អែលឌើរ ជែម ដបុលយូ ម៉ាក់ខនឃី III

ពួកចិតសិបនាក់ដែលមានសិទ្ធិអំណាចទូទៅ

ពេលអែលឌើរ ជែម ដបុលយូ ម៉ាក់ខនឃី III បានមកដល់ប្រទេសឆេកូស្លូវ៉ាគីនៅឆ្នាំ ១៩៩០ ក្នុងនាមជាអ្នកផ្សព្វផ្សាយសាសនាវ័យក្មេងម្នាក់ ប្រទេសនេះទើបតែងើបចេញលទ្ធិកុម្មុយនិស្ត ហើយត្រៀមចាប់ផ្ដើមរុករកសាសនា និងជំនឿជាថ្មីម្ដងទៀត ។ លោកបានថ្លែងថា « ខ្ញុំបានស្ថិតនៅកន្លែងដ៏ត្រឹមត្រូវក្នុងពេលវេលាត្រឹមត្រូវ ជាមួយនឹងមនុស្សដែលត្រឹមត្រូវ » ។

ក្រោយមកទៀត លោកបានត្រឡប់ទៅតំបន់នោះទៀតក្នុងនាមជាអ្នកជំនាញវ័យក្មេង បានបង្កើតមូលនិធិមិនស្វែងរកប្រាក់ចំណេញមួយ ហើយបន្ទាប់មកបានបម្រើជាប្រធានបេសកកម្មឆេក/ស្លូវ៉ាគី ។

ពេលលោកមានអាយុ ១២ ឆ្នាំ ឪពុកម្ដាយរបស់លោកបានអញ្ជើញលោកឲ្យសិក្សាពីសៀវភៅរបស់ថ្នាក់ដឹកនាំសាសនាចក្រ រួចហើយពិភាក្សាពីអ្វីដែលលោកបានអាន ។ អែលឌើរ ម៉ាក់ខនឃី បានថ្លែងថា « ឪពុកម្ដាយរបស់ខ្ញុំបានជឿលើសារៈសំខាន់នៃការបង្រៀនដល់កូនៗពួកលោកអំពីដំណឹងល្អ ដូចដែលបានណែនាំនៅក្នុងគោលលទ្ធិ និងសេចក្ដីសញ្ញា ។ កណ្ឌ ៦៨ អញ្ជើញឪពុកម្ដាយឲ្យបង្រៀនកូនៗរបស់ពួកគេនូវ ‹ គោលលទ្ធិនៃការប្រែចិត្ត › និង ‹ សេចក្ដីជំនឿលើព្រះគ្រីស្ទ › ( ខទី ២៥ ) ។ ឪពុកម្ដាយរបស់ខ្ញុំបានប្រកាន់ខ្ជាប់ការណ៍នោះយ៉ាងម៉ឺងម៉ាត់ » ។

អារម្មណ៍របស់លោកចំពោះអានុភាពនៃដំណឹងល្អដើម្បីផ្លាស់ប្ដូរមនុស្សបានជ្រាបចូលយ៉ាងជ្រៅក្នុងព្រលឹងរបស់លោក ។ លោកបានឃើញថា រឿងដូចគ្នានេះបានកើតឡើងចំពោះពួកបរិសុទ្ធនៅសាធារណរដ្ឋឆេក និងស្លូវ៉ាគី ។

អែលឌើរ ជែម វិលសុន ម៉ាក់ខនឃី III បានកើតនៅទីក្រុងសលត៍ លេក រដ្ឋយូថាហ៍ ស.រ.អា ថ្ងៃទី ២៧ ខែ សីហា ឆ្នាំ ១៩៧១ ត្រូវជាកូនរបស់លោក ជេមស៍ វិលសុន ម៉ាក់ខនឃី II និងលោកស្រី ជូឌីធ មីលឺ ម៉ាក់ខេនឃី ។ លោកបានរៀបការនឹង ឡូរ៉េល ស្ព្រីងើរ នៅខែ កក្កដា ឆ្នាំ ១៩៩៥ នៅព្រះវិហារបរិសុទ្ធសលត៍ លេក ។ ពួកលោកមានកូនបួននាក់ ។

អែលឌើរ ម៉ាក់ខនឃី បានបញ្ចប់ការសិក្សាពីសាកលវិទ្យាល័យយូថាហ៍ ដែលទទួលបានបរិញ្ញាបត្រផ្នែកប្រវត្តិសាស្ត្រនៅឆ្នាំ ១៩៩៥ ហើយទទួលបានបរិញ្ញាបត្រផ្នែកច្បាប់នៅឆ្នាំ ១៩៩៩ ពីមជ្ឈមណ្ឌលច្បាប់ជាតិនៃសាកលវិទ្យាល័យចច វ៉ាស៊ីនតោន ។ ថ្មីៗនេះលោកបម្រើការជាមេធាវីនៅ វ័កមិន នីឌេហ្គើរ និងជានាយកនៃមូលនិធិវ៉លឡេស តូរ៉ង់តូ ដែលលោកបានជួយបង្កើតឡើង ។

អែលឌើរ ម៉ាក់ខនឃី កំពុងបម្រើជាប្រធានស្តេកពេលលោកត្រូវបានហៅសម្រាប់ការហៅរបស់លោក ។ លោកក៏ធ្លាប់បម្រើជាប៊ីស្សព ទីប្រឹក្សាជាន់ខ្ពស់ ទីប្រឹក្សាក្នុងគណៈប៊ីស្សព អ្នកដឹកនាំបេសកកម្មវួដ ទីប្រឹក្សាក្នុងគណៈប្រធានកូរ៉ុមអែលឌើរ គ្រូបង្រៀនការរៀបចំខ្លួនសម្រាប់បេសកកម្ម គ្រូបង្រៀនគោលលទ្ធិនៃដំណឹងល្អ និងប្រធានយុវជនវួដ ។