“ʻEletā Jonathan S. Schmitt,” Liahona, Mē 2022.
ʻEletā Jonathan S. Schmitt
Fitungofulu Taki Māʻolungá
ʻOku pehē ʻe ʻEletā Sonatane S. Simiti ko e “fakaʻataʻatā hono taimí” ʻa e meʻa ʻokú ne toʻotoʻo mai ki hono uiuiʻi ko ha Fitungofulu Taki Māʻolunga ne toki poupouʻí.
Naʻá ne pehē, “Ko e meʻa pē ia ʻokú ma maʻú. Ko e ʻuhinga ia ʻo e loto-mafesifesí mo e laumālie fakatomalá ko hono tuku ho lotó ki he ʻesi feilaulaú pea tuku ke fakahoko ʻe he ʻEikí Hono finangaló mei ai.”
Naʻe toe pehē ʻe ʻEletā Simiti, “ʻE lava ke foaki mai ʻe he ʻEikí kiate kitautolu ʻa e mālohi, ngaahi talēniti, mo e ngaahi meʻa-foaki ʻoku tau fie maʻu ke fakahoko ʻaki ʻEne ngāué. Ka ʻo kapau he ʻikai ke tau fakaʻatā kitautolu kiate Ia, ta ʻoku tau filifili ʻiate kitautolu pē kae ʻikai ʻoange ʻa e faingamālié kiate Ia ke tāpuakiʻi kitautolu ʻi heʻetau feinga ke tauhi kiate Iá.
Naʻe fāʻeleʻi ʻa Sonatane Sitīveni Simiti ʻi he ʻaho 16 ʻo ʻEpeleli 1973, ʻi Mesa, ʻAlesona, USA, kia Lōpeti ʻEtuate mo Taieni Laita Simiti. Naʻá ne tupu hake ʻi ʻIuma ʻi ʻAlesona. ʻI he ʻaho 21 ʻo Siulai 1995, naʻá ne mali ai mo ʻAlekisisi Suani ʻIutolo ʻi he Temipale Mesa Arizona. Ko ha ongomātuʻa kinaua ki ha fānau ʻe toko fā.
Naʻe maʻu ʻe ʻEletā Simiti ha mataʻitohi B.A. ʻi he ngoué mo e maʻuʻanga tokoni fakaʻekonōmiká ʻi he 1997 pea mo ha mataʻitohi toketā ʻi he laó ʻi he 2000 mei he ʻUnivēsiti ʻo ʻAlesoná fakatouʻosi.
Hili ʻene hoko ko ha kalake lao ki he Fakamaauʻanga Lahi ʻo ʻAlesoná, naʻá ne ngāue ko ha loea ʻi he kautaha lao fakavahaʻapuleʻanga ʻo e Akin Gump Strauss Hauer & Feld LLP. Naʻá ne ngāue kimui ange ko ha loea mo ha faifaleʻi fakalao ki he Baker Hughes Incorporated. ʻIkai ngata aí, ka naʻá ne hoko ko ha tokoni palesiteni ʻi he ʻUnivēsiti ʻo e Siteiti ʻAlesoná.
Naʻe hoko ʻa ʻEletā Simiti ko ha Fitungofulu Fakaʻēlia ʻi he ʻĒlia ʻAmelika Noate Tonga-hihifó ʻi he taimi naʻe ui ai ia ko ha Fitungofulu Taki Māʻolungá. ʻOku kau ʻi hono ngaahi uiuiʻi kimuʻá ʻa ʻene hoko ko ha palesiteni ʻo e Misiona California San Diego mei he 2014 ki he 2017, palesiteni fakasiteiki, pīsope, tokoni ʻi he kau palesitenisī fakasiteikí, alēleaʻanga māʻolunga, palesiteni ʻo e kōlomu kaumātuʻá, sekelitali pule fakauooti, tokoni ʻi he kau palesitenisī fakasiteiki ʻo e Kau Talavoú, taki ʻi he kulupu ʻo e kau taulaʻeiki lahí, faiako teuteu ngāue fakafaifekau fakasiteiki, mo ha faifekau taimi kakato ʻi he Misiona California Fresno.