Ko Hono Faitokonia ʻo e Māmaní Kotoa

ʻOku hokohoko atu e ngāue ʻa e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻenau hoko ko e kau palōfita, kau tangata kikite, mo e kau tangata maʻu fakahaá, ʻo fakamoʻoniʻi ki he funga ʻo e māmaní ʻa hono Fakafoki Mai ʻo e ongoongoleleí pea mo e ngaahi tāpuaki ʻo e muimui ki he Fakamoʻuí. Ko ha niʻihi pē ʻeni ʻo e ngaahi meʻa kuo nau fakakakato talu mei he konifelenisi lahi kuo ʻosí.

Kau Mēmipa ʻo e Kau Palesitenisī ʻUluakí

Vakai ki he peesi 135 ke maʻu ha fakamatala fakanounou ʻo e ngaahi ngāue ʻa Palesiteni Palesiteni Lāsolo M. Nalesoni talu mei he konifelenisi lahi kuo ʻosí.

Naʻe pehē ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí ʻi haʻane lea ʻi ha ʻunivēsiti ʻi Loma, ʻĪtali, ʻoku ʻomi ʻe he tauʻatāina fakalotú ha ngaahi lelei lahi ki he sosaietí, pea naʻá ne poupouʻi ʻa e kakai tuí ke “kumi ha ngaahi founga ke nau feakoʻaki ai pea mo fakamālohia ʻa e ngaahi fakakaukau angamaheni ʻoku nau pukepuke fakataha kitautolú.”

Kau Mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá

Naʻe ngāue ʻa Palesiteni M. Lāsolo Pālati, ko e Palesiteni Leʻoleʻó, pea mo ʻEletā Sefilī R. Hōlani mo ʻEletā Kuenitini L. Kuki ʻi Pilitānia Lahi, ʻo fakataha mo e kau faifekaú mo e kāingalotu ʻo e Siasí. Naʻe ngāue fakafaifekau kotoa ʻa e toko tolú ni ʻi Pilitānia ʻi he taimi ne nau kei talavou aí, pea naʻe hoa ʻa ʻEletā Hōlani mo ʻEletā Kuki.

Naʻe lea ʻa ʻEletā Tēvita A. Petinā ʻi ha fakataha lotu ʻi Soatani. ʻI he Ngaahi Fonua Fakatahataha ʻo ʻAlepeá, naʻá ne fakataha ai mo e kau taki ʻo e Siteiki ʻApa Tapí ʻo ʻaʻahi ki ha feituʻu ʻe tuʻu ai ha temipale ʻi ha ʻaho. Naʻá ne fetaulaki ʻi Pāleini mo e kāingalotu ʻo e Uooti Manamaá peá ne fakahoko ha fakataha lotu ai maʻá e toʻu tupú.

Naʻe hoko ʻa ʻEletā D. Toti Kulisitofāsoni ko e fuofua ʻAposetolo ke ʻaʻahi ki he Lepupelika ʻo Kamipiá. Naʻá ne fakataha mo e palesitení, hoa ʻo e palesitení, mo e tokoni palesiteni ʻo e lepupeliká pea nau aleaʻi ha fengāueʻaki fakataha ʻi he vahaʻa ʻo e Siasí mo e polokalama ʻa e hoa ʻo e palesitení ke tokoniʻi ʻa kinautolu ʻoku faingataʻaʻiá. Naʻe toe ʻaʻahi foki ʻa ʻEletā Kulisitofāsoni ki ʻAivolī Kousi, Naisīlia, mo Kana.

Lolotonga ʻa e ngaahi fakataha mo e ako ʻa ʻEletā Niila L. ʻEnitaseni ʻi Kolomupia mo ʻEkuatoá, naʻá ne manatuʻi ʻa e kāingalotu tokolahi ʻo e Siasí kuo nau pekia koeʻuhí ko e COVID. Naʻá ne fakataha mo e kau faifekaú, kau palesiteni fakamisiona ʻe toko 36 mo honau ngaahi uaifí, mo e kau taki fakasiteikí, ʻo ne faʻa lea faka-Sipeini. Naʻá ne lea ʻi ha fakataha lotu ʻi Kolomupia fekauʻaki mo hono fakamālohia ʻo e nofo-malí mo e fāmilí.

ʻI Panamaá, naʻe hoko ʻa ʻEletā Keuli E. Sitīvenisoni ko e fuofua ʻAposetolo ke ʻaʻahi ki he motu ko Kati Tupilé ʻi he ʻOtu Motu Sani Palasí, ʻa ia ʻoku tuʻu ʻi he vahefonua Kuna ʻIalá ʻo meimei houa ʻe ua mo e konga mei Panamā Siti.

Naʻe lea ʻa ʻEletā Keuliti W. Kongo ki he toʻu tupu ʻi Filipainí fekauʻaki mo hono fakahoko ʻo e ngaahi fili fakapotopotó pea mo hono toʻo kiate kinautolu ʻa e huafa ʻo Sīsū Kalaisí. Naʻá ne fakataha mo e kau faifekaú, pea ʻi ha fakamafola naʻe fai ʻi he ʻOtu Filipainí naʻá ne lea ki he kau taautaha kei talavoú.

ʻI he fonua tupuʻanga ʻo ʻUlise Soālesi ko Palāsilá, naʻá ne faleʻi ai ʻa e kakai lalahi kei talavoú ke fakatefito ʻenau moʻuí ʻi he Fakamoʻuí. Naʻá ne talaange ki he kau faifekaú ke ngāueʻi ʻenau tui kia Sīsū Kalaisí pea tuʻu maʻu ʻi he moʻoní. Hili ha ngaahi māhina mei ai, naʻe foki ʻa ʻEletā Soālesi ki Palāsila ke lea ʻi ha fakatahaʻanga ʻo e tauʻatāina fakalotú. Naʻá ne fakataha foki mo e tokoni palesiteni ʻo e Lepupelika Tominikaní pea mo e ʻamipasitoa Kiupa ki he fonua ko iá. ʻOku maʻu ʻe he Siasí ha vahefonua ʻe taha mo ha kolo ʻe fā ʻi Kiupa.

ʻI ha ngaahi fakataha fakavitiō, naʻe lea ʻa ʻEletā Tieta F. ʻUkitofa ki he toʻu tupú, kau faifekaú, mo e kau taki ʻo e Siasí ʻi ʻĒsiá; naʻe lea ʻa ʻEletā Kuenitini L. Kuki ki he kakai lalahi kei talavou ʻi ʻIulope, ʻIulope Hahake, ʻAfiliká, mo e Ngaahi ʻĒlia Hahake Lotolotó; ʻEletā D. Toti Kulisitofāsoni ki he kakai lalahi kei talavou lea faka-Potukalí; ʻEletā Niila L. ʻEnitaseni ki he kakai lalahi kei talavou ʻoku nofo ʻi ʻAmelika Latina mo Sipeiní; ʻEletā Lōnolo A. Lasipeni ki he kakai lalahi kei talavou lea faka-Pilitāniá; pea mo ʻEletā Teila G. Lenilani ki he kakai lalahi kei talavou lea faka-Falaniseé.