“J. Anette Dennis,” Liahona, Mē 2022.
J. Anette Dennis
Tokoni ʻUluaki ʻi he Kau Palesitenisī Lahi ʻo e Fineʻofá
Hili ʻa e nofo ʻa Sisitā Sīnī ʻAneti Tenisi ʻi heʻene kei siʻí ʻi ha ngaahi feituʻu kehekehe ʻi he ʻIunaiteti Siteití, naʻá ne pehē kuo hoko ʻo moʻoni ʻene ngaahi fakaʻānauá ʻi he taimi naʻe hiki ai hono fāmilí ki Kōtoniuti Haiti, ʻIutaá.
Naʻá ne pehē, “Naʻá ku pehē naʻe kau ʻa e tokotaha kotoa pē ʻi ʻIutā ki he Siasí pea ʻe hoko ʻeni ko ha maluʻanga.”
ʻI hono ngaahi fuofua ʻaho ʻi he kalasi hivá, naʻá ne fiefia ʻi hano fakaafeʻi ia ki ha paati. Ka naʻe fakatokanga ange ha finemui naʻe hoko ko hono kaungāmeʻa lelei tahá ʻe fakaʻaongaʻi ʻe he kakai ʻi he pātí ʻa e faitoʻo konatapú.
Naʻá ne pehē, “Naʻá ku ako vave ʻaupito ʻoku ʻi he feituʻu kotoa pē ʻa e filí.” Ka naʻe hanga ʻe heʻene fakamoʻoní mo ha ʻapi naʻe fakatefito ʻi he ongoongoleleí, ʻo fakamālohia ia ʻi he kotoa ʻo hono ngaahi taʻu ʻi he ako māʻolungá.
Naʻe fāʻeleʻi ʻa Sīnī ʻAneti Heilini ʻi Polovo, ʻIutā, ʻi Sune 1960, pea ko e lahi taha ia ʻi he fānau ʻe toko fitu ʻa Kētisi Lama mo Petulisa Soana Heiliní. Naʻe ʻave ʻe he ngāue maʻuʻanga moʻui ʻa ʻene tamaí ʻa e fāmilí ki Misisipi, Tenesī, ʻAiouā, Nepulasikā, mo ʻIutā.
Naʻá ne ako ʻo fakatefito ʻi he ako lautohi siʻí ʻi he ʻUnivēsiti Pilikihami ʻIongí pea pea naʻá ne toʻo mo e lea faka-Sipeiní. Lolotonga haʻane fononga fakakalasi ki Mekisikou, naʻá ne fetaulaki ai mo Siaosi Tenisi, pea kamata ke na fetohiʻaki.
ʻI he hiki ʻa Siaosi ki Sōleki Siti hili ha taʻu ʻe taha mei ai ke ako ʻa e lea faka-Pilitāniá, naʻe kamata ke na teiti. Hili ha ngaahi māhina siʻi, naʻá na fakamaʻu. Naʻá na mali ʻi he Temipale Salt Lake ʻi he ʻaho 4 ʻo Sepitema, 1980. ʻOku ʻi ai haʻana fānau ʻe toko fā mo e makapuna ʻe toko hiva. ʻOkú na nofo ʻi Mahu, ʻIutā.
Naʻe hikinimaʻi ʻa Sisitā Tenisi ʻi he ʻaho 2 ʻo ʻEpelelí, pea te ne kamata ngāue ʻi he ʻaho 1 ʻo ʻAokosí ko e Tokoni ʻUluaki ʻi he Kau Palesitenisī Lahi ʻo e Fineʻofá. ʻOkú ne kau ʻi he fakataha alēlea faleʻi lahi ʻa e Palaimelí pea mo hono husepānití ʻi he fakataha alēlea fetuʻutaki ʻa e Vahefonua Teivisí.
Naʻá ne ngāue mo hono husepānití mei he 2013 ki he 2016 ʻi heʻene tokangaʻi ʻa e Misiona Ecuador Guayaquil West. Naʻá ne hoko foki ko ha tokoni ki he metuloni ʻo e Temipale Guayaquil Ecuador, sekelitali ʻo e Fineʻofá ʻi he siteikí, palesiteni Palaimeli ʻi he uōtí, tokoni ʻi he kau palesitenisī ʻo e Fineʻofá mo e Kau Finemui ʻi he uōtí, faiako ʻi he Fineʻofá, mo ha tokotaha ngāue ouau ʻi he temipalé.