អែលឌើរ អាយស៊ីក ខេ ម៉ូរីសុន

ពួកចិតសិបនាក់ដែលមានសិទ្ធិអំណាចទូទៅ

អែលឌើរ អាយស៊ីក ខេ ម៉ូរីសុន ថ្លែងថា លោក និងភរិយារបស់លោកពុំសូវបានទទួលទានដំណេកទេចាប់តាំងពីប្រធាន រ័សុល អិម ណិលសុន បានហៅអែលឌើរ ម៉ូរីសុន បម្រើជាពួកចិតសិបនាក់ដែលមានសិទ្ធិអំណាចទូទៅមក ។

លោកបានថ្លែងថា « យើងដឹងថា កិច្ចការនេះនឹងជាដំណើរវែងឆ្ងាយមួយសម្រាប់យើង ។ យើងនឹងពឹងផ្អែកលើព្រះអម្ចាស់ដើម្បីបង្ហាញដល់យើងនូវអ្វីដែលយើងគួរធ្វើ » ។

អែលឌើរ ម៉ូរីសុន ត្រូវបានហៅជាប្រធានស្តេកនៅឆ្នាំ ២០១៤ ជាពួកចិតសិបនាក់ប្រចាំតំបន់នៅឆ្នាំ ២០១៨ និងជាប្រធានបេសកកម្ម ខូសកាប៉េហ្គាណានៅឆ្នាំ ២០២០ ។

លោកបានថ្លែងថា « រាល់ការចាត់តាំងបានកើតឡើងនៅពេលដែលខ្ញុំមិនបានរំពឹងទុក ។ ប៉ុន្តែខ្ញុំពឹងផ្អែកលើព្រះអម្ចាស់ និងពុំពឹងផ្អែកលើសមត្ថភាពរបស់ខ្ញុំផ្ទាល់ឡើយ » ។

អែលឌើរ ម៉ូរីសុន បានបញ្ចប់ថ្នាក់អនុបណ្ឌិតផ្នែកគ្រប់គ្រងយុទ្ធសាស្ត្រ និងភាពជាអ្នកដឹកនាំមកពីសាកលវិទ្យាល័យវិទ្យាសាស្ត្រ និងបច្ចេកវិទ្យាក្វានមេ គ្រូម៉ា នៅប្រទេសហ្គាណា ។ លោកបានធ្វើការឲ្យសាសនាចក្រក្នុងតួនាទីជាច្រើនចាប់តាំងពីឆ្នាំ ២០០៤ មក ថ្មីៗនេះលោកបម្រើការងារជាអ្នកគ្រប់គ្រងផ្នែកគាំទ្រថ្នាក់ដឹកនាំ និងសមាជិកសម្រាប់ទ្វីបអាហ្វ្រិកខាងលិច ។

អាយស៊ីក ខេ ម៉ូរីសុន កើតនៅថ្ងៃទី ២៥ ខែ វិច្ឆិកា ឆ្នាំ ១៩៧៧ នៅទីក្រុង តាកូរ៉ាឌី ប្រទេសហ្គាណា ត្រូវជាកូនរបស់លោក យ៉ូសែប កូចូ ម៉ូរីសុន និងលោកស្រីម៉ារី អេហ្វូអា អូប៊ូអា សាហ្វូ ។

កាលពីក្មេង អែលឌើរ ម៉ូរីសុន និងគ្រួសាររបស់លោកបានចូលរួមការប្រជុំព្រះវិហារនិកាយផ្សេង ។ ពេលលោកផ្លាស់ទៅរស់នៅជាមួយនឹងគ្រួសាររបស់ពូលោកដើម្បីចូលរៀននៅវិទ្យាល័យ នោះលោកបានចូលរួមការប្រជុំរបស់ពួកបរិសុទ្ធថ្ងៃចុងក្រោយជាមួយនឹងពួកគេ រួចហើយទៅការប្រជុំនៅព្រះវិហាររបស់លោក ។ មានគ្រូបង្រៀនថ្នាក់សិក្ខាសាលានាព្រឹកព្រលឹមមួយរូបបានអញ្ជើញលោកឲ្យចូលរួមថ្នាក់សិក្ខាសាលា ជាកន្លែងដែលលោកបានជួបនឹង ហាន់ណា នីយ៉ាកូ ។

លោកបានថ្លែងថា « នាងឆ្លាតណាស់ ហើយតែងផ្ដល់មតិយោបល់ល្អៗ ។ វាពិតជាធ្វើឲ្យខ្ញុំចង់សិក្សាបន្ថែមទៀត » ។ បន្ទាប់ពីការសិក្សាអំពីព្រះគម្ពីរមរមននៅឆ្នាំនោះមក លោកបានថ្លែងថា « ខ្ញុំបានត្រៀមខ្លួនរួចជាស្រេចដើម្បីទទួលពិធីបុណ្យជ្រមុជទឹក » ។

នៅថ្ងៃទី ១៨ ខែ ធ្នូ ឆ្នាំ ២០០៤ លោក និងហាន់ណា បានរៀបការនៅតាកូរ៉ាឌី ហើយបានផ្សារភ្ជាប់នៅបីថ្ងៃក្រោយមកនៅព្រះវិហារបរិសុទ្ធអាក្រា ហ្គាណា ។ ពួកលោកមានកូនប្រុសបីនាក់ ។

បន្ថែមពីលើការហៅផ្សេងទៀតរបស់លោក អែលឌើរ ម៉ូរីសុន បានបម្រើជាទីប្រឹក្សាក្នុងគណៈប្រធានស្តេក ប៊ីស្សព ទីប្រឹក្សាក្នុងគណៈប៊ីស្សព ប្រធានកូរ៉ុមអែលឌើរ គ្រូបង្រៀនគោលលទ្ធិនៃដំណឹងល្អ គ្រូបង្រៀនថ្នាក់សិក្ខាសាលា និងអ្នកផ្សព្វផ្សាយសាសនាពេញម៉ោងនៅប្រទេសនីហ្សេរីយ៉ា ។