គ្រីស្ទីន អិម យី

ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ

នៅក្នុងពិភពលោកដែលត្រូវបានសម្គាល់ឃើញដោយការបែកបាក់ និងភាពឯកោកាន់តែខ្លាំង ស៊ីស្ទើរ គ្រីស្ទីន អិម យី បានរកឃើញវិធីព្យាបាលជំងឺសង្គមទាំងនោះតាមរយៈដំណឹងល្អនៃព្រះយេស៊ូវគ្រីស្ទ និងសមាគមសង្គ្រោះ ។

គាត់បានថ្លែងថា « សមាគមសង្គ្រោះបង្រួបបង្រួមយើងនៅក្រោមការដឹកនាំរបស់ទ្រង់ » ។ « ទោះជាខ្ញុំធ្វើដំណើរទៅកាន់ទីកន្លែងណានៅក្នុងពិភពលោកនេះក្ដី ក៏ខ្ញុំរកមើលបងប្អូនស្រីរបស់ខ្ញុំក្នុងសមាគមសង្គ្រោះដែរ ហើយខ្ញុំទទួលបានសេចក្ដីស្រឡាញ់ និងស្គាល់គ្នាភ្លាមៗ ។ មានភាពសាមញ្ញមួយអំពីព្រះគ្រីស្ទ និងក្នុងទីបន្ទាល់របស់យើងអំពីទ្រង់ » ។

ស៊ីស្ទើរ យី ដែលកំពុងបម្រើនៅក្នុងក្រុមប្រឹក្សាផ្ដល់យោបល់របស់អង្គការបឋមសិក្សាទូទៅ ចាប់ផ្ដើមការហៅថ្មីរបស់គាត់ជាទីប្រឹក្សាទីពីរក្នុងគណៈប្រធានសមាគមសង្គ្រោះទូទៅដោយភាពច្បាស់លាស់ថា គាត់ពុំធ្វើកិច្ចការតែឯងឡើយ ។

គាត់បានថ្លែងថា « ព្រះអម្ចាស់គឺជាអ្នកគ្រប់គ្រង ហើយខ្ញុំទុកចិត្តទ្រង់ ។ ខ្ញុំក៏ទទួលអារម្មណ៍យ៉ាងមុតមាំដែរថា យើងត្រូវការមនុស្សគ្រប់រូបនៅក្នុងកិច្ចការរបស់ទ្រង់ ។ យើងគ្រប់គ្នាមានតួនាទីមួយដែលត្រូវធ្វើ ហើយយើងអាចក្លាយជាផ្នែកមួយនៃកិច្ចការនេះរួមគ្នា ។ ខ្ញុំមានអំណរគុណណាស់ចំពោះឱកាសដើម្បីបម្រើ » ។

គ្រីស្ទីន ម៉េ យី បានកើតនៅថ្ងៃទី ៥ ខែ ឧសភា ឆ្នាំ ១៩៨១ នៅទីក្រុង សាក្រាម៉ង់តូ រដ្ឋ កាលីហ្វ័រញ៉ា ស.រ.អា ត្រូវជាកូនរបស់ លោករ៉ាយអិន អ័រ យី និងលោកស្រី ជេឌីន ហ្វក់ ម៉ាកឃេ ។ ក្រោយមកគាត់បានផ្លាស់ទៅរដ្ឋអៃដាហូ ស.រ.អា រួចទៅរដ្ឋយូថាហ៍ ។

គាត់បានរកឃើញតាំងពីក្មេងថាគាត់ចូលចិត្ត និងមានទេពកោសល្យខាងសិល្បៈ ដែលបានដឹកនាំមាគ៌ាសម្រាប់ការអប់រំ និងអាជីពរបស់គាត់ ។ គាត់បានបញ្ចប់ថ្នាក់បរិញ្ញាបត្រផ្នែកវិចិត្រសិល្បៈពីសាកលវិទ្យាល័យ ព្រិកហាំយ៉ង់-អៃដាហូ និងសាកលវិទ្យាល័យ ព្រិកហាំ យ៉ង់ ។ នៅឆ្នាំ ២០១៩ គាត់បានបញ្ចប់ថ្នាក់អនុបណ្ឌិតផ្នែកការគ្រប់គ្រងសាធារណៈមកពីប៊ី.វ៉ាយ.យូ. ។

ជំនាញ និងការផ្ដោតខាងសិល្បៈរបស់ស៊ីស្ទើរ យី បានដឹកនាំគាត់ទៅកាន់តួនាទីមួយជាវិចិត្រករ និងផលិតករនៅស្ទូឌីយ៉ូឌីស្នី ជាកន្លែងដែលគាត់ធ្វើការអស់រយៈពេល ១៣ ឆ្នាំ ។ ឥឡូវគាត់គ្រប់គ្រងក្រុមគំនូរជីវចលរបស់សាសនាចក្រ ។ គំនូរដែលមានប្រធានបទនៃដំណឹងល្អរបស់គាត់រួមមាន រូបគំនូរការងារបម្រើក្នុងជីវិតរមែងស្លាប់របស់ព្រះអង្គសង្គ្រោះ ។

ស៊ីស្ទើរ យី បានបម្រើនៅក្នុងការហៅជាច្រើនក្នុងសាសនាចក្រ រួមមាន ប្រធានសមាគមសង្គ្រោះស្តេក ទីប្រឹក្សាគណៈប្រធានសមាគមសង្គ្រោះវួដ និងគ្រូបង្រៀន ប្រធានយុវនារីវួដ គ្រូបង្រៀនគោលលទ្ធិនៃដំណឹងល្អ អ្នកផ្សព្វផ្សាយសាសនាវួដ និងអ្នកធ្វើពិធីបរិសុទ្ធក្នុងព្រះវិហារបរិសុទ្ធ ។