Savali Faaleautaitai i le Eria
A o outou, pe se a la outou upu ia te au, po o ai?
“A o outou, pe se a la outou upu ia te au, po o ai?”1
Na tuuina atu e Iesu le fesili lenei i Ana uo sili ona latalata ia te Ia, o e na atoa le tolu tausaga o i Lona autafa e maitauina Ana gaoioiga ma faalogo i Ana aoaoga. Sa tali atu Peteru ma le mausali, “O Oe o le Keriso, o le Alo o le Atua soifua.”2
O le molimau a Peteru o le Faaola o Iesu Keriso o loo fefaasoaa’i e le selau ma selau o miliona o e loto mamā i le lalolagi atoa, mai le tele o augatupulaga ua mavae, e oo mai ia i tatou i le asō.
O le tāua o se molimau ma le malamalama i le paia o Iesu Keriso o loo manino mai i Lana lava tatalo faatauanau i le Tama a o Ia aioi atu mo i tatou, “o le ola e faavavau foi lenei, ia latou iloa oe le Atua moni e toatasi, atoa ma le na e auina mai, o Iesu Keriso lea.”3
Ou te manatuaina so’u lagona malosi faaleagaga a o avea a’u o se alii talavou na auauna i le misiona a Rusia, St. Petersburg. Sa ou faalogologo ia Peresitene Howard W. Hunter ina ua ia folafola mai, “E tatau ona sili atu ona tatou iloa Keriso nai lo lo tatou iloaina o Ia; e tatau ona sili atu ona tatou manatua soo o Ia nai lo lo tatou manatuaina o Ia; e tatau ona sili atu ona lototoa la tatou auauna atu ia te Ia nai lo la tatou auauna atu ia te Ia.”4
Lata mai lava na talosaga mai ai Peresitene Russell M. Nelson ia i tatou ia mafaufau, “Pe faapefea ona outou faalogo ia te Ia?”5
O le tāua o lenei fesili o loo taoto i le mea o i ai le tali e taitai ai i tatou taitoatasi. A o tatou faalogo ia te Ia, tatou te o mai tatou te iloaina o Ia, a o tatou o mai tatou te iloa o Ia e mafai ona tatou faataunuuina Ona faamoemoega ma agavaa ai mo mea uma lava ua Ia folafola mai. E eseese uma la tatou faalogo ia te Ia. Ou te faalogo ia te Ia a o o’u tauivi e faia le mea e faia e Ia pe ana i ai faatasi ma i tatou . . . e fafaga e fia aai, e faaofu e lē lavalavā, e talia le tagata ese, e asiasi i e mama’i ma e o i falepuipui ma asiasi i e matuaoti ma fafine ua oti a latou tane.6
I ni tausaga ua mavae, sa musuia a’u e tuuto atu e aapa malosi e auauna atu ma siitia se tasi i aso taitasi. Ou te faia lea e ala i se telefoni, se feau tusitusi, se imeli, se asiasiga patino pe ala i soo se gaoioiga auauna atu po o le foai atu. E i ai aso e faigofie ona iloa ai avanoa mo le auauna atu ae o isi aso ou te saili ma le lototatalo ia iloa po o ai e mafai ona ou aapa atu i ai. Ua ou iloa o le faaalu o le taimi e taulai atu ai i manaoga o isi, e foliga māmāsagia ai o’u lava luitau ma sili atu ai ona ou fiafia. O le mea e manaia ai, a o o’u saili malosi i avanoa e fesoasoani ma auauna ai i isi e musuia soo lava a’u e feiloai atu i aiga po o tagata taitoatasi o loo manaomia le fesoasoani, o ē e i’u ane ua avea ma uo ma se faamanuiaga i lo’u olaga.
E saunia e Le Ekalesia a Iesu Keriso o le Au Paia o Aso e Gata Ai le tele o avanoa mo i tatou e faia ai le galuega a le Faaola, i ni tulaga aloa’ia ma, sili atu ona tāua, i tulaga lē aloaia. “E tatau [ia i tatou] ona auai ma le naunautai i se faamoemoega lelei, ma fai mea e tele i lo [tatou] lava loto malie”7. E mafai ona tatou faataunuu malosi o tatou tofiga faale-Ekalesia, tausia ma le agamalu o tatou aiga, moa le vao a le tuaoi, faatau se meaai mo se tagataese, faatau se meaalofa mo se ulugalii laiti po o se aiga, faamafanafana ia i latou o loo mafatia, asiasi i e mama’i ma matutua, ofo atu lo tatou taimi, tupe ma punaoa i mafuaaga talafeagai ma faasalalau atu le agalelei ma le alofa.
A o tatou tauivi e faafoia o tatou manatu faapito faanatura ma avea ia sili atu ona faapei o Iesu Keriso, e avea i tatou . . . o se tane, ava, matua, tamaitiiti po o se tagata lelei atu. Tatou te atiina a’e uiga faaKeriso o le onosai, alofa mo o tatou aiga ma i latou e siomia i tatou, agalelei ma alofa mamā, ma tatou iloa ai ma taumafai e faataunuu manaoga o i latou o siomia i tatou. O le a avea le sailia o meatotino, faafiafiaina o le tuinanau faaletagata lava ia, ma mamalu ma viiga mai isi e avea ma mea e matuā itiiti lava se tāua. O le talalelei a Iesu Keriso, e aunoa ma se masalosalo, e avea ai a’u ma tane, tamā, paaga ma tagata fai saofaga i lo tatou nuu lautele atu. O le talalelei a Iesu Keriso ma Lana Togiola ua ou maua ai le vaaiga, faamoemoega ma le taitaiga.
E finagalo le Faaola ina ia iloa o Ia, na Ia folafola mai, “O a’u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.”8 Ua Ia valaaulia i tatou e “sau, ma mulimuli mai ia te [Ia]”9 ma ia “o mai ia te [Ia]”10 ina ia tatou maua le malologa mai ia tatou avega.
A o toe faafoliga ua manuia le lalolagi ma sili atu ona faalelalolagi, ma toatele ē e folafola e leai se Atua pe e lē mafai ona iloa o Ia, e i ai le mana i la tatou tali i Lana fesili e suia ma siitia ai i tatou taitoatasi ma i latou o siomia i tatou: “A O OUTOU, PE SE A LA OUTOU UPU IA TE AU, PO O AI?”
Ia tatou tauivi e ola i le talalelei a Iesu Keriso ma faia Lana galuega ina ia tatou iloa ai foi ma folafola atu ma le mautinoa o Ia “o le Keriso, le Alo o le Atua soifua.”