O le Tala a Jessie

Potu o Tala Fou

O le tala ia Jessie o loo faamatalaina e lana uo, o Maria Russo, lea o loo auauna o se faatonu o fesootaiga i le Siteki a Adelaide Ausetalia o Le Ekalesia a Iesu Keriso o le Au Paia o Aso e Gata Ai.

O Jie Ren, po o Jessie lea e fiafia e valaau ai o ia, sa taunuu mai i Adelaide ia Mati 2020 e a’oga mo se tikeri o Faatufugaga (Master’s) i le Speech Pathology i le Iunivesite o Flinders.

Sa lē iloa e Jessie o lea na ia taunuu tonu mai lava ae faailoa mai loa e le Faalapotopotoga o le Soifua Maloloina a le Lalolagi o le koronavairasi o se faama’i ma o lana semesa muamua o le a faia i taimi o le vavao.

Sa lagonaina e Jessie lona matuā tuutoatasia, tuuesea, ma le fefe. Fai mai o ia na o le pau lava le mea sa i lona olaga i le taimi lena ma le pau le mea sa ia faia o le tuua “toatasi i le fale, suesue, ai, moe ma toe fai foi.” Sa mapu o ia ina ua oo ia Iulai 2020 sa mafai ai loa ona auai atu o ia i le iunivesite mo le taimi muamua talu ona taunuu i Ausetalia.

Fai mai Jessie o le i ai i se atunuu fou, mamao mai aiga ma uo, e lē iloa se isi i Ausetalia ma le faia o ana suesuega uma lava (lea na fai mai o ia o se “polokalama faigata”) i luga o upega tafā’ilagi mo le semesa muamua, sa mamafa tele ia te ia ma na oo atu ia Novema o le 2021 ua vaivai lava o ia faaletino ma faalemafaufau seia oo i le tulaga ua manaomia ai e ia ona saili se fesoasoaniga faafomai.

I le taimi lea (Nov 21) sa vaai ai Jessie i se faalauiloa i luga o le Apiofoliga o loo valaaulia ai tagata e auai i vasega Igilisi. O vasega sa faia e faifeautalai O Le Ekalesia a Iesu Keriso o le Au Paia o Aso e Gata Ai.

Sa i ai se aafiaga muamua o Jessie i le Ekalesia i Shanghai ina ua valaaulia o ia e ni uo e auai i sauniga, lea sa ia faia i nisi o taimi . . . o lea ina ua vaai o ia i lenei sāvali i luga o le Apiofoliga sa matuā fiafia o ia ma manao e auai e le gata e aoao ai le Igilisi ae ia mafai ona fegalegalea’i ma tagata ma atonu e maua ai ni uo.

A o ia viliina le numera na maua i le faasalalauga sa popole ma atuatuvale o ia ina ne’i lē taliaina o ia. Sa manatu o ia o le Ekalesia o se “faalapotopotoga paia ma e na o tagata o le Ekalesia e mafai ona auai.” Sa fia iloa e ia pe mafai ea ona “talia [o ia] e le Atua auā [sa ia te ia se] malamalama itiiti ia te Ia.”

Ina ua ta’u mai i a Jessie e matuā talisapaia o ia e auai atu sa fiafia o ia, o le mea moni o le lofituina i le olioli upu e sili ona talafeagai i ai.

O loo manatua pea e Jessie ia le aso muamua sa ia ulufale ai i le Paranesi a Adelaide mo vasega Igilisi. Fai mai o ia sa faia e faifeautalai ia matuā lagona e ia le taliaina ma mo le taimi muamua i se taimi umi lava sa ia lagona ai “ua foliga mai ua toe sa’o mea uma.” Fai mai o ia sa pei na ia “vaai atu i le malamalama o taitaia atu [o ia] mai le pogisa ma toe lagona ai le faamoemoe.”

Sa lē mafai ona maua e Jessie se auala e aluese ai mai le Koviti ma o lena vasega Igilisi muamua sa maua ai e ia le lagona o loo i ai le malamalama i le isi itu o le ana.

Ina ua mavae le tele o vasega Igilisi ma le faia o ia e faifeautalai ma tagata o le Ekalesia o ia lagona “le alofagia tele ma le talisapaia” sa lagona ai e Jessie ua ia “taunuu i [lona] aiga.” Na papatisoina o ia i le aso muamua o Ianuari 2022. Fai mai o ia o se auala silisili ona atoatoa lea e amata ai se tausaga fou ma se olaga fou.

O le upusii lenei mai le tautalaga a Jessie i lona papatisoga:

O se mapusaga tele le iloa o loo i ai se fuafuaga mo mea uma e tutupu i lo’u olaga, ma o lena fuafuaga o loo i aao o le Atua. Na te aoao a’u ou te lē manaomiaina tali i mea uma ma e lē afaina le lē iloaina o mea uma. O le i ai o le faatuatua ia te Ia ma le tausia o Ana poloaiga, o le a ou maua ai le filemu i totonu. E mafai ona ou to’a e feagai ai ma faigata i lo’u olaga ma talitonu o le a i’u lava ina ou gafatia.

Ou te matuā faafetai ua mafai ona ou iloa le Atua ma ou iloa le alofa ma le tausiga o loo ia te Ia mo a’u. Ua ou sauni e faaauau lenei faigamalaga faatasi ma Ia ma tatalo o le a Ia faalatalataina atili atu a’u ia te Ia ma taiala o’u laasaga.

O le asō ua matuā ou faagaeetia ou te papatiso ma faasoa atu ia te outou uma ou te alofa ia Iesu, ma o Ia o lo’u Alii ma lo’u Faaola.