Ngaahi Maʻuʻanga Tokoni Foʻoú

Naʻe toki tuku atu ha ngaahi maʻuʻanga tokoni ke tokoni ki he kāingalotú ʻi hono moʻui ʻaki ʻo e ongoongoleleí, fakamālohia honau ngaahi fāmilí, mo fakahoko honau ngaahi fatongia faka-Siasí.

Ngaahi Talanoa ʻo e Fuakava Motuʻá

Kuo fakafoʻou he taimí ni ʻe he tohi fakatātā ko ʻení ha ngaahi fakatātā mo ha fakamatala tohi ʻe tokoni ki he ngaahi fāmilí ʻi heʻenau ako ʻi ʻapí. ʻOku ʻi ai ha ngaahi fakatātā foʻou ʻe 350 tupu ʻi he tohi kuo fakaleleiʻí. Kuo toe hiki kotoa ʻa e ngaahi talanoa kimuʻá, tānaki atu mo ha ngaahi talanoa ʻe hiva, pea kuo liliu ʻa e tohí ki ha lea fakafonua ʻe 63. Kuo faʻufaʻu ha ngaahi vitiō fakatātā mo ha ngaahi fakamatala ongo ʻi ha lea fakafonua ʻe 10 ki he talanoa takitaha. ʻOku maʻu ʻi he ʻinitanetí ʻa e Ngaahi Talanoa ʻo e Fuakava Motuʻá mo hono ngaahi vitiō ʻoku ʻoatu fakataha mo iá ʻi he scripturesto.ries.ChurchofJesusChrist.org, ʻi he ongo polokalama Gospel Library pea mo e Gospel for Kids, pea ʻi he YouTube. ʻE lava ke maʻu ʻa e tatau kuo pākí ʻi he store.ChurchofJesusChrist.org pe ʻi he ngaahi senitā tufakiʻanga naunaú.

Kau Mosilemí mo e Kāingalotu ʻo e Siasí: Ngaahi Tuí, Tuʻunga Mahuʻingá mo e Founga Moʻuí

ʻOku fefakafeʻiloakiʻaki ʻe he kiʻi tohi tufa foʻou ko ʻení ʻa e kau Mosilemí (kau muimui ʻo ʻIsilamí) mo e Kāingalotu ʻo e Siasí. Naʻe fuofua fakafeʻiloaki ia ʻe Tēvita A. Petinā mo Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá lolotonga ha konifelenisi ʻi ʻIsilami ʻi he ʻUnivēsiti Pilikihami ʻIongí ʻi ʻOkatopa 2021. ʻOku maʻu ʻa e kiʻi tohi tufá ʻi he Gospel Library (ʻi he ChurchofJesusChrist.org pe ʻi he polokalama telefoni toʻotoʻó) ʻi he lea faka-ʻAlepeá, faka-Pilitāniá, Fāsí, Falaniseé, Siamane, Lūsia, Sipeini mo e faka-Toaké. ʻI he Gospel Library, ʻalu ki he Ngaahi Tohí mo e Ngaahi Lēsoní pea fakaava ʻa e Interfaith Relations (Ngaahi Vā Fetuʻutaki ʻi he Tui Fakalotú).

Faingamālie Sikolasipí

ʻOku ʻoatu ʻi he taimí ni ʻe he BYU–Pathway Worldwide ha faingamālie sikolasipi ki he tokotaha ako kotoa pē, ʻo makatuʻunga ʻi he fiemaʻú. ʻOku ʻikai fie maʻu ha tuʻunga fakaako ia kae toki feʻunga mo e sikolasipí. Kuo pau ke fakakakato ʻe he kau ako ʻoku lesisita ki he PathwayConnect ha polokalama fakaako (module).

Ko Hono Maʻu ʻo ha Mālohi ʻi he ʻEikí: Ivi Matuʻuaki Fakaelotó

ʻOku maʻu ʻi he taimí ni ʻa e kalasi moʻui fakafalala pē kiate kitá ʻi he lea faka-ʻAlapēniá, Siainá, Sekí, Tenimaʻaké, Hōlani, Pilitānia, Falanisē, Siamane, Hungali, ʻĪtali, Siapani, Kōlea, Potukali, Lūsia, mo e faka-Sipeiní.

Ngaahi Fakahinohino Fakaeuiuiʻí

ʻE tokoni ʻa e ngaahi fakahinohino uiuiʻi fakatakimuʻa foʻoú ki he kau taki ʻo e Kau Finemuí ke akoʻi ʻa e toʻu tupú. Ke maʻu ʻa e ngaahi fakahinohinó ʻi he Gospel Library, ʻalu ki he Ngaahi Tohi Tuʻutuʻuní mo e Ngaahi Uiuiʻí, hoko atu ki he Ngaahi Uiuiʻi Fakauooti pe Fakakoló pea toki hoko ki he Kau Finemuí. ʻE lava ke maʻu mo ha ngaahi maʻuʻanga tokoni lahi ange ʻi he YoungWomen.ChurchofJesusChrist.org.

Fakamatala Fetuʻutakí

Kuo lava ʻeni ke vahevahe ʻe he kāingalotu ʻo e Siasí naʻe ngāue fakafaifekau talu mei he 2000 ʻenau fakamatala fetuʻutakí mo ʻenau kau taki ngāue fakafaifekau mālōloó ʻo fakafou ʻi ha tohi tuʻasila fakamisiona foʻou ʻi he polokalama Member Tools. ʻI he hū ki he polokalamá, ʻoku fakaʻatā ai ʻe ha faifekau kimuʻa ʻa e kau taki fakamisioná ke vakai ki hono hingoá pe fakamatala fetuʻutakí. ʻE lava leva ke fakaʻaongaʻi ʻe he kau taki fakamisioná ʻa e fakamatala ko ʻení ke fetuʻutaki ai mo e kau faifekaú, fakafoʻituitui pea mo fakakulupu fakatouʻosi.

Ongoongoleleí maʻá e Fānaú

ʻOku lava ke maʻu ʻa e sēnolo YouTube ko ʻení ʻi he taimí ni ʻi he lea faka-Pilitāniá, faka-Potukalí mo e faka-Sipeiní. ʻOku fakaʻatā e fānaú ʻe he konga foʻou ʻo e Gospel Library ʻoku ui ko e Fānaú ke nau ako ʻi he ngaahi talanoá, vitioó mo e ngaahi ʻekitivitī fengāueʻakí.

Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní

Kuo kakato ʻi he taimí ni ʻa e ngaahi fakaleleiʻi fakamuimuitahá ʻi he lea faka-Pilitāniá, mo ha ngaahi lea fakafonua kehe ʻe hoko mai lolotonga ʻo e 2022.