Ngaahi Meʻa Mahuʻinga mei he Konifelenisi Lahi Fakataʻu Hono 192

Ko ha tāpuaki moʻoni ia ʻi he ngaahi taimi faingataʻa ko ʻení ke tau maʻu ha fakahinohino mo ha faleʻi mei he ʻEiki ko Sīsū Kalaisí, ʻa ia ʻokú Ne tataki Hono Siasi kuo fakafoki maí ʻo fakafou ʻi ha kau palōfita mo ha kau ʻaposetolo moʻui.

Lolotonga ʻa e konifelenisi lahí, naʻe fakahoko ʻe he ʻEikí ha ngaahi fakaafe lahi ʻo fakafou ʻi Heʻene palōfita ko Lāsolo M. Nalesoní. Ko ha ngaahi meʻa pē ʻeni ʻe niʻihi:

1. Vahevahe ʻa e Mālohi mo e Melino ʻa Sīsū Kalaisí

Naʻe fakamanatu ʻe Palesiteni Nalesoni ki he kāingalotú ʻa hotau “fatongia toputapu ke vahevahe ʻa e mālohi mo e melino ʻa Sīsū Kalaisí kiate kinautolu kotoa pē ʻe fanongó.” ʻI he ngaahi taimi faingataʻa ko ʻení, “ʻe fie maʻu ʻe he taha kotoa pē ke ne ʻilo e feituʻu te nau lava ke maʻu ai ʻa e ʻamanaki lelei mo e melino ʻoku ʻ[ope] atu ʻi he faʻa ʻiloá’ [Filipai 4:7].”

Ke lau ʻa e ui ʻa Palesiteni Nalesoni ki he talavou moʻui taau kotoa pē, ʻe malava ke teuteu mo ngāue fakafaifekaú, vakai, “Ko Hono Malanga ʻAki ʻa e Ongoongolelei ʻo e Melinó” ʻi he peesi 6.

2. Fakatupulaki ha Ivi Fakalaumālie Leleí

Naʻe akonaki ʻa Palesiteni Nalesoni ʻo pehē, “Kuo teʻeki ai ke tau fie maʻu lahi ange ʻa e ivi fakalaumālie leleí ʻo hangē ko e ʻaho ní, ke fakafepakiʻi ʻaki ʻa e vave ʻo e fakautuutu ʻo e koví mo e ngaahi fakaʻilonga ʻo e ngaahi kuongá.”

Kumi ha fakaafe pau ʻe nima meia Palesiteni Nalesoni ki hono langaki hotau ivi fakalaumālié ʻi he “Ko e Mālohi ʻo e Ivi Fakalaumālié” ʻi he peesi 97.

3. Fili ʻa e Founga Te Ke Fakaʻaongaʻi Ai Ho Taimí

Naʻe fakamatalaʻi ʻe Palesiteni Nalesoni ʻoku ʻi ai ha ngaahi meʻa ʻoku ʻikai ke tau lava ʻo puleʻi. Naʻá ne pehē, “Ka ʻoku ʻi ai ha ngaahi meʻa te tau lava ʻo mapuleʻi, kau ai ʻa e founga ʻoku tau fakaʻaongaʻi ai hotau taimí.”

Lau ʻa e fakaafe ʻa Palesiteni Nalesoni ke fakaʻaongaʻi ha taimi ke tukutaha ai ʻete tokangá ki he ngaahi tāpuaki ʻo e temipalé ʻi he “Ko e Taimí ʻEni” ʻi he peesi 126.

ʻI hoʻo ako mo ngāueʻi ʻa e ngaahi fakaafe ko ʻení, ʻoku mau fakaafeʻi koe ke ke fakakaukau ke vahevahe hoʻo aʻusiá mo e niʻihi kehé ʻo fakafou ʻi he Liahoná.