« អែលឌើរ ដេណេសុន ស៊ីលវ៉ា » លីអាហូណា ខែ ឧសភា ឆ្នាំ ២០២២ ។
អែលឌើរ ដេណេសុន ស៊ីលវ៉ា
ពួកចិតសិបនាក់ដែលមានសិទ្ធិអំណាចទូទៅ
ការត្រឡប់មកវិញពីដំណើរលើចម្ងាយផ្លូវ ៦,៤០០គ.ម ពីទីក្រុងលូអាន់ដា ប្រទេសអង់ហ្គោឡា ទៅទីក្រុងសៅប៉ូឡូ ប្រទេសប្រេស៊ីល បានទុកពេលឲ្យអែលឌើរ ដេណេសុន ស៊ីលវ៉ា និងភរិយារបស់លោក រេជីណា ដើម្បីគិតពីការបំផុសគំនិតមួយ ។ បន្ទាប់ពីបម្រើជាប្រធានបេសកកម្ម អែលឌើរ ស៊ីលវ៉ា បានទទួលអារម្មណ៍ថា លោក និងភរិយារបស់លោកពុំគួរទិញផ្ទះទេ ។
ពួកលោកបានលក់ផ្ទះពីមុនចេញបេសកកម្ម ។ ពួកលោកបានដាក់ផែនការទិញផ្ទះថ្មីមួយខ្នង បន្ទាប់ពីត្រឡប់មកវិញ ប៉ុន្តែបានទទួលការបំផុសគំនិតឲ្យរង់ចាំសិន ។ អែលឌើរ ស៊ីលវ៉ា បានថ្លែងថា « ផ្ទះនៅប្រទេសប្រេស៊ីលពុំមែនជាទ្រព្យសម្បត្តិដែលអ្នកដាក់លក់គឺលក់ដាច់ភ្លាមនោះទេ ។ វាអាចចំណាយពេលច្រើនថ្ងៃ ឬខែ ឬរហូតដល់ឆ្នាំ » ។
ស៊ីស្ទើរ ស៊ីលវ៉ា បានថ្លែងថា ពួកលោកបានផ្ដោតលើការពិតដែលព្រះវរបិតាសួគ៌បានដឹកនាំពួកលោកពីមុនបេសកកម្ម ហើយថាទ្រង់នឹងដឹកនាំពួកលោកម្ដងទៀត ។ គាត់បានថ្លែងថា « យើងបានសម្រេចចិត្តរួមគ្នាថារង់ចាំមួយរយៈសិន » ។ ពួកលោកបានជ្រើសរើសជួលផ្ទះវិញ ។
ដូចជាការលក់ផ្ទះនៅប្រទេសប្រេស៊ីលដែរ ចម្លើយពុំបានកើតឡើងភ្លាមៗតែប៉ុន្មានថ្ងៃ ឬ ប៉ុន្មានខែ ឬ ប៉ុន្មានឆ្នាំឡើយ ។ ចម្លើយនោះបានកើតឡើងជាងពីរឆ្នាំក្រោយមក ពេលអែលឌើរ ស៊ីលវ៉ា បានទទួលការហៅមួយឲ្យបម្រើជាពួកចិតសិបនាក់ដែលមានសិទ្ធិអំណាចទូទៅ ។
អែលឌើរ ស៊ីលវ៉ា បានថ្លែងថា « យើងត្រូវតែគិតថា ប្រសិនបើទ្រង់បង្គាប់ឲ្យយើងធ្វើអ្វីមួយ ចម្លើយរបស់យើងគឺយល់ព្រមជានិច្ច ។ ប្រសិនបើចម្លើយរបស់យើងពុំមែន ‹ យល់ព្រម › ជានិច្ចទេ នោះវាទុកកន្លែងឲ្យពាក្យថា ‹ ទេ › ឬ ‹ ប្រហែលជា › ហើយ » ។ ទោះជាយ៉ាងណា លោកពន្យល់ថា ចំពោះព្រះអង្គសង្គ្រោះ « គ្មានកន្លែងឲ្យពាក្យថា ‹ ទេ › ឬ ‹ ប្រហែលជា › នៅគែតសេម៉ានីឡើយ » ។
ដេណេសុន អឺបាណូ ដា ស៊ីលវ៉ា បានកើតនៅថ្ងៃទី ៤ ខែ កក្កដា ឆ្នាំ ១៩៦៥ នៅទីក្រុង រេស៊ីហ្វេ ប្រទេសប្រេស៊ីល ត្រូវជាកូនរបស់លោក ដូម៉ីងហ្គូស អឺបាណូ ដា ស៊ីលវ៉ា និងលោកស្រី ម៉ារីយ៉ា ហូសេ ឌឺ អាល់មីដា ស៊ីលវ៉ា ។ លោកបានធំដឹងក្ដីឡើងនៅទីក្រុងរេស៊ីហ្វេ ហើយបានផ្សារភ្ជាប់នឹង រេជីណា ម៉ារីយ៉ា ឌឺ ខាវ៉ាល់ហូ ស៊ីលវ៉ា នៅព្រះវិហារបរិសុទ្ធសៅប៉ូឡូប្រេស៊ីលនៅខែឧសភា ឆ្នាំ១៩៨៧ ។ គូស្វាមីភរិយានេះមានកូនពីរនាក់ ។
គាត់បានបញ្ចប់បរិញ្ញាបត្រផ្នែកគ្រប់គ្រងធុរកិច្ច ( ដំណើរការទិន្នន័យ ) ។ លោកបានធ្វើការក្នុងវិស័យទេសចរណ៍អស់រយៈពេល ៣០ ឆ្នាំ ។
ពីឆ្នាំ ២០១៦ ដល់ឆ្នាំ ២០១៩ អែលឌើរ ស៊ីលវ៉ា បានបម្រើជាប្រធានបេសកកម្មជាមួយនឹងភរិយារបស់លោកនៅបេសកកម្មលូអង់ដា អង់ហ្គោឡា ។ លោកក៏ធ្លាប់បម្រើជាពួកចិតសិបនាក់ប្រចាំតំបន់ ប្រធានស្តេក ប៊ីស្សព ទីប្រឹក្សាជាន់ខ្ពស់ និងពួកអ្នកផ្សព្វផ្សាយសាសនាពេញម៉ោងនៅបេសកកម្មខឺរីទីបាប្រេស៊ីលដែរ ។