“ʻEletā Denelson Silva,” Liahona, Mē 2022.
ʻEletā Denelson Silva
Fitungofulu Taki Māʻolungá
Naʻe maʻu ʻe ʻEletā Tenelisoni Siliva mo hono uaifi ko Lēsiná ha taimi ke fakakaukau ai ki ha ueʻi fakalaumālie ne na maʻu ʻi heʻena fononga foki maile ʻe 4,000 (kilomita ʻe 6,400) mei Luanata, ʻEngikola ki Sao Paulo, Palāsilá. Hili ʻa e hoko ʻa ʻEletā Siliva ko ha palesiteni fakamisioná, naʻá ne ongoʻi ʻoku ʻikai totonu ke ne kumi mo hono uafí ha ʻapi.
Naʻá na fakatau atu hona ʻapí kimuʻa peá na toki ʻalu ʻo ngāue fakafaifekaú. Naʻá na palani ke fakatau ha ʻapi foʻou ʻi heʻena fokí ka naʻá na ongoʻi naʻe ueʻi kinaua ke na tatali. Naʻe pehē ʻe ʻEletā Siliva, “Ko e ngaahi fale ʻi Palāsilá ʻoku ʻikai ko ha koloa ia te te tuku hake pē ke fakatau atú pea fakatau leva he taimi pē ko iá. ʻE lava ke lau ʻaho pe lau māhina pe ngaahi taʻu lahi.”
Naʻe pehē ʻe Sisitā Siliva ne na tokanga taha ki he foʻi moʻoni naʻe tataki kinaua ʻe he Tamai Hēvaní kimuʻa ʻi heʻena ngāue fakafaifekaú pea te Ne toe tataki pē kinaua. Naʻá ne pehē, “Naʻá ma fakakaukau fakataha ke tatali ʻi ha kiʻi taimi.” Ne na fili ke na nofo fale totongi pē.
Hangē ko hono fakatau atu ha fale ʻi Palāsilá, naʻe ʻikai maʻu ʻa e talí ʻi ha ngaahi ʻaho pe māhina pe ha taʻu. Naʻe maʻu ʻa e talí ʻi ha taʻu ʻe ua mei ai ʻi hono maʻu ʻe ʻEletā Siliva ha uiuiʻi ke hoko ko ha Fitungofulu Taki Māʻolungá.
Naʻe pehē ʻe ʻEletā Siliva, “Kuo pau ke tau fakakaukau kapau te Ne kole mai ke tau fai ha meʻa, ko ʻetau talí ko e ʻio maʻu pē. Kapau ʻoku ʻikai ko e talí ko e ʻʻio’ maʻu pē, ʻoku ʻi ai leva ha faingamālie ki ha tali ʻʻikai’ pe ʻmahalo pē.’” Ka, ki he Fakamoʻuí, ʻokú Ne folofola ʻo pehē, “naʻe ʻikai ha feituʻu moʻó e ʻʻikaí’ pe ʻmahalo peé’ ʻi Ketisemani.”
Naʻe fāʻeleʻi ʻa Tenelisoni ʻUpano Tā Siliva ʻi he ʻaho 4 ʻo Siulai 1965, ʻi Lesife, Palāsila, kia Tomingikou ʻUpano tā Siliva mo Malia Hōsea tī ʻAlameita Siliva. Naʻá ne tupu hake ʻi Lesife pea naʻe silaʻi ia kia Lēsina Malia tī Kāvalo Siliva ʻi he Temipale São Paulo Brazil ʻi Mē ʻo e 1987. ʻOkú na maʻu ha foha ʻe toko ua.
ʻOkú ne maʻu ha mataʻitohi BA ʻi he pule fakapisinisí (ngāue ki he fakamatalá). Naʻá ne ngāue ʻi he tafaʻaki folaú ʻi ha taʻu ʻe 30.
Naʻe hoko ʻa ʻEletā Siliva mei he 2016 ki he 2019 ko ha palesiteni fakamisiona mo hono uaifí ʻi he Misiona Angola Luanda. Kuó ne hoko foki ko ha Fitungofulu Fakaʻēlia, palesiteni fakasiteiki, pīsope, alēleaʻanga māʻolunga, mo ha faifekau taimi kakato ʻi he Misiona Brazil Curitiba.