ITULAU I LE LOTOIFALE
O le Faamoemoega o le Atua mo le Tusiata
“O le faamoemoega o le Atua mo le tusiata o le musuia, ina ia aumaia ia i tatou ni vaaiga mamao o i tatou lava ia atonu e lē mafai ona tatou vaai i ai, ina ia faaleleia i tatou nai lo le mea na semanū e avea ai i tatou. Ua sili atu ona lelei le lalolagi ona o ata ma tusiata amiotonu o i ai i totonu.” —Elder M. Russell Ballard1
A o laitiiti Brigham Anderson, sa faigata ia te ia ona faitau. E maua laitiiiti lava i le dyslexic, ma sa umi se taimi faato’ā malamalama ai o ia i se fuaiupu, ae sa fiafia tele o ia i foliga o mataitusi. “O tusitusiga, mataitusi, foliga eseese o mataitusi . . . sa ou maofa ai i taimi uma,” o lana tala lea, “A e tuua faatasi i latou . . . [o mataitusi] e fatu ai upu, ma o na upu e fatu ai tala.”
O se tupuaga o Ngāti Hauiti i le vaega i lalo o le motu i mātu o Aotearoa (Niu Sila), sa ola a’e Brigham ma tala. Na te manatuaina lona faalogologo i tala i le leitiō i taeao o Aso Sa ma sa faapitoa lava lona fiafia tele i tala o le Feagaiga Tuai ma faataoto mai le Feagaiga Fou. “E matuā tāua tele tala ia te a’u,” na saunoa mai ai o ia.
I le asō, ua tuufaatasia e ia lona maofa i mataitusi ma faailoga faatasi ai ma lona tupuaga Māori ma lona fiafia i tala e fatufatu ai ni ata e faaalia ai ma le mamana lana molimau i le talalelei a Iesu Keriso.
I le faaiuga o le 2021, na faia ai e Brigham lana uluai faaaliga, “Ngā tukutuku o te kāinga,” po o “O le Aiga o Tukutuku.” O ata vali o lenei tuufaatasiga na uunaia e le faataitaiga sa’o o laina o loo maua i le tukutuku, o fala na lalaga i laufala ia e laina ai pito i totonu o puipui o fale fono faaleaganuu o Māori. E aafia foi i lenei tuufaatasiga mataupu tāua o loo aumaia i le “O le Aiga: O se Folafolaga i le Lalolagi.”
O atavali taitasi ua faa’oaina i le tele o uiga.
I le pito i lalo o se tasi o fala, o loo tusia ai le upu, “pūpūharakeke” i mataitusi lanu faaefuefu i luga o le lanu uliuli. O le faaMāori lea mo le sisi matamuli lea e maua i le laufala, e vave lava ona mou ese atu i totonu o lona atigi pe a oo mai ni tagata po o nisi e faalavelavea. I luga a’e o lenei upu, o loo tusi ai se laina paepae sasa’o agai i luga, ae o se laina e motumotu e foliga i le ala siliva motumotu e tuua e le sisi i lona ala.
O lenei ata o loo faaalia ai taimi atonu tatou te lagona ai ua leiloloa pe faatoilaloina ma o loo fia taumafai e saili le ala i le pogisa. Ae o le laina motumotu o loo i ai i ona tafatafa e lua ia laina atoatoa—o le tasi e fai ma sui o tagata i o tatou olaga o e faamalosia ma lagolagoina i tatou i taimi o tofotofoga, ma o le isi o lo tatou Faaola, o Iesu Keriso.
E o faatasi laina e tolu agai i luga, e tau atu i upu, “Ngakau Aroha”, ia e faatatau i le alofa malamalama, agalelei moni, ma le agaalofa. “E manaomia le agaalofa i totonu o aiga,” na faamatala mai e Brigham. “A leai le agaalofa e motumotu ma malepelepe aiga.”
O le agaalofa o le tasi o mataupu tāua e iva na ia maua mai i le “O le Aiga: O se Folafolaga i le Lalolagi” e molimoli atu ai lana galuega. O isi e aofia ai le faatuatua, tatalo, faaaloalo, galue, ma le alofa—o mataupu tāua ia, fai mai Brigham, e tāua foi i Māori.
Ua faaauau pea ona ia faaaoga lona faatuatua ma lana aganuu a o galue o ia i se faaputuga fou. E faavae i le Feagaiga FaaAperaamo, o le faaputuga lenei o atavali o loo faaaogaina ai foi mea e tutusa ai le va o aoaoga faavae o le talalelei ma tala ma mataupu tāua a Māori, ma latou faasoa atu ni sāvali—lesona vaaia—e uiga i le faaōgatasia o ō tatou olaga ma le fuafuaga a le Tamā Faalelagi mo i tatou.
O Brigham o se tane ma se tamā sa umia valaauga eseese faaletaitai i le Ekalesia a Iesu Keriso o le Au Paia o Aso e Gata Ai. O loo auauna ai nei o se faiaoga seminare mo le Uarota a Whanganui i le Siteki a Palmerston in Mātu, o i lona natura le tuuina atu o le taitaiga ma le aoaoga, ma a o faasolo ina lauiloa atili lana galuega tusiata i tagata lautele, o loo manatua lo latou gafatia e faasoa atu ai le talalelei a Iesu Keriso.
Ua ia molimauina lagona faaalia malolosi i sāvali o loo i ana atavali. O le iloa o Brigham, “A i ai i [tagata] na lagona faaalia—lagona o le filemu . . . alofa . . . ua manifinifi lava le veli auā o loo latou iloaina upu moni na aoaoina ai i latou a o le’i o mai i latou i le lalolagi.” Pe a i’u ina latou maua le avanoa e aoao ai upu moni o le talalelei ma auai i le Ekalesia, e faamoemoe Brigham o aafiaga na latou maua i ana ata o le a fesoasoani e avatu ia i latou le lototele e faia ai le filifiliga sa’o ma o mai ai ia Keriso.
A o ia iloa lelei ona tulaga lē atoatoa faaletagata, e loloto le faafetai a Brigham mo le tele o meaalofa ua faamanuiaina ai o ia e le Tamā Faalelagi. E aofia ai le tomai e vaai ma lagona ai mamanu i le lalolagi ma le naunautaiga e iloa uiga—tala—i nei mamanu.
O lana galuega o ata o se taumafaiga e faaaoga lona taimi ma taleni e fausia ai le mālo o le Atua. “Ua tatou osia feagaiga ia faia o lea,” na saunoa ai Brigham, e faatatau i folafolaga tuuto e faia e tagata ulu i le malumalu. “[O a’u ata] o le auala lea e faailoa atu ai la’u molimau.” E mautinoa lava, o se ata faaalia foi lea o lona aiga ma ana tu ma aga, o mea e mafaufau i ai ma lagonaina, mea na te faitauina ma suesueina, le auala e filifili e ola ai.
“O a’u lava lea,” o lana tala lea.