“Kristin M. Yee,” Liahona, Mē 2022.
Kristin M. Yee
Tokoni Ua ʻi he Kau Palesitenisī Lahi ʻo e Fineʻofá
ʻI ha māmani ʻoku fakautuutu hono fakaʻilongaʻi ʻe he ʻā vahevahé mo e liʻekiná, kuo mamata ʻa Sisitā Kilisitina M. Ī ki ha ngaahi faitoʻo fakamoʻui ki he ngaahi faingataʻa fakasōsiale ko iá ʻo fakafou ʻi he ongoongolelei ʻo Sīsū Kalaisí mo e Fineʻofá.
Naʻá ne pehē, “ʻOku fakatahaʻi kitautolu ʻe he Fineʻofá ʻiate Ia. Ko e fē pē ha feituʻu ʻoku ou folaua ʻi he māmaní, ʻoku ou fekumi ki hoku ngaahi tokoua ʻi he Fineʻofá, pea ʻoku ou ongoʻi ʻoku ʻofaʻi mo ʻiloʻi au he taimi pē ko iá. ʻOku ʻi ai ha meʻa ʻoku faitatau ai ʻa Kalaisi pea mo ʻetau fakamoʻoni kiate Iá.”
ʻOku fakahoko ʻaki ʻe Sisitā Ī, ʻa ia naʻe lolotonga ngāue ʻi he fakataha alēlea faleʻi lahi ʻa e Palaimelí, ʻa hono uiuiʻi foʻou ko e Tokoni Ua ʻi he Kau Palesitenisī Lahi ʻo e Fineʻofá, ha fakapapau ʻoku ʻikai ke ne ngāue toko taha pē.
Naʻá ne pehē, “Ko e ʻEikí ʻoku pulé, pea ʻoku ou falala kiate Ia. ʻOku ou toe ongoʻi mālohi foki ʻoku tau fie maʻu ʻa e tokotaha kotoa pē ʻi Heʻene ngāué. ʻOku tau maʻu kotoa ha fatongia, pea ʻe lava ke tau hoko fakataha ko ha konga ʻo e ngāue ko ʻení. ʻOku ou houngaʻia ʻaupito ʻi ha faingamālie ke u tokoni ai.”
Naʻe fāʻeleʻi ʻa Kilisitina Mae Ī ʻi he ʻaho 5 ʻo Mē 1981, ʻi Sākalameno, Kalefōnia, USA, kia Laieni R. Ī mo Seiteni Fōkesi Makei. Naʻá ne hiki kimui ange ki ʻAitahō, USA, pea hoko atu ki ʻIutā.
Naʻá ne ʻilo ʻi heʻene kei siʻí ha ʻofa mo ha talēniti ki he ʻātí fakatouʻosi, ʻa ia kuó ne tataki hono ngaahi halanga fakaakó mo e fakapalōfesinalé. ʻOkú ne maʻu ha ngaahi mataʻitohi M.A. ʻi he ngaahi ʻaati leleí mei he ʻUnivēsiti Pilikihami ʻIongi–ʻAitahoó mo e ʻUnivēsiti Pilikihami ʻIongí. Naʻá ne maʻu ʻi he 2019 ha mataʻitohi M.A. ʻi hono tokangaʻi ʻo e kakaí mei BYU.
Naʻe tataki ʻa Sisitā Ī ʻe heʻene ngaahi taukei fakaʻātí ki ha tuʻunga ko ha tokotaha tā valivali mo faʻu faiva ʻi he Disney Interactive Studios, ʻa ia naʻá ne ngāue ai ʻi ha taʻu ʻe 13. ʻOkú ne puleʻi ʻi he taimí ni ʻa e timi faʻu faiva fakatātā ʻa e Siasí. ʻOku kau ʻi heʻene ngaahi tā valivali ʻoku fakaʻaongaʻi ai ʻa e ongoongoleleí ha ngaahi tā ʻo e ngāue fakafaifekau ʻa e Fakamoʻuí ʻi he māmaní.
Kuo ngāue ʻa Sisitā Ī ʻi ha ngaahi uiuiʻi lahi ʻi he Siasí, ʻo kau ai ʻene hoko ko ha palesiteni Fineʻofa ʻi he siteikí, tokoni mo ha faiako ʻi he kau palesitenisī ʻo e Fineʻofa ʻi he uōtí, palesiteni ʻo e Kau Finemui ʻi he uōtí, faiako Tokāteline ʻo e Ongoongoleleí, faifekau fakauooti, mo e tokotaha ngāue ouau ʻi he temipalé.