ពួកស៊ីស្ទើរពង្រឹង និងបម្រើ
គណៈប្រធានសមាគមសង្គ្រោះទូទៅបានបន្តកិច្ចការរបស់ពួកគាត់ទាំងនៅលើប្រព័ន្ធផ្សព្វផ្សាយសង្គម និងដោយផ្ទាល់ ដើម្បីពង្រឹងក្រុមគ្រួសារ និងបុគ្គលម្នាក់ៗ ហើយបម្រើបុត្រាបុត្រី របស់ព្រះទូទាំងពិភពលោក ។
នៅខែ មីនា ឆ្នាំ ២០២២ ប្រធាន ជីន ប៊ី ប៊ីងហាំ បានថ្លែងអំពីខួបលើកទី ១៨០ នៃការបង្កើតសមាគមសង្គ្រោះ ។ គាត់បានថ្លែងថា សព្វថ្ងៃនេះមានបងប្អូនស្រីប្រាំពីរលាននាក់កន្លះកំពុងជួយសម្រាលការរងទុក្ខ សង្គ្រោះព្រលឹង និងបំពេញគោលបំណងតែមួយដែលសមាគមសង្គ្រោះបានបង្កើតឡើងនៅឆ្នាំ ១៨៤២ ។
ប្រធាន ប៊ីងហាំ និង ស៊ីស្ទើរ សារ៉ុន អូប៊ែង ជាទីប្រឹក្សាទីមួយក្នុងគណៈប្រធានសមាគមសង្គ្រោះទូទៅ និងជាប្រធានសប្បុរសធម៌នៃពួកបរិសុទ្ធថ្ងៃចុងក្រោយបានចុះទស្សនកិច្ចនៅប្រទេសមួយចំនួនក្នុងមជ្ឈឹមបូព៌ា ។ នៅទីក្រុងខៃរ៉ូ ប្រទេសអេហ្ស៊ីប ប្រធាន ប៊ីងហាំ បានថ្លែងថា គាត់មានចំណាប់អារម្មណ៍ចំពោះ « សេចក្ដីស្រឡាញ់ពិតដែលពួកបរិសុទ្ធមានចំពោះគ្នា » ។ ប្រធាន ប៊ីងហាំ និង ស៊ីស្ទើរ អូប៊ែង ក៏បានចុះទស្សនកិច្ចជំរំជនភៀសខ្លួននៅ ឃឺដឌីស្ទៃន ជាកន្លែងដែលសាសនាចក្របានជួយផ្ដល់កន្លែងស្នាក់នៅផងដែរ ។
ស៊ីស្ទើរ រ៉េណា អ៊ី អាប៊ើតូ ទីប្រឹក្សាទីពីរ បានចុះទស្សនកិច្ចប្រទេសអេស្ប៉ាញជាមួយនឹង ស៊ីស្ទើរ មីឈែល ឌី ក្រេហ្គ ជាទីប្រឹក្សាទីមួយក្នុងគណៈប្រធានយុវនារីទូទៅ ។ ស៊ីស្ទើរ អាប៊ើតូ បានថ្លែងនៅឯការប្រជុំធម្មនិដ្ឋានសម្រាប់កុមារ និងយុវវ័យថា « សេចក្ដីសុខសាន្តរបស់ព្រះទ្រាំទ្រ និងឆ្លងផុតរាល់អំពើអាក្រក់ក្នុងលោកិយនេះ » ។
តាមរយៈប្រព័ន្ធផ្សព្វផ្សាយសង្គម ប្រធានសមាគមសង្គ្រោះទូទៅបានចុះផ្សាយសារលិខិតអំពីអាហារូបត្ថម្ភ សុខុមាលភាព និងសុខភាពរបស់កុមារ ដោយការសម្របសម្រួលជាមួយសេវាកម្មសុខុមាលភាព និងភាពខ្លួនទីពឹងខ្លួនរបស់សាសនាចក្រ ដើម្បីផ្ដល់សារលិខិតដល់ឪពុកម្ដាយអំពីអត្ថប្រយោជន៍នៃការលាងដៃ ទឹកស្អាត ជម្រើសអាហារសុខភាព ការបំបៅកូនដោយទឹកដោះ ការចាក់ថ្នាំបង្ការ អនាម័យ និងការទៅជួបគ្រូពេទ្យ ។
គណៈប្រធាននេះក៏បានលើកទឹកចិត្តដល់បងប្អូនស្រី ឲ្យចែកចាយអារម្មណ៍របស់ពួកគេអំពីអ្វីដែលបានលើកទឹកចិត្តពួកគេ ឲ្យចូលរួមយ៉ាងពេញលេញនៅក្នុងសមាគមសង្គ្រោះ និងអំពីរបៀបធ្វើឲ្យសមាគមសង្គ្រោះកាន់តែមានការរាប់អាន និងការគាំទ្រ ។