ខាំមៀល អិន ចនសុន

ប្រធានសមាគមសង្គ្រោះទូទៅ

ស៊ីស្ទើរ ខាំមៀល អិន ចនសុន « តែងតែមានអារម្មណ៍កក់ក្តៅ » នៅក្នុងសមាគមសង្រ្គោះ ។

គាត់បានមានប្រសាសន៍ពីបទពិសោធន៍របស់គាត់ ដោយបូករួមទាំងបទពិសោធន៍ជាង ៣០ ឆ្នាំ នៅក្នុងវួដសម្រាប់គ្រួសារទាំងនៅសហរដ្ឋ និងប្រទេសប៉េរូថា « ខ្ញុំបានជួបនឹងបងប្អូនស្រីដែលមានភាពខុសប្លែកពីខ្ញុំ » ។ « ខ្ញុំស្រឡាញ់ភាពរឹងមាំ និងប្រាជ្ញារបស់ស្ត្រីនៅក្នុងសមាគមសង្គ្រោះ » ។

គាត់បានជួបនឹងអ្នកពិគ្រោះយោបល់ និងមិត្តភក្តិនៅក្នុងសមាគមសង្រ្គោះ ដោយរួមមានទាំងអ្នកដែលមានវ័យចំណាស់ជាងគាត់ និងក្មេងជាងគាត់ផងដែរ ។

ស៊ីស្ទើរ ចនសុន បានមានប្រសាសន៍ថា « យើងទាំងអស់គ្នាគឺជាបងប្អូនស្រីនឹងគ្នាដែលបានចែករំលែកបទពិសោធន៍ក្នុងគោលបំណងដើម្បីត្រឡប់ទៅគេហដ្ឋាននៅឯស្ថានសួគ៌របស់យើងវិញ ប៉ុន្តែដោយមានបទពិសោធន៍ចម្រុះរបស់យើង នោះយើងអាចជួយគ្នាទៅវិញទៅមក » ។

ស៊ីស្ទើរ ចនសុន បានបម្រើជាប្រធានអង្គការបឋមសិក្សាទូទៅកាលពីឆ្នាំមុន ។ គាត់នឹងចាប់ផ្តើមបម្រើជាប្រធានសមាគមសង្រ្គោះទូទៅនៅថ្ងៃទី ១ ខែសីហានេះហើយ ។

ការហៅដែលគាត់ចូលចិត្តបំផុតមួយគឺការបង្រៀននៅក្នុងសមាគមសង្រ្គោះ ។

« ខ្ញុំចូលចិត្តឱកាសដើម្បីមានទំនាក់ទំនងជាមួយនឹងបងប្អូនស្រីទាំងឡាយ និងដើម្បីទទួលការបង្រៀនពីព្រះវិញ្ញាណ ហើយពីគ្នាទៅវិញទៅមកនៅក្នុងម៉ោងដ៏ពិសិដ្ឋនៅថ្នាក់សមាគមសង្រ្គោះនោះ ។ គឺយើងនិយាយពីព្រះគ្រីស្ទ និងអររីករាយយក្នុងព្រះគ្រីស្ទ និងថ្លែងពីបញ្ហានៅក្នុងដួងចិត្តរបស់យើង » ។

ខាំមៀល នេដដូ បានកើតនៅខែ កញ្ញា ឆ្នាំ ១៩៦៣ ត្រូវជាកូនរបស់លោក ហល និងលោកស្រី ដូរ៉ូធី នេដដូ នៅទីក្រុងប៉ូខាតេឡូ រដ្ឋអៃដាហូ ស.រ.អា ។ គាត់បានរៀបការនឹងលោក ឌូក្លាស អរ ចនសុន នៅថ្ងៃទី ៣១ ខែ កក្កដា ឆ្នាំ ១៩៨៧ នៅព្រះវិហារបរិសុទ្ធសលត៍ លេក ។ ពួកលោកមានកូនប្រុសបីនាក់ និងចៅប្រាំនាក់ ។

គាត់បានបញ្ចប់ការសិក្សាពីសាកលវិទ្យាល័យរដ្ឋយូថាហ៍ ផ្នែកភាសាអង់គ្លេស នៅឆ្នាំ ១៩៨៥ និងពីសាកលវិទ្យាល័យយូថាហ៍អេស ជេ ឃ្វីននី មហាវិទ្យាល័យផ្នែកច្បាប់ នៅឆ្នាំ ១៩៨៩ ។ គាត់បានធ្វើការផ្នែកមេធាវីអស់រយៈពេលជាង ៣០ ឆ្នាំ ហើយជាប្រធានគ្រឹះស្ថានច្បាប់ ស្នូ គ្រីស្ទីសិន & ម៉ាធីនៀ ។

ជាអតីតប្រធានក្រុមយុវនារីវួដ ស៊ីស្ទើរ ចនសុន ក៏បានបម្រើជាសមាជិកសមាគមសង្រ្គោះវួដ និងគណៈប្រធានអង្គការបឋមសិក្សា និងជាគ្រូបង្រៀនគោលលទ្ធិដំណឹងល្អ និងសមាគមសង្រ្គោះផងដែរ ។ គាត់ក៏បានបម្រើជាមួយស្វាមីរបស់គាត់ពីឆ្នាំ ២០១៦ ដល់ឆ្នាំ ២០១៩ ខណៈដែលលោកធ្វើជាអធិបតីលើបេសកកម្ម អារីគីប៉ា ប៉េរូ ។