សាសនាចក្រផ្តល់ជំនួយ និងសង្រ្គោះ
ពួកបរិសុទ្ធថ្ងៃចុងក្រោយបានចូលរួមនៅក្នុងកិច្ចការជួយសង្រ្គោះដល់ជនភៀសខ្លួនយ៉ាងសកម្មនៅទូទាំងពិភពលោក ។ នៅទ្វីបអឺរ៉ុបពួកគេកំពុងជួយផ្តល់ជាចំណីអាហារ សម្លៀកបំពាក់ សម្ភារទារក ជម្រក និងអ្វីៗជាច្រើនទៀតដើម្បីជួយដល់ជនភៀសខ្លួន ។ ថ្មីៗនេះសាសនាចក្របានបរិច្ចាគទឹកប្រាក់ចំនួន ២ លានដុល្លារអាមេរិក ដល់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន និង ២ លានដុល្លារផ្សេងទៀតដល់កម្មវិធីស្បៀងអាហារពិភពលោក ។ ការបរិច្ចាកនេះនឹងជួយ WFP ( កម្មវិធីស្បៀងអាហារពិភពលោក ) ផ្តល់អាហារដល់មនុស្សប្រមាណជា ១១,០០០ នាក់សម្រាប់រយៈពេល ៤ ខែ ។
ស៊ីស្ទើរ សារ៉ុន អូប៊ែង ជាទីប្រឹក្សាទីមួយក្នុងគណៈប្រធានសមាគមសង្គ្រោះទូទៅ និងជាប្រធានសប្បុរសធម៌នៃពួកបរិសុទ្ធថ្ងៃចុងក្រោយបានមានប្រសាសន៍ថា « យើងមានសមាជិកនៅប្រទេសជាច្រើនដែលទទួលរងផលប៉ះពាល់ » ។ ដោយសារតែសាសនាចក្រមានមូលនិធិដែលបម្រុងទុក នោះយើងអាចរៀបចំអាហារ និងទឹកទុកជាមុន មុនពេលមានវិបត្តិនៅក្នុងប្រទេសអ៊ុយក្រែន គាត់បានមានប្រសាសន៍ថា សូមជូនជាដំណឹងថា សាសនាចក្របានប្តេជ្ញាចិត្តជួយរយៈពេលវែងចំពោះប្រទេសដែលរងផលប៉ះពាល់នេះ ។
នៅប្រទេសប៉ារ៉ាហ្គាយ និងប្រទេសប៉េរូ មូលនិធិសាសនាចក្របានជួយផ្តល់ឧបករណ៍វេជ្ជសាស្ត្រដល់មន្ទីរពេទ្យជាច្រើន ហើយនៅប្រទេសប៉េរូ សាសនាចក្របានចែកចាយកង្ហារ អំពូលភ្លើង គ្រឿងសង្ហារិម កៅអី ប្រដាប់ប្រើប្រាស់ និងកុំព្យូទ័រយួរដៃចំនួនប្រាំពីរដល់អង្គការដែលជួយដល់កុមារ និងមនុស្សចាស់ជរា ក្រុមប្រឹក្សាអន្តរសាសនា និងកន្លែងស្នាក់នៅរបស់ក្មេងស្រី ។ នៅប្រទេសកូឡុំប៊ី មូលនិធិតមអាហារត្រូវបានប្រើដើម្បីផ្តល់ជាអាហារ និងគ្រឿងផ្គត់ផ្គង់ចំនួន ១,២០០ ប្រអប់ដល់អ្នកដែលត្រូវការជំនួយ ។ នៅប្រទេសប៉ាណាម៉ា សាសនាចក្របានបរិច្ចាគឧបករណ៍ដើម្បីជួយរក្សាវ៉ាក់សាំងកូវីដ-១៩ ។
ប្រជាជននៅទីក្រុងចំនួន ១០ ក្នុងសហរដ្ឋអាមេរិកបានទៅទិញរបស់របរពីម៉ាស៊ីនបំភ្លឺពិភពលោកក្នុងអំឡុងរដូវកាលគ្រីស្ទម៉ាស់នាឆ្នាំ ២០២១ ដោយបានបរិច្ចាគទឹកប្រាក់សរុបចំនួន ៥.៨ លានដុល្លារអាមេរិក ។ ម៉ាស៊ីននេះអនុញ្ញាតឲ្យយើងទិញរបស់របរ ( ដូចជា សម្លៀកបំពាក់ អាហារ ទឹកស្អាត និងបសុសត្វ ) ដែលក្រោយមកនឹងត្រូវចែកចាយតាមរយៈអង្គការសប្បុរសធម៌ចំនួន ៤៤ នៅសហរដ្ឋអាមេរិក ព្រមទាំងភ្នាក់ងារទូទាំងពិភពលោកចំនួនប្រាំផងដែរ ។
សាសនាចក្រក៏បានជួយដល់អ្នកដែលរងផលប៉ះពាល់ដោយខ្យល់ព្យុះកំបុតត្បូងនៅភាគខាងលិចនៃសហរដ្ឋអាមេរិក ព្យុះទីហ្វុងនៅប្រទេសហ្វីលីពីន និងការផ្ទុះភ្នំភ្លើង និងរលកយក្សស៊ូណាមិនៅតុងហ្គា ។