster.com Dictionary, “redeem”; see also D. Todd Christofferson, “Redemption,” Liahona, May 2013, 109.

  20. Lale Alma 11:40.

  21. Lale 2 Nipai 2:8; 9:12.

  22. Katak im Bujen Ko 14:7.

  23. Lale 2 Nipai 9:18.

  24. Lale 1 Nipai 4:6; Moronai 8:26.

  25. Lale Mosaia 3:24–25; Alma 41:10.

  26. Jon 5:8.

  27. 3 Nipai 17:9.

  28. Alma 5:60. Ilo Moses 7:53, Messaia eo ekar barāinwōt ba, “Eo ej itok ilo kōjām eo im tallōn̄ tok Iturū ejjāmin wōtlo̧k.”

  29. Sharon Jones, “Diagnosis,” wechoosefaith.blogspot.com, Mar. 18, 2012.

  30. Preach My Gospel ej kōmeļeļeik “niknik n̄an jem̧ļo̧kin” āinwōt in: “N̄an pād ilo m̧ool n̄an kien ko an Anij im m̧ool n̄an menin letok kwojarjar eo im kain̄i in liāp ko an tampeļ jekdo̧o̧ņ kapo, jum̧ae, im apan̄ ilo aolepān mour ine” ([2019], 73). This suggests that we will experience temptation, opposition, and adversity throughout life.

  31. Russell M. Nelson, “Kraist Em̧ōj an Jerkakpeje; Tōmak ilo E Enaaj Kōm̧akūt Toļ ko,” Liaona, Māe 2021, 102.

  32. Lale brief biographies of James Sawyer Holman and Naomi Roxina LeBaron Holman by their granddaughter Grace H. Sainsbury in the possession of the speaker (Charles C. Rich diary, Sept. 28, 1847, Church History Library, Salt Lake City; Journal History of The Church of Jesus Christ of Latter-day Saints, June 21, 1847, 49, Church History Library). Holman was a captain in the 1847 Charles C. Rich company.