ʻEletā Isaac K. Morrison

Fitungofulu Taki Māʻolungá

ʻOku pehē ʻe ʻEletā ʻAisake K. Molisoni kuo teʻeki ke ne maʻu mo hono uaifí ha mohe feʻunga talu mei hono fakahoko ange ʻe Palesiteni Lāsolo M. Nalesoni ha uiuiʻi kia ʻEletā Molisoni ke hoko ko ha Fitungofulu Taki Māʻolungá.

Naʻá ne pehē, “ʻOkú ma ʻilo ʻe hoko ʻeni ko ha hala fononga maʻamaua. Te ma falala ki he ʻEikí ke Ne fakahā mai ʻa e meʻa ʻoku totonu ke ma faí.”

Naʻe uiuiʻi ʻa ʻEletā Molisoni ko ha palesiteni fakasiteiki ʻi he 2012, Fitungofulu Fakaʻēlia ʻi he 2018, pea palesiteni ʻi he Misiona Ghana Cape Coast ʻi he 2020.

Naʻá ne pehē, “Kuo hoko mai ʻa e uiuiʻi kotoa pē ʻi ha taimi naʻe ʻikai ke u ʻamanaki au ki ai. Ka ʻoku ou falala ki he ʻEikí kae ʻikai ko hoku poto ʻoʻokú.”

ʻOku maʻu ʻe ʻEletā Molisoni ha mataʻitohi MA ʻi he saienisí ʻi hono tokangaʻi ʻa e founga ngāué mo e tuʻunga fakatakimuʻá mei he ʻUnivēsiti Uame Kuluma ʻo e Saienisí mo e Tekinolosiá ʻi Kana. Kuó ne ngāue maʻá e Siasí ʻi ha ngaahi fatongia kehekehe talu mei he 2004, naʻe hoko kimuí ni mai ko e taki mo e pule tokoni ʻo e mēmipá ki ʻAfilika Hihifo.

Naʻe fāʻeleʻi ʻa ʻAisake Kofi Molisoni ʻi he ʻaho 25 ʻo Nōvema, 1977, ʻi Takolati, Kana, kia Siosefa Koso Molisoni mo Mele Efua Opua Safo.

ʻI he kei siʻi ʻa ʻEletā Molisoní, naʻá ne maʻulotu mo hono fāmilí ʻi ha siasi ʻe taha. ʻI heʻene hiki ʻo nofo fakataha mo e fāmili ʻo ʻene faʻētangatá ke ako ʻi he akoʻanga māʻolungá, naʻá ne ʻalu ki he ngaahi fakatahaʻanga ʻa e Siasí mo nautolu pea toki ʻalu ki he ngaahi fakatahaʻanga ʻo hono siasí. Naʻe fakaafeʻi ia ʻe ha faiako semineli pongipongi ke kau ange ki he seminelí, ʻo ne fetaulaki ai mo Hena Naiakó.

Naʻá ne pehē, “Naʻá ne poto ʻaupito pea naʻá ne fakahoko maʻu pē ha ngaahi tali lelei. Naʻe fakaʻaiʻai ai au ke u fie ako lahi ange.” Naʻá ne pehē, “Hili ʻeku ako ʻa e Tohi ʻa Molomoná ʻi he taʻu ko iá, naʻá ku mateuteu ke papitaiso.”

ʻI he ʻaho 18 ʻo Tīsema, 2004, naʻá ne mali ai mo Hena ʻi Takolati peá na sila hili ha ʻaho ʻe tolu mei ai ʻi he Temipale Accra Ghana. ʻOkú na maʻu ha ngaahi foha ʻe toko tolu.

Makehe mei he ngaahi uiuiʻi kehe ʻo ʻEletā Molisoní, kuó ne hoko ko ha tokoni ʻi he kau palesitenisī fakasiteikí, pīsope, tokoni ʻi he kau pīsopelikí, palesiteni ʻo e kōlomu ʻo e kaumātuʻá, faiako Tokāteline ʻo e Ongoongoleleí, faiako semineli, mo ha faifekau taimi kakato ʻi Naisīlia.