“ʻEletā James W. McConkie III,” Liahona, Mē 2022.
ʻEletā James W. McConkie III
Fitungofulu Taki Māʻolungá
ʻI he tūʻuta ʻa ʻEletā Sēmisi W. Makongikī III ʻi Sekisolovākia ʻi he 1990 ʻi heʻene hoko ko ha faifekau kei talavoú, naʻe kamata ke tauʻatāina ʻa e fonuá mei he kominiusí pea nau mateuteu ke toe kamata fekumi ki ha ngaahi feohiʻanga mo ha ngaahi tui fakalotu. Naʻá ne pehē, “Naʻá ku ʻi he feituʻu totonu ʻi he taimi totonu mo e kakai totonu.”
Naʻá ne toe foki kimui ange ki he feituʻú ko ha mataotao fakapalōfesinale kei talavou, ko ha hoangāue pule ʻo ha kautaha ʻikai fakatupu paʻanga, pea hoko ko e palesiteni ʻo e Misiona Czech/Slovak.
ʻI hono taʻu 12, naʻe fakaafeʻi ia ʻe heʻene ongomātuʻá ke ako ʻa e ngaahi tohi ʻa e kau taki ʻo e Siasí pea nau aleaʻi leva ʻa e meʻa naʻá ne laú. Naʻe pehē ʻe ʻEletā Makongikī, “Naʻe tui ʻeku tamaí mo ʻeku faʻeé ki he mahuʻinga hono akoʻi ʻo e ongoongoleleí ki heʻena fānaú, ʻo hangē ko hono fokotuʻu mai ʻi he Tokāteline mo e Ngaahi Fuakavá. ʻOku fakaafeʻi ʻe he vahe 68 ʻa e mātuʻá ke nau akoʻi ki heʻenau fānaú ʻʻa e tokāteline ʻo e fakatomalá’ mo e ʻtui kia Kalaisí’ (veesi 25). Naʻe toʻo fakamātoato ia ʻe heʻeku ongomātuʻá.”
Naʻe tō loloto ki hono laumālié ʻa ʻene ongoʻi e mālohi ʻo e ongoongoleleí ke ne liliu ʻa e kakaí. Naʻá ne mamata ki he hoko ʻa e meʻa tatau ki he Kāingalotu ʻi he Lepupelika Seki mo Solovākiá.
Naʻe fāʻeleʻi ʻa ʻEletā Sēmisi Uilisoni Makongikī III ʻi Sōleki Siti, ʻIutā, USA, ʻi he ʻaho 27 ʻo ʻAokosi 1971, kia Sēmisi Uilisoni Makongikī II mo Siuti Mila Makongikī. Naʻá ne mali mo Loumaile Sipilingā ʻi Siulai ʻo e 1995 ʻi he Temipale Salt Lake. ʻOkú na maʻu ha fānau ʻe toko fā.
Naʻe ʻosi ʻa ʻEletā Makongikī mei he ʻUnivēsiti ʻo ʻIutaá mo ha mataʻitohi BA ʻi he hisitōliá ʻi he 1995 pea maʻu hono mataʻitohi laó ʻi he 1999 mei he Senitā Lao Fakafonuá ʻi he ʻUnivēsiti Siaosi Uāsingatoní. Naʻá ne ngāue kimuí ni mai ko ha loea ʻi Workman Nydegger pea mo ha talēkita ʻo e Wallace Toronto Foundation, ʻa ia naʻá ne tokoni ki hono fokotuʻú.
Naʻe hoko ʻa ʻEletā Makongikī ko ha palesiteni fakasiteiki ʻi he taimi naʻe uiuiʻi ai iá. Kuó ne hoko foki ko ha pīsope, alēleaʻanga māʻolunga, tokoni ʻi he kau pīsopelikí, taki ngāue fakafaifekau fakauooti, tokoni ʻi he kau palesitenisī ʻo e kōlomu ʻo e kaumātuʻá, faiako teuteu ngāue fakafaifekau, faiako Tokāteline ʻo e Ongoongoleleí, mo ha palesiteni ʻo e Kau Talavoú ʻi he uōtí.