« រ៉ាយអាន ខេ. អូលសិន » លីអាហូណា ខែ ឧសភា ឆ្នាំ ២០២២ ។
អែលឌើរ រ៉ាយអាន ខេ. អូលសិន
ពួកចិតសិបនាក់ដែលមានសិទ្ធិអំណាចទូទៅ
នៅពេលអែលឌើរ រ៉ាយអាន ខេ. អូលសិន បានធំឡើងនៅទីក្រុងសេនឌី រដ្ឋយូថាហ៍ ស.រ.អា. ឪពុកម្តាយរបស់លោកពុំដែលអនុញ្ញាតឲ្យលោកចេញពីផ្ទះដោយគ្មានការរំឭកដ៏ច្បាស់នេះ ៖ « កុំភ្លេចថាខ្លួនកូនជានរណា » ។
លោកបានមានប្រសាសន៍ទាំងអស់សំណើចថា « ឃ្លានេះធ្លាប់ធ្វើឲ្យខ្ញុំខឹងណាស់កាលនៅពីក្មេង » ។ ប៉ុន្តែពាក្យទាំងនោះបានជួយខ្ញុំចងចាំពីអត្តសញ្ញាណដ៏ទេវភាពរបស់ខ្ញុំ ។ វាជួយខ្ញុំចងចាំថា ព្រះវរបិតាសួគ៌ស្រឡាញ់ខ្ញុំ ហើយថាព្រះអង្គសង្រ្គោះគឺជាមិត្តភក្តិដ៏ជិតស្និទ្ធរបស់ខ្ញុំ ។ អ្វីៗដែលយើងអាចសង្ឃឹមដើម្បីធ្វើ ឬសម្រេចបានគឺមានតែតាមរយៈទ្រង់ប៉ុណ្ណោះ » ។
ការធានាអះអាងពីអត្តសញ្ញាណបុគ្គលនោះ និងគំរូពីឪពុកម្តាយរបស់លោក ពួកអ្នកផ្សព្វផ្សាយសាសនា សហការីសាសនាចក្រ និងអ្នកណែនាំអាជីវកម្មដ៏ឈ្លាសវៃគឺជាឧបករណ៍ដែលអែលឌើរ អូលសិន នឹងប្រើប្រាស់កាលដែលលោកចាប់ផ្តើមការបម្រើរបស់លោកក្នុងនាមជាពួកចិតសិបនាក់ដែលមានសិទ្ធិអំណាចទូទៅ ។
លោកបានកើតនៅថ្ងៃទី ១១ ខែ តុលា ឆ្នាំ ១៩៧៤ ហើយបានធំឡើងនៅជ្រលងភ្នំសលត៍ លេក រដ្ឋយូថាហ៍ អែលឌើរ រ៉ាយអាន ខេ. អូលសិន គឺជាកូនប្រុសរបស់លោក ខឺឃ និងលោកស្រី ខាធី អូលសិន ។
សេចក្តីស្រឡាញ់របស់អែលឌើរ អូលសិន ចំពោះអាមេរិក ឡាទីន និងភាសាអេស្ប៉ាញបានត្រូវពង្រឹង នៅពេលលោកបម្រើជាអ្នកផ្សព្វផ្សាយសាសនាពេញម៉ោងនៅបេសកកម្ម រ៉េស៊ិសស្ទិនកា អាហ្សង់ទីន។ ក្រោយមកលោក និងភរិយារបស់លោក ដែលមានឈ្មោះថា ជូឌី ដឌ័ររីងតុន អូលសិន បានបម្រើជាមួយគ្នានៅពេលលោកធ្វើជាអធិបតីនៅបេសកកម្ម ម៉ុនតេវីដេអូ អ៊ុយរ៉ាហ្គាយ ភាគខាងលិចចាប់ពីឆ្នាំ ២០១៦ ដល់ឆ្នាំ ២០១៩ ។
លោក និងស៊ីស្ទើរ អូលសិន បានរៀបការនៅថ្ងៃទី ២០ ខែ វិច្ឆិកា ឆ្នាំ ១៩៩៨ នៅព្រះវិហារបរិសុទ្ធសលត៍ លេក ។ ពួកលោកមានកូនបួននាក់ ។
នៅគ្រានៃការហៅរបស់លោកបម្រើជាពួកចិតសិបនាក់ដែលមានសិទ្ធិអំណាចទូទៅ អែលឌើរ អូលសិន បានបម្រើជាពួកចិតសិបនាក់ប្រចាំតំបន់ ។ លោកក៏បានបម្រើជាប្រធានស្តេក ប្រធានស្តេកបេសកកម្ម ទីប្រឹក្សាជាន់ខ្ពស់ ប៊ីស្សព ទីប្រឹក្សានៅក្នុងគណៈប៊ីស្សព និងជាទីប្រឹក្សាក្នុងគណៈប្រធានក្រុមយុវជនវួដផងដែរ ។
អែលឌើរ អូលសិន បានរៀនចប់ថ្នាក់បរិញ្ញាបត្រជំនាញទំនាក់ទំនងទ្រង់ទ្រាយធំមកពីសាកលវិទ្យាល័យយូថាហ៍ ហើយបានបម្រើការក្នុងវិស័យពាណិជ្ជកម្មចម្រុះគ្នា ។ លោកគឺជាប្រធានតំបន់ឲ្យក្រុមហ៊ុន Arthur J. Gallagher & Co., ដែលជាក្រុមហ៊ុនធានារ៉ាប់រងអន្តរជាតិ រហូតដល់ការហៅរបស់លោកឲ្យបម្រើជាប្រធានបេសកកម្ម ។ នៅគ្រានៃការហៅរបស់លោកឲ្យធ្វើជាពួកចិតសិបនាក់ លោកបានបម្រើការជាអនុប្រធានជាន់ខ្ពស់ប្រចាំតំបន់សម្រាប់ក្រុមហ៊ុននោះ ។