អែលឌើរ ម៉ាក់ ឌី អែតឌី

ពួកចិតសិបនាក់ដែលមានសិទ្ធិអំណាចទូទៅ

នៅរដូវក្ដៅពីមុនឆ្នាំចុងក្រោយនៅវិទ្យាល័យរបស់អែលឌើរ ម៉ាក់ ឌី អែតឌី គ្រូបង្រៀនថ្នាក់សិក្ខាសាលាម្នាក់បានអញ្ជើញលោក និងសមាជិកផ្សេងទៀតនៃក្រុមប្រឹក្សាសិស្សថ្នាក់សិក្ខាសាលារបស់ពួកលោកអានព្រះគម្ពីរមរមន ។ លោកបានអានព្រះគម្ពីរនោះជាច្រើនដងជាមួយនឹងគ្រួសាររបស់លោក ប៉ុន្តែនេះគឺជាលើកដំបូងហើយដែលលោកអានដោយខ្លួនឯង ។

លោកបានសម្រេចចិត្តអធិស្ឋានពីមុន និងក្រោយលោកអានរៀងរាល់ថ្ងៃ ។ លោកសង្ឃឹមថា បានទទួលចម្លើយដ៏ច្បាស់មួយអំពីសេចក្ដីពិតដ៏ពេញលេញរបស់ព្រះគម្ពីរនឹងកើតឡើងក្នុងរយៈពេលមួយ ឬពីរសប្ដាហ៍ ។ បន្ទាប់ពីអានជាងពីរខែមក លោកនៅតែពុំទាន់បានទទួលការបញ្ជាក់ដែលលោកបានរំពឹងទុកនោះឡើយ ។

ប៉ុន្មានម៉ោងពីមុនការប្រជុំធម្មនិដ្ឋានថ្នាក់សិក្ខាសាលា « ស្វាគមន៍ការត្រឡប់មកវិញ » ដែលលោកត្រូវបានសុំឲ្យថ្លែងទីបន្ទាល់របស់លោក នោះអែលឌើរ អែតឌី បានមកមុនដើម្បីជួយរៀបចំ ។ បន្ទាប់មក លោកបានស្វែងរកកន្លែងស្ងាត់មួយដើម្បីអានព្រះគម្ពីរមរមន និងអធិស្ឋាន ។

លោកបានថ្លែងថា « នៅពេលនោះខ្ញុំបានទទួលអារម្មណ៍យ៉ាងច្បាស់លាស់ថា វាគឺជាការពិត ។ វាបានកើតឡើងចំពេលដែលខ្ញុំត្រូវថ្លែងទីបន្ទាល់របស់ខ្ញុំនៅល្ងាចនោះ ។ អារម្មណ៍នោះត្រូវការការប្រឹងប្រែងល្មមគ្រប់គ្រាន់ដើម្បីទទួល ហើយវាធ្វើឲ្យខ្ញុំមិនអាចបំភ្លេចបានឡើយ » ។

អែលឌើរ ម៉ាក់ ដេវីឌ អែតឌី បានកើតនៅទីក្រុង ឡង ប៊ីច រដ្ឋ កាលីហ្វ័រញ៉ា ស.រ.អា នៅថ្ងៃទី ៣០ ខែ មីនា ឆ្នាំ ១៩៧៣ ត្រូវជាកូនរបស់លោក រីឆាដ ក្លាយតុន អែតឌី និងលោកស្រី ម៉ារី ល្វីស សាវ៉េច អែតឌី ។ លោកបានធំដឹងក្ដីឡើងនៅទីក្រុង អូរិម រដ្ឋយូថាហ៍ ហើយបានរៀបការនឹងអាណេត « អាននី » អេឡេន នៅព្រះវិហារបរិសុទ្ធប្រូវ៉ូ រដ្ឋ យូថាហ៍នៅខែ សីហា ឆ្នាំ ១៩៩៤ ។ ពួកលោកមានកូនប្រាំមួយនាក់ ។

អែលឌើរ អែតឌី បានបញ្ចប់ការសិក្សាមកពីសាកលវិទ្យាល័យ ព្រិកហាំ យ៉ង់ នៅឆ្នាំ ១៩៩៦ ជាមួយនឹងបរិញ្ញាបត្រផ្នែកទំនាក់ទំនង និងទទួលបានសញ្ញាបត្របណ្ឌិតផ្នែកយុត្តិធម៌ មកពី ប៊ី.វ៉ាយ.យូ. នៅឆ្នាំ ២០០១ ។ ចាប់តាំងពីនោះមក លោកបានបម្រើការជាមេធាវី និងនាយកប្រតិបត្តិអាជីវកម្ម ។

អែលឌើរ អែតឌី ធ្លាប់បម្រើជាពួកចិតសិបនាក់ប្រចាំតំបន់ ប្រធានបេសកកម្មម៉ុនតេវីដេអូ អ៊ុយរូហ្គាយ ទីប្រឹក្សាក្នុងគណៈប្រធានស្តេក ប៊ីស្សព ទីប្រឹក្សាជាន់ខ្ពស់ ទីប្រឹក្សាក្នុងគណៈប៊ីស្សព ប្រធានយុវជនវួដ អ្នកផ្សព្វផ្សាយសាសនាពេញម៉ោងនៅបេសកកម្ម សាន់តូ ដូមីងហ្គោ សាធារណរដ្ឋដូមីនីកខាងកើត ។