“ʻEletā Mark D. Eddy,” Liahona, Mē 2022.
ʻEletā Mark D. Eddy
Fitungofulu Taki Māʻolungá
ʻI he faʻahitaʻu māfana kimuʻa pea taʻu fakaʻosi ʻa ʻEletā Maʻake D. ʻEti ʻi he akoʻanga māʻolungá, naʻe fakaafeʻi ia ʻe ha faiako semineli pea mo ha kau mēmipa kehe ʻo ʻenau fakataha alēlea semineli ʻa e kau akó ke nau lau ʻa e Tohi ʻa Molomoná. Kuo tuʻo lahi ʻene lau ia mo hono fāmilí, ka ko e fuofua taimi ʻeni ke ne lau toko taha ai iá.
Naʻá ne pehē ke lotu kimuʻa pea mo e ʻosi ʻene laukongá ʻi he ʻaho takitaha. Naʻá ne ʻamanaki ke maʻu ha tali mahino fekauʻaki mo e moʻoni ʻo e tohí ʻi loto ʻi ha uike ʻe taha pe ua. Hili haʻane laukonga ʻo laka hake ʻi he māhina ʻe uá, naʻe teʻeki pē ke ne maʻu ʻa e fakapapau naʻá ne ʻamanaki ki aí.
ʻI ha ngaahi houa lahi kimuʻa pea fakahoko ha fakataha lotu “talitali lelei” ʻa e seminelí ʻa ia naʻe kole ange ai ke fai ʻe ʻEletā ʻEti ʻene fakamoʻoní, naʻá ne aʻu vave ki ai ke tokoni ʻi he fokotuʻutuʻú. Naʻá ne maʻu leva ha feituʻu lōngonoa ke lau ai ʻa e Tohi ʻa Molomoná mo lotu.
Naʻá ne pehē, “Naʻá ku maʻu ai ʻa e ongo mahino mo taʻeueʻia ko ia ʻoku moʻoni [e Tohi ʻa Molomoná]. Naʻe hokosia mai ia ʻi he taimi totonu ki heʻeku fakamoʻoni ʻi he efiafi ko iá. Naʻe feʻunga ʻa e ongo ko iá mo ha ngāue feʻunga ke maʻu ai iá pea tolonga ia ʻo fuoloa feʻunga ke ʻoua naʻa toe ngalo ʻiate au.”
Naʻe fāʻeleʻi ʻa ʻEletā Maʻake Tēvita ʻEti ʻi Long Beach, Kalefōnia, USA, ʻi he ʻaho 30 ʻo Māʻasi 1973, kia Lisiate Kalitoni ʻEti mo Mele Luʻisa Sēvesi ʻEti. Naʻá ne tupu hake ʻi ʻŌlemi ʻi ʻIutā, peá ne mali mo ʻĀneti “Ane” ʻĒleni ʻi he Temipale Provo Utah ʻi ʻAokosi 1994. ʻOkú na maʻu ha fānau ʻe toko ono.
Naʻe ʻosi ʻa ʻEletā ʻEti mei he ʻUnivēsiti Pilikihami ʻIongí ʻi he 1996 mo ha mataʻitohi BA ʻi he fetuʻutakí pea maʻu mo hono mataʻitohi Toketā Laó mei BYU ʻi he 2001. Talu mei ai mo ʻene ngāue ko ha loea mo ha pule pisinisi.
Kuo hoko ʻa ʻEletā ʻEti ko ha Fitungofulu Fakaʻēlia, palesiteni ʻo e Misiona Uruguay Montevideo, tokoni ʻi ha kau palesitenisī fakasiteiki, pīsope, alēleaʻanga māʻolunga, tokoni ʻi ha kau pīsopeliki, palesiteni ʻo e Kau Talavou ʻi he uōtí, mo ha faifekau taimi kakato ʻi he Misiona Dominican Republic Santo Domingo East.