“Tracy Y. Browning,” Liahona, Mē 2022.
Tracy Y. Browning
Tokoni Ua ʻi he Kau Palesitenisī Lahi ʻo e Palaimelí
Ko e taʻu 15 nai ia ʻa Tuleisi Y. Palauningí ʻi he taimi naʻe sio ai ʻene faʻeé ʻi ha tuʻuaki ʻo e Tohi ʻa Molomoná ʻi ha polokalama televīsone ʻi he poʻulí peá ne kole ai ha tatau taʻetotongi.
ʻI ha kiʻi taimi nounou mei ai, naʻe tukituki e kau faifekau ʻo e Siasí ʻi hono matapaá, foaki ange ʻa e Tohi ʻa Molomoná, mo kamata akoʻi kiate ia e ongoongolelei ʻo Sīsū Kalaisí.
ʻI he taimi ko iá, naʻe nofo ʻa Tuleisi ʻi Niu Sēsī, USA, mo ʻene tamaí, ka naʻá ne faʻa ʻaʻahi ki heʻene faʻeé ʻi Niu ʻIoke, USA. Lolotonga ʻa e ʻaʻahi ʻa Tuleisí, naʻá ne fakatokangaʻi mo fie ʻilo ki he fakalakalaka ʻene faʻeé ke papitaisó.
Naʻe ʻalu ʻa Tuleisi mo ʻene kui fefiné ki ha siasi faka-Kalisitiane, ʻa ia naʻá ne ako ai ʻa e fakavaʻe ʻo e ngaahi tui faka-Kalisitiané. Naʻe ʻikai fuoloa kuo kamata ʻalu ʻa Tuleisi mo ʻene faʻeé ki he lotu Sāpate ʻa e Kāingalotu ʻo e Siasí.
Naʻe hoko ʻa e aʻusia taupotu tahá ʻi he taimi naʻe kau ai ʻa e faʻeé mo e ʻofefiné ʻi he Fakaʻaliʻali ʻi he Moʻunga ko Komolá. Naʻá na tuʻu ʻi he Vaoʻakau Tapú, maʻu lotu, pea naʻe ueʻi ia ʻe heʻene fanongo ki he ngaahi pōpoaki ʻo e ongoongoleleí ʻi ha ngaahi founga foʻou. Naʻe talaange ʻe Tuleisi ki heʻene faʻeé kuó ne mateuteu ke ako lahi ange ki he Siasí.
Naʻe pehē ʻe Sisitā Palauningi, “Hili iá, naʻe vave ʻaupito ʻene ʻomi ʻa e ongo faifekaú ke akoʻi aú.”
Naʻe fāʻeleʻi ʻa Tuleisi ʻIulanitī Palauningi ʻi Niu Lōseli, Niu ʻIoke, ʻi he ʻaho 9 ʻo ʻOkatopa 1976, kia Kalaivi ʻĀtama mo Seiloni Kokisi. Naʻá ne tupu hake ʻi Samaika, Niu Sēsī, mo Niu ʻIoke. Naʻá ne mali mo Puleti Palauningi ʻi he Temipale Salt Lake ʻi he ʻaho 2 ʻo Mē, 1997. ʻOku ʻi ai haʻana fānau ʻe toko ua.
Naʻe ako ʻa Sisitā Palauningi ʻi he ʻUnivēsiti Seni Sioné. Kuó ne ngāue ʻi he tafaʻaki fakapaʻangá ʻi ha taʻu ʻe 15 pea ʻokú ne hoko he taimí ni ko ha talēkita ʻi he Potungāue Pulusi ʻa e Siasí. Kuo ngāue tokoni foki ʻa Sisitā Palauningi ʻi he National Multiple Sclerosis Society, Habitat for Humanity, pea mo e United Way’s Day of Caring.
Kuo hoko ʻa Sisitā Palauningi ko ha tokoni ʻi he kau palesitenisī ʻo e Fineʻofá ʻi he uōtí mo e siteikí, ko ha faiako ʻi he Fineʻofá mo e Lautohi Faka-Sāpaté, pea ʻi he houalotu ʻo e Kau Finemuí. Naʻá ne kau ʻi he fakataha alēlea faleʻi lahi ʻa e Fineʻofá ʻi he taimi naʻe ui ai ia ki he Kau Palesitenisī Lahi ʻo e Palaimelí.