“Camille N. Johnson,” Liahona, Mē 2022.
Camille N. Johnson
Palesiteni Lahi ʻo e Fineʻofá
Ne “ongoʻi lata maʻu pē” ʻa Kamila N. Sionisoni ʻi he Fineʻofá.
Naʻá ne fakamatala fekauʻaki mo ʻene ngaahi aʻusia ʻi he Fineʻofá, ʻo kau ai ʻa e taʻu ʻe 30 ʻo ʻene ʻi he ngaahi uooti fakafāmili ʻi he ʻIunaiteti Siteití mo Peluú ʻo pehē, “Naʻá ku maʻu ha ongo fakatokoua ʻi he lotolotonga ʻo ha houʻeiki fafine ne nau kehe meiate au. ʻOku ou manumanumelieʻia ʻi he ivi mo e poto ʻo e kau fafine ʻi he Fineʻofá.”
Kuó ne maʻu ha kau faifakahinohino mo ha ngaahi kaungāmeʻa ʻi he Fineʻofá, kau ai ha niʻihi ʻoku nau matuʻotuʻa ange mo siʻi ange ʻiate ia.
Naʻe pehē ʻe Sisitā Sionisoni, “Ko ha kau fafine kotoa pē kitautolu ʻoku tau maʻu ha aʻusia tatau ʻi heʻetau holi ke foki ki hotau ʻapi fakalangí ka ʻoku tau maʻu ha ngaahi aʻusia kehekehe te tau lava ʻo fakaʻaongaʻi ke fetokoniʻaki ai.”
Kuo hoko ʻa Sisitā Sionisoni ko e Palesiteni Lahi ʻo e Palaimelí ʻi he taʻu kuo ʻosí. ʻE kamata ʻene fua fatongia ko e Palesiteni Lahi ʻo e Fineʻofá ʻi he ʻaho 1 ʻo ʻAokosí.
Ko e taha ʻo hono ngaahi uiuiʻi ʻokú ne saiʻia taha aí ko e faiako ʻi he Fineʻofá.
“Kuó u fiefia ʻi he faingamālie ke fakakau mai ʻa e kau fafiné pea ke akoʻi au ʻe he Laumālié pea mo e niʻihi kehé lolotonga ʻa e houa toputapu ko ia ʻo e Fineʻofá. Ko e feituʻu ia ʻoku tau lea ai ʻia Kalaisi pea fiefia ʻia Kalaisi mo aleaʻi ʻa e ngaahi meʻa ʻo e lotó.”
Naʻe fāʻeleʻi ʻa Kamila Nito Sionisoni ʻi he ʻaho 12 ʻo Sepitema 1963, kia Hala mo Tolofī Nito ʻi Pokatelo, ʻAitahō, USA. Naʻá ne mali mo Takilesi R. Sionisoni ʻi he ʻaho 31 ʻo Siulai, 1987, ʻi he Temipale Salt Lake. ʻOkú na maʻu ha foha ʻe toko tolu mo ha makapuna ʻe 5.
Naʻá ne ʻosi mei he ʻUnivēsiti ʻo ʻIutaá ʻi he lēsoni faka-Pilitāniá ʻi he 1985 pea mei he ʻUnivēsiti ʻo ʻIutā ʻApiako Lao ʻa S. J. Quinney ʻi he 1989. Naʻá ne ngāue ʻi ha taʻu ʻe 30 tupu ko ha loea pea naʻe hoko ko e palesiteni ʻo e kautaha lao Snow Christensen & Martineau.
Naʻe hoko foki ʻa Sisitā Sionisoni kimuʻa ko ha palesiteni ʻo e Kau Finemuí ʻi he uōtí, ko ha mēmipa ʻo e kau palesitenisī ʻo e Fineʻofá mo e Palaimelí ʻi he uōtí pea mo ha faiako ʻi he Tokāteline ʻo e Ongoongoleleí mo e Fineʻofá. Naʻá ne ngāue foki mo hono husepānití mei he 2016 ki he 2019 lolotonga ʻene tokangaʻi ʻa e Misiona Peru Arequipa.