Fakamālohia mo Tokoniʻi ʻe he Houʻeiki Fafiné

Naʻe hokohoko atu ʻa e ngāue ʻa e Kau Palesitenisī Lahi ʻo e Fineʻofá ʻi he mītia fakasōsialé pea mo fakahangatonu, ke fakamālohia ʻa e ngaahi fāmilí mo e fakafoʻituituí mo tokoniʻi ʻa e fānau ʻa e ʻOtuá ʻi he funga ʻo e māmaní.

ʻI Māʻasi 2022, naʻe lea ʻa Palesiteni Siini B. Pingihami fekauʻaki mo e fakamanatu taʻu 180 hono fokotuʻu ʻo e Fineʻofá. Naʻá ne pehē, ʻi he ʻaho ní, ʻoku ʻi ai ha kau fafine ʻe toko fitu mo e konga miliona ʻoku nau fakafiemālieʻi ʻa e faingataʻaʻiá, fakahaofi ʻa e ngaahi laumālié, mo fakahoko ʻa e ngaahi taumuʻa tatau ne fokotuʻu ai ʻa e Fineʻofá ʻi he 1842.

Naʻe ʻaʻahi ʻa Palesiteni Pingihami mo Sisitā Seuloni ʻIupengi, Tokoni ʻUluaki ʻi he Kau Palesitenisī Lahi ʻo e Fineʻofá mo e palesiteni ʻo e Kautaha Tokoni ʻOfa ʻa e Siasí, ki ha ngaahi fonua lahi ʻi he Hahake Lotolotó. Naʻe pehē ʻe Palesiteni Pingihami ʻi Kailo, ʻIsipite, naʻá ne tanganeʻia ʻi he “feʻofaʻaki ʻoku maʻu ʻe he Kāingalotú.” Naʻe ʻaʻahi foki ʻa Palesiteni Pingihami mo Sisitā ʻIupengi ki ha ʻapitanga kumi hūfanga ʻi Ketisitani, ʻa ia kuo tokoni ai ʻa e Siasí ʻaki ha ngaahi nofoʻanga.

Naʻe ʻaʻahi ʻa Sisitā Leina I. ʻApēto, ko e Tokoni Uá, ki Sipeini fakataha mo Sisitā Mīsela D. Keleki, ko e Tokoni ʻUluaki ʻi he Kau Palesitenisī Lahi ʻo e Kau Finemuí. Naʻe pehē ʻe Sisitā ʻApēto ʻi ha fakataha lotu maʻá e fānaú mo e toʻu tupú, “ʻOku tolonga pea ope atu ʻa e melino ʻa e ʻOtuá ʻi he meʻa kotoa pē ʻoku kovi ʻi he māmaní.”

Naʻe tohi ʻe he Kau Palesitenisī Lahi ʻo e Fineʻofá ʻi he mītia fakasōsialé ha ngaahi pōpoaki fekauʻaki mo e meʻakai fakatupu moʻui lelei ki he fānaú, tuʻunga leleí, mo e moʻui leleí, ʻo fakafekauʻaki mo e Potungāue Uelofea mo e Moʻui Fakafalala Pē Kiate Kita ʻa e Siasí ke fakaaʻu ki he mātuʻá ha ngaahi pōpoaki fekauʻaki mo e ngaahi lelei ʻo e fanofanó, vai inu maʻá, fili ʻo e meʻakai fakatupu moʻui leleí, fakahuhu ʻo e pēpeé, huhu maluʻí, maʻá mo e ʻaʻahi ki he kilīnikí.

Kuo poupouʻi foki ʻe he kau palesitenisií ʻa e kau fafiné ke vahevahe ʻenau ngaahi ongo fekauʻaki mo e meʻa te ne fakaʻaiʻai kinautolu ke nau kau kakato ange ki he Fineʻofá pea mo e founga ke fakakau atu ai ʻa e taha kotoa ki he Fineʻofá mo toe poupou angé.