Ngaahi Ngāue ʻa Palesiteni Nalesoní

ʻOku hokohoko atu hono fakaafeʻi ʻe Palesiteni Lāsolo M. Nalesoni ʻa e kakaí kotoa ke haʻu kia Kalaisi pea ako meiate Iá, ʻo fakaʻaongaʻi ʻa e ngaahi fakamafola fakataha lotú mo e ngaahi tohi ʻi he mītia fakasōsialé.

Naʻe poupouʻi ʻe Palesiteni Nalesoni ʻa e kāingalotu ʻo e Siasí ʻi ʻOkalahoma mo Kanisesi, USA, lolotonga ha fakamafola fakataha lotu ʻo pehē, ke fakatefito ʻenau tokangá ʻi ha “taha ʻo e ngaahi meʻaʻofa maʻongoʻonga taha kuo foaki mai ʻe heʻetau Tamai Hēvaní ke fakatefito ai ʻetau moʻuí ʻiate Ia mo Hono ʻAlo ʻOfaʻangá. Ko ʻeku ʻuhingá ki he Tohi ʻa Molomoná. Ko ha meʻaʻofa ia kiate kitautolu mei he ʻOtuá. Ko e maka-tuʻu-loto ia ʻo ʻetau tui fakalotú he ʻoku lekooti ai ʻa e meʻa mahuʻinga tahá, ka ko e uho ʻo ʻEne tokāteliné.”

ʻI ha lea ʻa Palesiteni Nalesoni ki he kāingalotu ʻi Kalefōnia, USA, lolotonga ha fakamafola ʻe taha, naʻá ne fakahoko ai ha fakaafe ʻe tolu: (1) fekumi ki he moʻoní ʻi he lotu, fekumi ʻi he ngaahi folofolá, mo ako e ngaahi lea ʻa e kau palōfitá, kau tangata kikité, mo e kau tangata maʻu fakahaá; (2) fakatupulaki e mālohi fakalaumālié mo e faʻa ʻiloʻiló ʻaki ʻenau fai ha ngaahi fuakava mo e ʻOtuá pea tauhi kinautolu; mo e (3) kau mālohi ʻi hono tokoniʻi ke tānaki ʻa ʻIsilelí.

Pea ʻi ha fakamafola ki ha fonua ʻe 48, naʻe fakamanatu ai ʻe Palesiteni Nalesoni ki he Kāingalotu ʻi ʻIulopé ʻo pehē: “ʻOku feinga ha tokolahi ʻo homou ngaahi kaungāmeʻá ke mahino kiate kinautolu ʻa e ʻuhinga ʻoku nau ʻi heni ai ʻi he māmaní. ʻOku nau fie ʻilo pe ʻoku ʻi ai nai ha ʻuhinga mo ha taumuʻa ʻo e moʻuí. ʻOku nau fie fakahoko ha liliu ʻi he māmaní. ʻOku nau fifili pe ko hai te nau lava ʻo falala ki aí. ʻOkú ke fakatokangaʻi nai ʻokú ke maʻu e tali ʻoku fekumi ki ai ʻa e ngaahi kaungāmeʻa ko iá?”

Naʻe fakaafeʻi kitautolu ʻe Palesiteni Nalesoni ʻi he mītia fakasōsialé ke ʻoua naʻa ngata pē ʻi heʻetau ongoʻi houngaʻiá ka ke fakahaaʻi ia. Naʻá ne fakaafeʻi kitautolu ke tau fakaʻatā ha potu ʻi hotau lotó maʻanautolu “ʻoku faingataʻaʻia ke mamata ki he maama ʻo e Fakamoʻuí mo ongoʻi ʻEne ʻofá.” Naʻá ne poupouʻi kitautolu ke tau “ngāue fakataha ke takimuʻa ʻi hono liʻaki ʻo e ngaahi ʻulungaanga mo e ngaahi tōʻonga ʻo e loto-fakamāú.” Pea naʻá ne fakamoʻoni “ʻoku ʻi ai ha maʻuʻanga tokoni ʻe taha ʻe lava ke tau tafoki kotoa ki ai ke fakatupulaki ʻa e ʻofa ʻoku tau maʻu ki he niʻihi kehé pe ke fakaleleiʻi hotau lotó ʻi he taimi ʻoku mamahi aí—ʻa ia ko e Fakamoʻui ko Sīsū Kalaisí.”