“ʻEletā Ryan K. Olsen,” Liahona, Mē 2022.
ʻEletā Ryan K. Olsen
Fitungofulu Taki Māʻolungá
ʻI he tupu hake ʻa ʻEletā Laieni K. ʻOloseni ʻi Senitī, ʻIutā, USA, naʻe ʻikai teitei tuku ʻe heʻene ongomātuʻá ke mavahe mei fale ʻoku ʻikai ke ne fanongo ki he fakamanatu mahuʻinga ko ʻení: “Manatuʻi ko hai koe.”
Naʻá ne kata mo pehē, “Ne u pāhia he fanongo ki aí ʻi heʻeku kei talavoú. Ka naʻe tokoniʻi au ʻe he ngaahi lea ko iá ke u manatuʻi hoku tuʻunga fakalangí. Naʻá na tokoniʻi au ke u manatuʻi ʻoku ʻi ai ʻeku Tamai Hēvani ʻokú Ne ʻofa ʻiate au pea ko e Fakamoʻuí ʻa hoku kaumeʻa lelei tahá. Ko e meʻa kotoa pē te tau lava ʻo ʻamanaki ke fai pe aʻusiá ʻoku fakafou ia ʻiate Ia pē.”
ʻOku hoko hono fakapapauʻi ange ʻa hono tuʻunga totonú mo e ngaahi sīpinga ʻo ʻene mātuʻá, kaungā ngāue faifekaú, kaungā ngāue ʻi he Siasí mo e kau faifaleʻi fakapisinisi potó ko ha ngaahi founga mahuʻinga ʻe fakaʻaongaʻi ʻe ʻEletā ʻOloseni ʻi heʻene hoko ko ha Fitungofulu Taki Māʻolungá.
Naʻe fāʻeleʻi ia ʻi he ʻaho 11 ʻo ʻOkatopa 1974, pea tupu hake ʻi he Teleʻa Sōleki Sití ʻi ʻIutā, pea ko Laieni Keiki ʻOlosení ko e foha ia ʻo Keiki mo Kefi ʻOloseni.
Naʻe toe mālohi ange ʻa e saiʻia ʻa ʻEletā ʻOloseni ʻi ʻAmelika Latina pea mo e lea faka-Sipeiní ʻi he taimi naʻá ne ngāue fakafaifekau taimi kakato ai ʻi he Misiona Argentina Resistencia. Kimui ange aí, naʻá ne ngāue fakataha mo hono uaifi ko Suli Tolingitoni ʻOlosení ʻi he taimi naʻá ne tokangaʻi ai ʻa e Misiona Uruguay Montevideo West mei he 2016 ki he 2019.
Naʻá ne mali mo Sisitā ʻOloseni ʻi he Temipale Salt Lake ʻi he ʻaho 20 ʻo Nōvema 1998. Ko ha ongomātuʻa kinaua ki ha fānau ʻe toko fā.
ʻI he taimi ne uiuiʻi ai ʻa ʻEletā ʻOloseni ko ha Fitungofulu Taki Māʻolungá, naʻá ne lolotonga hoko ko ha Fitungofulu Fakaʻēlia. Kuó ne hoko foki ko ha palesiteni fakasiteiki, palesiteni misiona fakasiteiki, alēleaʻanga māʻolunga, pīsope, tokoni ʻi ha kau pīsopelikí, mo ha tokoni ʻi ha kau palesitenisī ʻo e Kau Talavou ʻi he uōtí.
Naʻe maʻu ʻe ʻEletā ʻOloseni ha mataʻitohi ʻi he fetuʻutaki fakaetokolahí mei he ʻUnivēsiti ʻo ʻIutaá pea kuó ne ngāue ʻi ha ngaahi malaʻe fakapisinisi kehekehe. Naʻá ne hoko ko ha palesiteni fakaʻēlia ʻi he Arthur J. Gallagher & Co., ko ha kautaha maluʻi fakaemāmani lahi, ʻo aʻu ki hono uiuiʻi ko e palesiteni fakamisioná. ʻI he taimi naʻe uiuiʻi ai ia ki he Kau Fitungofulú, naʻá ne lolotonga hoko ko ha tokoni palesiteni pule fakaʻēlia ki he kautaha ko iá.