Mauaina o le Filemu i Taimi Taufaamata’u

Saunia e Peniette Vulaca

Ia Aperila 2021, na sosolo atu ai i Fiti le galu lona lua o le pipisi o le Koronavairasi. Sa manaomia ona vave fetuutuunai ai lo’u aiga, e pei o le isi toatele, i fuafuaga faafuasei ia na faatulaga e puipuia ai le pipisi o le vairasi. Talu ai ona o le pepēsiga muamua sa fa itula e alu ai i le taavale le mamao mai le mea ou te nofo ai, ou te le’i manatu lava o le a telē se aafiaga i lo’u lava aiga, auā sa ou faamoemoe o le a vave lava ona taofiofia le pipisi atu.

I taimi tonu o le a toe taia ai lava Fiti e le galu lona lua o le Koviti, sa faato’ā ou maua ai lava le tala i le maliu o le tamā o lo’u tamā. Sa le’i mafai ona auai lo’u tamā, lea e nofo i le itu i sisifo o Viti Levu, i toe sauniga o lona tamā i Suva ona o tapu i feoaiga i Fiti a o taumafai a matou tagata tausi soifua e taofiofi le vairasi. O le mea lea na ou iloa ai e sili atu ona latalata mai le vairasi i le aiga aua o lea na aafia ai ma na le mafai e lo’u aiga ona faatasitasi faaletino mo toe sauniga o lo’u tamā matua.

Sa faaauau pea ona pipisi le vairasi ia Fiti atoa. I le taimi lena, sa ou faia ai se pisinisi ma sa manaomia pea ona ou fetamoeai i feau ma tiliva ina ia mafai ona ou fesoasoani atu tautupe i le tupemaua a lo’u aiga. Sa faaauau pea ona matou galulue ma faatulaga fuafuaga ina ia tausisia pea le saogalemu e mafai ai e lo matou aiga. O se taimi faigata lava le taumafai e fetuutuunai i suiga aua sa lē mafai ona matou feiloai ma faapotopoto ma o matou aiga lautele, lea sa masani lava ona matou faia i faaiuga o vaiaso. Sa avea ma luitau faalemafaufau ma faalelagona le lē mafai ona faatasitasi ma vaai faaletino i o matou aiga.

Na sili atu foi ona taia a’u i le moni o le vairasi ina ua maua si o’u tamai aiga i auga e pei o le fulū. Sa ou manatu ifo ia te a’u, “Atonu ua na o le fulū e maua i suiga o le tau lea e masani lava ona pipisi solo,” ae na i’u ina faia a matou suesuega faafomai mo le puipuiga. Na maua mai a matou suega e faamaonia: o lo’u toalua, o la’u pepe teine e 18 masina, ma a’u, ua maua uma i le KOVITI-19.

O le tala ua faamaonia a matou suesuega na aafia ai i matou faalemafaufau, ae maise lava a’u ma lo’u toalua. Na lagonaina ua pei e faateteleina le leaga o o matou āuga ma umi atu ona tuai ona matou malolosi ona o le faateteleina o lo ma’ua mafaufau i le mea moni o matou ua maua i le Koronavairasi. O le taulai i lo matou mama’i na faatupula’ia atili ai le fefe, lea na ma pipili ai faalemafaufau, faalelagona ma faaleagaga—sa leai so ma avanoa mo le faatuatua. Ina ua mavae le lua vaiaso o faataotolia pea i le vairasi, na ma iloa ai ma te le’i faaalia se faatuatua ia Iesu Keriso ona ua ma faatagaina mai i totonu le fefe e ala i le taulai i lo matou mama’i. O lea, ina ia faafetaia’i ai lena mea, na amata ona suia la ma’ua taulai i le Faaola ma le mana e oo mai i le faatinoina o le faatuatua ia te Ia.

O le minute lava na ma filifili ai e faatuatua ia Iesu Keriso ma faatino loa, na amata ona suia o ma mafaufau ma uiga, ma amata ona ōgatasi a ma faatinoga ma lo ma faatuatua. Sa ma tatalo ma le manatu tonu i ai ma faailoa atu pea lava pea ia ma tatalo e i ai lo ma faatuatua ia Iesu Keriso ma Lona mafai e faamalolo ai i matou faaletino. Na amata ona ma faitau atili i tusitusiga paia ma tasii mai mau i soo se mea o le fale ma, e le tasi i le isi.

Na amata ona sili atu lo ma vaai i le lelei ma faaauau pea ona ma atiina a’e i luga o le faamoemoe. Ma te le’i toe lagonaina se fefe po o se popole. Na sili atu lo ma fiafia i le fale ma fiafia e mafuta le tasi i le isi. Ina ua matua amata lava ona faaali atu lo ma faatuatua ia Iesu Keriso i le faia o ia mea, na ma iloa ai ua amata ona faatelevave le toe foi i le manuia ma mafai ai ona atoatoa le malosi i se taimi puupuu mulimuli ane.

E mausali lo’u talitonu o le faatuatua ia Iesu Keriso e mafai ona aumaia le mana o le faamalologa a o tatou faatinoina le faatuatua ia te Ia. E mafai ona faatoilaloina lo tatou fefe ma popolega pe a tatou faatuatuaina ma taulai atu i le Faaola o Iesu Keriso. Ou te matua faafetai na mafai e lo’u aiga ona faatoilaloina faatasi le KOVITI faatasi ai ma le fesoasoani o le mana faamalōlō o le Faaola.